ក្រិកអាចសម្រេចទិសដៅ ប្រមូលថវិកាផ្នែកចំណូល បានច្រើនជាងចំណាយ គិតសម្រាប់ឆ្នាំ២០១៣

ក្រិកបានកាត់បន្ថយចំណាយគ្រប់សព្វបែបយ៉ាង ដើម្បីអាចសម្រេចបានទិសដៅប្រមូលថវិកាចំណូល បានច្រើនជាងចំណាយនេះ

ដោយ ព្រំ សឿន សូលីណា

យោងតាមការប្រកាសរបស់ក្រសួងហិរញ្ញវត្ថុក្រិក នៅថ្ងៃអង្គារនេះ ប្រទេសក្រិកនឹងសំរេចទិសដៅខ្លួន ក្នុងការប្រមូលថវិកាផ្នែកចំណូល បានច្រើនជាងផ្នែកចំណាយ យ៉ាងហោចក៏៨០០លានអឺរ៉ូ ដែរ គិតសម្រាប់ឆ្នាំ២០១៣កន្លងមកនេះ។ ទឹកប្រាក់នេះ មិនបានរាប់បញ្ចូលពីប្រាក់ដែលរដ្ឋចំណាយដើម្បីបង់ការប្រាក់បំណុល ដែលក្រិកត្រូវបង់អោយម្ចាស់បំណុលនានានោះទេ។

នៅថ្ងៃអង្គារនេះ យោងតាមរដ្ឋមន្ត្រីក្រសួងហិរញ្ញវត្ថុក្រិក លោក គ្រីសស្តូស ស្តៃគូរ៉ាស Christos Staïkuras ប្រទេសក្រិកអាចប្រមូលថវិកាចំណូល បានច្រើនជាងផ្នែកចំណាយ យ៉ាងហោចណាស់ក៏៨០០លានអឺរ៉ូ ដែរ គិតសម្រាប់ឆ្នាំ២០១៣ កន្លងមក។ ដោយឡែក ក្រសួងហិរញ្ញវត្ថុក្រិកមិនបានរាប់បញ្ចូលប្រាក់ដែលរដ្ឋចំណាយសម្រាប់បង់ការប្រាក់បំណុលក្នុងទឹកប្រាក់នេះទេ។

យោងតាមឯកសារក្រសួងហិរញ្ញវត្ថុ ថវិការដ្ឋក្រិកសម្រាប់រយៈពេល១២ខែ នៃឆ្នាំ២០១៣ បង្ហាញថា ក្រិកប្រមូលបានថវិកាផ្នែកចំណូលខ្ពស់ជាងផ្នែកចំណាយរហូតដល់៦៩១លានអឺរ៉ូ។ ហើយប្រសិនបើរាប់បញ្ចូលទឹកប្រាក់គណនេយ្យរដ្ឋបាលក្នុងស្រុកជាច្រើនកន្លែងទៀត នោះថវិកាចំណូលនេះ នឹងមានទឹកប្រាក់ហួសពីប្រាក់ចំណាយ រហូតដល់៨០០លានអឺរ៉ូឯណោះ។ ទឹកប្រាក់នេះ មានកម្រិតខ្ពស់បំផុត នៅអឺរ៉ុប។ ការដែលក្រិកអាចប្រមូលប្រាក់ចំណូល បានច្រើនជាងប្រាក់ចំណាយនេះ ក៏ដោយសារតែរដ្ឋក្រិកបានកាត់បន្ថយចំណាយគ្រប់ទិសទីទាំងអស់ដែរ។ ការកាត់បន្ថយចំណាយនេះ គឺជាទិសដៅចំបង ផ្នែកម៉ាក្រូសេដ្ឋកិច្ចឆ្នាំ២០១៣ ហើយក៏ជាលក្ខខណ្ឌ ដែលម្ចាស់បំណុលនានាបានដាក់កំហិតដល់ក្រិក ដើម្បីបន្ធូរបន្ថយប្រាក់បំណុលក្រិកផងដែរ។ យោងតាមការិយាល័យស្ថិតិអឺរ៉ុប ឈ្មោះថា អឺរ៉ូស្តាត ប្រាក់បំណុលក្រិកឆ្នាំ២០១៣ កន្លងមក មានដល់ទៅ១៧៥ភាគរយ នៃផលិតផលក្នុងស្រុកសរុប ឯណោះ។

ជាងមួយទសវត្សហើយ ដែលក្រិកមិនបានទទួលប្រាក់ចំណូលបានខ្ពស់ជាងប្រាក់ចំណាយបែបនេះ។ ក្រិកបានយកសេចក្តីសំរេចនានា ចេញមកពីជំនួបកំពូលអឺរ៉ុប ខែវិច្ឆិកា ឆ្នាំ២០១២ ធ្វើជាមូលដ្ឋាន។ រដ្ឋក្រិកសង្ឃឹមថា ម្ចាស់បំណុលខ្លួននានា អាចនឹងបន្ធូរបន្ថយការប្រាក់បំណុល ព្រមទាំងអាចពន្យារពេលវេលាសងបំណុលអោយក្រិកបន្ថែមទៀត។ ថ្វីបើក្រិកទើបតែចូលកាន់តំណែងជាប្រធានផ្លាស់វេនសហភាពអឺរ៉ុប។

រដ្ឋាភិបាលក្រុងអាថែន នៅតែប្រឈមនឹងវិបត្តិសេដ្ឋកិច្ច អត្រាជនគ្មានការងារធ្វើមាន២៧,៨ភាគរយ គិតក្នុងខែតុលាឆ្នាំ២០១៣កន្លងមក។ គិតពីឆ្នាំ២០១០មក ម្ចាស់បំណុលនានា ធ្លាប់បានផ្តល់២៤០ពាន់លានអឺរ៉ូ អោយរដ្ឋក្រិករួចមកហើយ តាមរយៈកម្មវិធីកំចីចំនួន២ ភ្ជាប់ជាមួយកម្មវិធីត្បិតត្បៀតថវិកាក្នុងស្រុកផងដែរ៕