បើតាមប្រភពព័ត៌មានខ្សឹបខ្សៀវពីក្រសួងសេដ្ឋកិច្ចនិងហិរញ្ញវត្ថុបានឲ្យដឹងថា តាមរយៈការកែទម្រង់ដ៏គួរឲ្យភ្ញាក់ផ្អើលនៃការផ្លាស់ប្តូរថ្នាក់ដឹកនាំគយនិងរដ្ឋាករនាពេលខាងមុខនេះ នឹងបន្តទៅដល់ការផ្លាស់ប្តូរមុខ តំណែងមន្ត្រីគយតាមសាខា តាមការិយាល័យជាច្រើនទៀត ដែលក្នុងនោះគេ
ដឹងថា មុខសញ្ញាមន្ត្រីគយមួយចំនួនដែលកាន់តំណែងតាមការិយាល័យ និងតាមសាខាឡើងដុះស្លែទៅហើយនោះ អាចនឹងត្រូវដកបញ្ឈរជើងនៅក្រសួងសេដ្ឋកិច្ចនិងហិរញ្ញវត្ថុ។ ដូច្នេះគេមើលឃើញថាលោក ជួប ចំរើន ដែលជាប្រធានសាខាគយប្រចាំខេត្តរតនគិរី និងជាប្រធានការិយាល័យគយ ប្រចាំច្រកអន្តរជាតិអូរយ៉ាដាវ អាចជាមុខសញ្ញានៃការដោះដូរមុខតំណែងមុនគេ ព្រោះលោក ជួប ចំរើន បានប្រើសិទ្ធិអំណាចរបស់ខ្លួនក្នុងការបើកដៃឲ្យក្រុមឈ្មួញនាំចេញឈើខុសច្បាប់ទៅស្រុកយួន និងឃុបឃិតបើកដៃឲ្យមានការហូរចូលទំនិញគេចពន្ធប្រភេទគ្រឿងចក្រធំៗបំផ្លាញចំណូលថវិកាជាតិយ៉ាងច្រើនសន្ធឹកសន្ធាប់។
សេចក្តីរាយការណ៍ពីខេត្តរតនគិរីបានឲ្យដឹងថា ការដឹកជញ្ជូនឈើប្រណីតចេញទៅស្រុកយួន នាពេលបច្ចុប្បន្ននេះ កំពុងតែកើតឡើងយ៉ាងគគ្រឹកគគ្រេង គ្មាននរណាអើពើទប់ស្កាត់ទេ ជាពិសេសជំនាញគយរបស់លោក ជួប ចំរើន មានការពាក់ព័ន្ធយ៉ាងជ្រៅក្នុងការប្រមូលលុយពីឡានដឹកឈើខុសច្បាប់ចេញទៅស្រុកយួន តាមតំបន់ដែលគាត់គ្រប់គ្រង។ មានការបញ្ជាក់ផងដែរថាភាពអនាធិបតេយ្យដែលក្រុមឈ្មួញកំពុងតែសុខស្រួលក្នុងដឹកជញ្ជូនឈើចេញទៅស្រុកយួនតាមច្រកអូរយ៉ាដាវ ក៏ព្រោះតែមានការបើកភ្លៀងខៀវពីលោក ហេង គឹមសាន ជាប្រធានស្នាក់ការច្រកអន្តរជាតិអូរយ៉ាដាវ ជាពិសេស លោក ជួប ចំរើន ជា ប្រធានការិយាល័យគយប្រចាំនៅទីនោះ ដែលល្បីល្បាញខាងប្រព្រឹត្តអំពើពុករលួយឡើងដុះស្លែជាយូរមកហើយ។
សេចក្តីរាយការណ៍បានឲ្យដឹងទៀតថា ការនាំចេញឈើប្រណីតពីតាមបណ្តាស្រុកមួយចំនួននៃខេត្តរតនគិរីទៅស្រុកយួនកំពុងកើតមានយ៉ាងគគ្រឹកគគ្រេង ទាំងតាមច្រកអន្តរជាតិអូរយ៉ាដាវ ក៏ដូចជាច្រករបៀងមួយចំនួន ដូចជានៅចំណុចភ្នំក្រហម នៃឃុំប៉ក់ញ៉ៃ ច្រកផ្លូវទឹក នៃភូមិភឹះ និងច្រករបៀងមួយទៀតដែលគេនិយមហៅថាច្រកបារី ស្ថិតនៅខាងក្រោយកាស៊ីណូ ចម្ងាយ៣០០ម៉ែត្រ ពីច្រកទ្វារអន្តរជាតិអូរយ៉ាដាវ។ នៅតាមបណ្តាច្រកមួយចំនួន បើទោះបីជាមានជំនាញគយ នគរបាលសេដ្ឋកិច្ចទាហានការពារព្រំដែន នគរបាលអន្តោប្រវេសន៍ ក៏ដូចជាជំនាញផ្សេងៗទៀត ប្រចាំការទាំងយប់ទាំងថ្ងៃបែបណាក៏ដោយ ក៏ពួកគេមិនបានយកចិត្តទុកដាក់ទប់ស្កាត់ ការដឹកជញ្ជូនឈើខុសច្បាប់ចេញទៅស្រុកយួនដ៏អនាធិបតេយ្យទាំងយប់ទាំងថ្ងៃនោះដែរ ព្រោះថាក្រុមឈ្មួញបានរៀបចំជាកញ្ចប់លុយយកទៅបង់ជូនមន្ត្រី និងសមត្ថកិច្ចពាក់ព័ន្ធទាំងអស់កុំឲ្យទៅរំខានការរកស៊ីឈើខុសច្បាប់យ៉ាងពេញបន្ទុករបស់ពួកគេគ្មានខ្វះចន្លោះអ្វីឡើយ។
ប្រជាពលរដ្ឋបានរាយការណ៍ទៀតថា សកម្មភាពដឹកជញ្ជូនឈើប្រណីតយ៉ាងអនាធិបតេយ្យនៅក្នុងខេត្តរតនគិរីនៅពេលនេះ ធ្វើឡើងតាមផ្លូវជាតិលេខ៨អា ឆ្លងកាត់ប៉ុស្តិ៍ជជុះរបស់មន្ត្រីជំនាញនិងសមត្ថកិច្ចពាក់ព័ន្ធរាប់សិបកន្លែង ដូចជានគរបាលមូលដ្ឋានយោធាស្រុក នគរបាលសេដ្ឋកិច្ចខេត្ត នគរបាលសេដ្ឋកិច្ចក្រសួងមហាផ្ទៃ រួមទាំងគយចល័តផងដែរ បានរាយបណ្តាក់គ្នាដូចខ្យង ចាំរាប់ក្បាលឡានដឹកឈើយកលុយ ហើយថែមទាំងកោសរូសបង្ខំឲ្យប្រជាពលរដ្ឋរកស៊ីដឹកទំនិញបន្តិចបន្តួចរួមទាំងកសិផលឲ្យបង់លុយទៅតាមការទាមទាររបស់ពួកគេ គ្មានក្រែងញញើតអ្វីឡើយ។ រថយន្តដែលក្រុមឈ្មួញប្រើប្រាស់សម្រាប់ដឹកជញ្ជូនឈើខុសច្បាប់នៅតាមផ្លូវជាតិលេខ៨អានេះសុទ្ធតែស៊េរីទំនើបៗ ដូចជាកាមរី បាឡែន ឡង់គ្រីស័រ រថ យន្តតូយ៉ូតាមួយបាំងកន្លះឆ្ពោះទៅកាន់ច្រកព្រំដែនអន្តរជាតិអូរយ៉ាដាវ ដែលនៅទីនោះជាចំណុចប្រមូលលុយដុំ របស់លោក ជួប ចំរើន ព្រោះថាការដឹកជញ្ជូនឈើមកពីគ្រប់ទីកន្លែងទាំងអស់សុទ្ធតែត្រូវចេញដំណើរទៅកាន់ច្រកអន្តរជាតិអូរយ៉ាដាវ។
ចំពោះសកម្មភាពដឹកជញ្ជូនឈើខុសច្បាប់តាមផ្លូវទឹកក្នុងខេត្តរតនគិរី ក៏កំពុងកើតមានជាហូរហែ ដូចជាការដឹកជញ្ជូនតាមទន្លេសេសាន កាត់តាមភូមិបាចូល ឡើងតាមច្រករបៀងភូមិភឹះ យ៉ាងងាយស្រួលបំផុត ហើយសកម្មភាពដឹកជញ្ជូនឈើនៅក្នុងខេត្តរតនគិរីនេះ ធ្វើឡើងជាចំហគ្មានអ្វីលាក់បាំងទេ ព្រោះគេដឹងថាក្រុមឈ្មួញទាំងតូចទាំងធំ មានមុខដដែលៗសុទ្ធសឹងជាបក្ខពួកនិងជាអ្នកស្គាល់ចិត្តស្គាល់ថ្លើម លោក ជួប ចំរើន ទាំងអស់ទើបអាចរកស៊ីដឹកជញ្ជូនឈើដោយគ្មានក្រែងញញើតពីច្បាប់ទម្លាប់។ គេដឹងថាឈ្មួញមួយចំនួននៅក្នុងខេត្តរតនគិរីនេះបានប្រមូលទិញ ឈើពីតំបន់ផ្សេងៗដើម្បីនាំចេញ ទៅស្រុកយួន ប៉ុន្តែពួកគេចាំបាច់ត្រូវរាយការណ៍ជូនដំណឹងជាមុន ទៅកាន់លោក ជួប ចំរើន ទើប អាចនាំចេញទៅលក់នៅស្រុកយួនតាមច្រកអន្តរជាតិអូរយ៉ាដាវ ដោយរលូនល្អ ព្រោះនៅពេលដែលមានភ្លើងខៀវពីលោក ជួប ចំរើន ហើយនោះគ្មាននរណាហ៊ានក្អកជាមួយទេ។
លោក ជួប ចំរើន ក្រៅពីការឃុបឃិតចាត់តាំងមន្ត្រីឲ្យប្រមូលលុយយ៉ាងប្រសេចប្រសាចពីក្រុមអ្នករកស៊ីដឹកជញ្ជូនឈើខុសច្បាប់ គាត់ក៏មានជាប់ពាក់ព័ន្ធយ៉ាងវែងអន្លាយក្នុងការឃុបឃិតឲ្យក្រុមឈ្មួញនាំចូលគ្រឿងចក្រធំៗបម្រើឲ្យការឈូសឆាយដីតាមព្រៃសម្បទាន ដោយគ្មានការបង់ពន្ធ ហើយគ្រឿងចក្រទាំងនោះ ត្រូវបានឈ្មួញកណ្តាលដឹកយកមកលក់ដូរយ៉ាងអនាធិបតេយ្យ ធ្វើឲ្យខាតបង់ចំណូលថវិកាជាតិយ៉ាងសន្ធឹកសន្ធាប់។ រឿងដែលគួរឲ្យស្អប់ខ្ពើមបំផុតនោះ លោក ជួប ចំរើន ក៏បានចាត់តាំងឲ្យមន្ត្រីក្រោមឱវាទប្រមូលលុយពីពលរដ្ឋដែលរកស៊ីដឹកជញ្ជូនកសិផលតាមច្រកអន្តរជាតិអូរយ៉ាដាវ ហើយសូម្បីតែឡានក្រុងដឹកភ្ញៀវទេសចរ និង អ្នកដំណើរឆ្លងកាត់ច្រកនេះ ដែលលួចដឹក ទំនិញគេចពន្ធបន្តិចបន្តួច ក៏ត្រូវតែចូលបង់លុយឲ្យជំនាញគយរបស់លោក ជួប ចំរើន ផងដែរ ទើបអ្វីៗអាចដំណើរការទៅដោយរលូន បើទោះបីខាតបង់ចំណូលពន្ធរដ្ឋក៏ដោយ៕