ស្ត្រីម្នាក់សម្រេចចិត្តចង.កសម្លាប់ខ្លួនចោលប្តី និងកូន៦នាក់ ព្រោះតែគ្មានប្រាក់សងបំណុលគេ

ខេត្តបាត់ដំបង ៖ មានហេតុការណ៍ភ្ញាក់ផ្អើលមួយបានកើតឡើង កាលពីវេលាម៉ោង៩និង៣០នាទីព្រឹកថ្ងៃទី៧ ខែមករា ឆ្នាំ២០១៤ ដោយសារតែគេប្រទះឃើញស្ត្រីម្នាក់បានចង.កសម្លាប់ខ្លួននៅលើផ្ទះ ស្ថិតនៅក្នុងភូមិព្រៃរកា សង្កាត់អូរម៉ាល់ ក្រុងបាត់ដំបង ។

បើតាមប្រភពព័ត៌មានពីកន្លែងកើតហេតុបានឲ្យដឹងថា ស្ត្រីរងគ្រោះដែលគិតខ្លីចង.កសម្លាប់ខ្លួនខាងលើនេះមានឈ្មោះ មៀច ម៉េងលី អាយុ ៥៧ឆ្នាំ មានប្ដីឈ្មោះ អ៊ុន សាវុត អាយុ ៦២ឆ្នាំ មានកូនស្រី៦នាក់ក្នុងបន្ទុក បច្ចុប្បន្នរស់នៅភូមិ-សង្កាត់ខាងលើ ។

ប្រភពដដែលបានបន្តឲ្យដឹងទៀតថា កាលពីព្រឹកថ្ងៃទី៧ ខែមករា ឆ្នាំ២០១៤ ស្ដ្រីរងគ្រោះបានសម្ដែងទឹកមុខ ស្រពាប់ស្រពោន និងមានការឈ្លោះប្រកែកគ្នាជាមួយប្ដី ព្រោះរឿងជំពាក់ប្រាក់គេនឹងដល់ពេលត្រូវសងគេ ។ លុះរហូតដល់ម៉ោង ៩ព្រឹកថ្ងៃដដែល ស្រាប់តែកូនស្រីរបស់ជនរងគ្រោះ បានប្រទះ ឃើញម្ដាយចងកស្លាប់បាត់ទៅហើយ ។

បន្ទាប់ពីកើតហេតុភ្ញាក់ផ្អើល កម្លាំងសមត្ថកិច្ចមូលដ្ឋានក៏បានចុះទៅធ្វើកោសល្យវិច្ឆ័យលើសាកសព និងបានអះអាងថា ជនរងគ្រោះពិតជាស្លាប់ដោយសារតែចង.កសម្លាប់ខ្លួនពិតប្រាកដមែន។ បន្ទាប់ពីធ្វើការពិនិត្យរួចរាល់ សមត្ថកិច្ចក៏បានប្រគល់សាកសពជនរងគ្រោះឲ្យក្រុមគ្រួសារធ្វើបុណ្យទៅតាមប្រពៃណី៕