រដ្ឋាភិបាល បើកកិច្ចប្រជុំទូលាយ ដើម្បីត្រួតពិនិត្យនយោបាយកំណែទម្រង់របស់ខ្លួន

ដូចការគ្រោងទុក លោកនាយករដ្ឋមន្ត្រី ហ៊ុន សែន បានដឹកនាំកិច្ចប្រជុំបើកទូលាយមួយនៅព្រឹកថ្ងៃពុធនេះដើម្បីត្រួតពិនិត្យមើលឡើងវិញនូវគោលនយោបាយកំណែទម្រង់របស់ខ្លួន។ កិច្ចប្រជុំបើកទូលាយនេះធ្វើឡើងនៅវិមានសន្តិភាពទីស្តីការគណៈរដ្ឋមន្ត្រីដោយមានការចូលរួមយ៉ាង

ទូលំទូលាយពីន្ត្រីរដ្ឋាភិបាល និងមន្ត្រីពាក់ព័ន្ធ។ រដ្ឋាភិបាលក៏ទើបតែបានបង្កើតក្រុមការងារចុះពង្រឹងការកែទម្រង់ដល់មូលដ្ឋានផងដែរ។បួនខែក្រោយពីបើកប្រជុំគណៈរដ្ឋមន្ត្រីលើកដំបូង រដ្ឋាភិបាលអាណត្តិទី៥របស់លោកនាយករដ្ឋមន្ត្រី ហ៊ុន សែន បានផ្តើមពិនិត្យមើលឡើងវិញអំពីគោលនយោបាយកំណែទម្រង់ស៊ីជម្រៅរបស់ខ្លួន។ ការពិនិត្យមើលកំណែទម្រង់នេះបានធ្វើឡើងតាមរយៈកិច្ចប្រជុំបើកទូលាយមួយនៅព្រឹកថ្ងៃពុធនេះនៅទីស្តីការគណៈរដ្ឋមន្ត្រីក្រោមវត្តមានរបស់លោកនាយករដ្ឋមន្ត្រី ហ៊ុន សែន។

កិច្ចប្រជុំពិសេសថ្ងៃនេះក៏មានការចូលរួមយ៉ាងទូលំទូលាយពីសំណាក់មន្ត្រីរដ្ឋាភិបាល និងមន្ត្រីពាក់ព័ន្ធជាច្រើន។ កិច្ចប្រជុំនេះក៏ដើម្បីផ្សព្វផ្សាយពីសេចក្តីសម្រេចថ្មីរបស់រដ្ឋាភិបាលផងដែរ។ សេចក្តីសម្រេចដែលត្រូវបានលោកនាយករដ្ឋមន្ត្រីចុះហត្ថលេខាកាលពីថ្ងៃទី ២៧ មករា និយាយអំពីការបង្កើតក្រុមការងារចម្រុះចុះមូលដ្ឋានដើម្បីត្រួតពិនិត្យកំណែទម្រង់នានារបស់រដ្ឋាភិបាល។

លោកនាយករដ្ឋមន្ត្រី ហ៊ុន សែន បានបង្ហើបឲ្យដឹងកាលពីថ្ងៃសុក្រសប្តាហ៍មុននៅក្នុងកិច្ចប្រជុំគណៈរដ្ឋមន្ត្រីថា កិច្ចប្រជុំបើកទូលាយថ្ងៃនេះមានគោលដៅពិនិត្យវាយតម្លៃ និងជំរុញល្បឿននៃកម្មវិធីកំណែទម្រង់នានាដែលរាជរដ្ឋាភិបាលអាណត្តិទី៥បានប្រកាសដាក់ចេញក្នុងកិច្ចប្រជុំគណៈរដ្ឋមន្ត្រីដំបូងកាលពីថ្ងៃទី ២៥ កញ្ញា ឆ្នាំ ២០១៣ ។

គេនៅចាំបានថា ក្នុងកិច្ចប្រជុំគណៈរដ្ឋមន្ត្រីដំបូង លោកនាយករដ្ឋមន្ត្រី ហ៊ុន សែន បានទទួលស្គាល់ចំណុចខ្វះខាតជាច្រើនរបស់មន្ត្រីរដ្ឋាភិបាលនិងអាជ្ញាធរ ដែលជាហេតុធ្វើឲ្យគណបក្សកាន់អំណាចធ្លាក់ចុះប្រជាប្រិយភាពយ៉ាងគំហុគក្នុងការបោះឆ្នោតសភាអាណត្តិទី។ លោកនាយករដ្ឋមន្ត្រីបានព្រមានមន្ត្រីរបស់ខ្លួនឲ្យឆ្លុះកញ្ចក់ដុះក្អែលឲ្យបានស្អាតដោយខ្លួនឯង ប្រសិនបើមិនដូច្នោះទេ រដ្ឋាភិបាលនឹងចាប់ដុះក្អែលឲ្យដោយបង្ខំ។

ក្នុងចំណោមកំណែទម្រង់ដែលត្រូវបានប្រកាសឡើង ការបង្ខិតមន្ត្រីរដ្ឋាភិបាលនិងមន្ត្រីអាជ្ញាធរឲ្យទៅកៀកនឹងប្រជាពលរដ្ឋគឺជាចំណុចគន្លឹះមួយ។ ការរៀបចំវេទិកាសាធារណៈត្រូវបានរដ្ឋាភិបាលជ្រើសរើសជាមធ្យោបាយដើម្បីសម្រេចគោលដៅនេះ។ លោក ស ខេង ឧបនាយករដ្ឋមន្ត្រីនិងរដ្ឋមន្ត្រីក្រសួងមហាផ្ទៃក៏នឹងត្រូវធ្វើបទបង្ហាញអំពីបញ្ហាជាច្រើនជូនអង្គប្រជុំផងដែរ។ នេះបើយោងតាមការប្រកាសឲ្យដឹងរបស់ទីស្តីការគណៈរដ្ឋមន្ត្រី៕