ហេតុអ្វីសហភាពអឺរ៉ុបប្រើពេលយូរទើប ព្រមចុះជួយបារាំង នៅអាហ្វ្រិកកណ្តាល

ទាហាននៃកងកម្លាំងSangaris ធ្វើត្បាតតាមថ្នល់ក្រុងបង់ហ្គី ថ្ងៃទី ១៨ មករា ២០១៤

ជាច្រើនសប្តាហ៍មកហើយ ដែលលោកប្រធានាធិបតីបារាំង បានទាមទារការគាំទ្រពី សហភាពអឺរ៉ុប។ ឥលូវបានទទួលហើយ ! រដ្ឋមន្ត្រីក្រសួងការបរទេសអឺរ៉ុបទាំង២៨ បានព្រមព្រៀងគ្នាជាឯកច្ឆ័ន្ទ កាលពីថ្ងៃចន្ទទី ២០មករា ក្នុងចូលធ្វើអន្តរាគមន៍នៅសាធារណរដ្ឋអាហ្វ្រិកកណ្តាលជាមួយបារាំង ដោយបាន
សម្រេចបញ្ជូនទាហានកន្លះពាន់ទៅបន្ថែមក្នុងប្រតិបត្តិការ Sangaris សម្រាប់រយៈពេល៦ខែ។ ពេលនេះបារាំងលែងឯកោទៀតហើយ ប៉ុន្តែសួរតើថាប្រទេសជាសមាជិកអឺរ៉ុបមួយ បញ្ជូនទ័ពប៉ុន្មាន ? តើទាហានទាំងនោះមានតួនាទីអ្វីខ្លះ ? ពេលណាទ័ពបន្ថែមនឹងផ្តើមធ្វើប្រតិបត្តិការ ? ហេតុអ្វីអឺរ៉ុបប្រើពេលដល់ទៅពីរខែទើបព្រមចូលជួយ ?

ប្រទេសជាសមាជិកសហភាពអឺរ៉ុប នៅទីបំផុត ព្រមផ្តល់ការគាំទ្រដល់បារាំង ទាំងផ្នែកសម្ភារៈ និងកម្លាំងមនុស្ស បន្ទាប់ពីបារាំងចាប់បើកប្រតិបត្តិការ « Sangari » អស់ជិតពីរខែ ជាមួយកម្លាំងទ័ព១៦០០នាក់។ ថ្វីបើបានផ្តល់ភ្លើងខៀវ ព្រមបញ្ជូនទ័ពបន្ថែមទៅសាធារណរដ្ឋអាហ្វ្រិកកណ្តាល ប្រកបដោយឆន្ទៈ និងដោយសំឡេងជាឯកច្ឆ័ន្ទ ក្នុងចំណាត់ការដោះស្រាយវិបត្តិមែន ប៉ុន្តែនៅមានចំណុចលម្អិតជាក់ស្តែង និងលើសមរភូមិជាច្រើនទៀត ដែលត្រូវកំណត់ឱ្យបានច្បាស់លាស់ ដូចជា ៖ ក្បាលម៉ាស៊ីនបញ្ជាការយោធា ទីតាំងភូមិសាស្ត្រនយោបាយ បរិមាណទ័ពប្រយុទ្ធ ឬច្បាប់វិធាននៃការប្រយុទ្ធ ... និងចុងក្រោយត្រូវមានការអនុម័តពីក្រុមប្រឹក្សាសន្តិសុខអង្គការសហប្រជាជាតិទៀត។

បើនិយាយពីលទ្ធផលនៅក្រដាស ការព្រមព្រៀងរបស់សហភាពអឺរ៉ុបនេះ គឺជាជោគជ័យនយោបាយមួយរបស់លោកប្រធានាធិបតីបារាំង ហ្វ្រង់ស័រ ហូឡង់។ អាល្លឺម៉ង់ មិនបោះបង់បារាំងឱ្យឯការ អឺរ៉ុបទាំងមូលមិនអាចបណ្តោយឱ្យបារាំងលុងខ្លួនម្នាក់ឯង ព្រោះផលវិបាកនៃសង្គ្រាមរ៉ាំរៃនៅអាហ្វ្រិក នឹងប៉ះពាល់ប្រយោជន៍អឺរ៉ុបទាំងមូល។ បើតាមរដ្ឋមន្ត្រីការបរទេសអាល្លឺម៉ង់ បើអាហ្វ្រិកជួបអស្ថិរភាព នោះនឹងមានវិបត្តិជនភៀសខ្លួន ភេរវកម្ម ដែលអាចហៀមកដល់អឺរ៉ុប។

អឺរ៉ុបកម្រនឹងចេញធ្វើប្រតិបត្តិការយោធាណាស់ អន្តរាគមន៍យោធាក្រោយគេបង្អស់គឺនៅឆ្នាំ២០០៨។ ប៉ុន្តែស្ថានការណ៍នៅអាហ្វ្រិកធ្ងន់ធ្ងរខ្លាំងរហូតទាល់តែសហភាពអាចជម្នះភាពប្រទាំងប្រទើសគ្នាបាន។ តាមការពិត វាគួរឱ្យចម្លែកដែរ ដែលសហភាពអឺរ៉ុបត្រូវការពេលវេលាយ៉ាងយូរទម្រាំចេញជាសំឡេងតែមួយដូច្នេះ។ នេះជាលក្ខណៈពិសេសរបស់អឺរ៉ុប ព្រោះរាល់ប្រតិបត្តិការយោធាធ្វើឡើងក្នុងក្របខ័ណ្ឌនយោបាយសន្តិសុខ និងការពាររួម ត្រូវតែមានការព្រមព្រៀងជាឯកច្ឆ័ន្ទទើបបាន។ គ្រប់ប្រទេសជាសមាជិកត្រូវតែព្រម បើទោះបីជាគ្រប់គ្នាមិនចូលរួមធ្វើប្រតិបត្តិការក៏ដោយ។ ចំណុចនេះហើយដែលចោទជាបញ្ហា កាលពីដំបូងនោះ។ សមាជិកភាគច្រើន យល់និងជួយគាំទ្រប្រតិបត្តិការយោធាបារាំងនៅអាហ្វ្រិកកណ្តាល ប៉ុន្តែអង់គ្លេសជំទាស់។

ចុះហេតុអ្វីអង់គ្លេសប្តូរចិត្តនៅពេលនេះ ? ការជំទាស់របស់អង់គ្លេស មិនមែនការប្រឆាំងដាច់ខាតដោយចំពោះទេ។ បើតាមអ្នកវិភាគខ្លះ គឺបណ្តាលមកពី មួយរយៈចុងក្រោយនេះ អង់គ្លេសបានដកខ្លួនចេញឆាកអន្តរជាតិ ស្ទើរបាត់មុខបាត់មាត់ខុសពីទម្លាប់នេះ មកពីអង់គ្លេសមានវិបត្តិផ្ទៃក្នុង ប្រឈមមុខនឹងការធ្វើប្រជាមតិ ទាមទារឯករាជ្យតំបន់អេកូសផង និងការរក្សាអង់គ្លេសជាសមាជិកសហភាពអឺរ៉ុបផង ពោលគឺអង់គ្លេសវក់វីនឹងរឿងក្នុង ជាងនឹកគិតដល់អត្តសញ្ញាណអឺរ៉ុប។

ម្យ៉ាងវិញទៀត វាស្ទើរក្លាយជាប្រពៃណីទៅហើយ ដែលអង់គ្លេសមិនសូវអើពើនឹងបេសកកម្មនយោបាយសន្តិសុខ និងការពាររួមថ្នាក់សហភាពអឺរ៉ុបនោះ។ នេះគឺជាជំហរមនោគមវិជ្ជា។ អង់គ្លេសចូលចិត្តបេសកកម្មណាដែលសមស្រប ដែលរដ្ឋមួយណាចង់រដ្ឋនោះធ្វើ។ ប៉ុន្តែនៅពេលត្រូវការសំឡេងជាឯកច្ឆ័ន្ទ នោះគឺជាជំហរការទូតរបស់អឺរ៉ុបទាំងមូល មិនមែនជាប្រទេសមួយណាទេ។

ការព្រមព្រៀងនៅព្រុចសែល កាលពីថ្ងៃចន្ទទី ២០មករា ជាការព្រមព្រៀងលើអន្តរាគមន៍យោធាអឺរ៉ុប។ រាល់ពេលមានបេសកកម្មបែបនេះ គឺរដ្ឋនីមួយៗជាសមាជិក ជាអ្នកសម្រេចបញ្ជូនទាហានរបស់ខ្លួនទៅឬអត់។ ដូច្នេះជាកងពលជាតិ ដែលនឹងត្រូវដាក់ពង្រាយនៅតាមសមរភូមិ ក្នុងក្របខ័ណ្ឌអឺរ៉ុប មិនមែនកងទ័ពអឺរ៉ុបទេ ព្រោះសហភាពអឺរ៉ុបគ្មានកម្លាំងយោធាទេ។

ពេលនេះជាដំណាក់កាលផុយស្រួយបំផុត មានការព្រមព្រៀងនយោបាយហើយ ក្រុមប្រទេសជាសមាជិកទាំង២៨ត្រូវ មកអង្គុយដំកង់ ប្រកាសម្តងម្នាក់អំពីវិភាគទាន ចំនួនកម្លាំងទាហានដែលត្រូវចូលរួមក្នុងប្រតិបត្តិការ រក្សាសុវត្ថិភាពរដ្ឋធានី បង់ហ្គី និងតំបន់អាកាសយានដ្ឋាន។ នេះជាការលំបាកបំផុតមួយ។ គេបានដឹងថា នឹងមានទ័ពអឺរ៉ុបបន្ថែម ពី ៣០០ ទៅ៥០០នាក់ ទៅជួយទ័ពបារាំងលើសមរភូមិស្រាប់ ក្នុងនោះ១៥០នាក់ ទំនងជាចំណែករបស់បែលហ្សិក ប៉ូឡូញជួយធ្វើប្រតិបត្តិការមនុស្សធម៌និងឱ្យយន្តហោះមួយគ្រឿងទៅទ័ពបារាំងប្រើ អង់គ្លេសនិងអាល្លឺម៉ង់ ទំនងជាមិនជួយផ្នែកកម្លាំងទ័ពលើសមរភូមិទេ។ ទោះជាយ៉ាងណាក៏ដោយ ទោះយឺតក្តី តិចតួចក្តី ក៏ការព្រមព្រៀងនាពេលនេះ បង្ហាញយ៉ាងច្បាស់អំពី សាមគ្គីភាពចំពោះបារាំង ចំពោះសកម្មភាពបារាំងនៅអាហ្វ្រិកកណ្តាល។ ជំហរគាំទ្រដែលបារាំងចង់បាននិងស្វាគមន៍ជានិច្ច ទោះនៅមានការស្មុគស្មាញទៀតក៏ដោយ៕