កុមារដែលត្រូវគេរំលោភបំពានសិទ្ធិ អាចដាក់ពាក្យប្តឹងទៅអង្គការសហប្រជាជាតិដោយផ្ទាល់

កុមារហ្វីលីពីនកំពុងឈរតំរង់ជួរ រង់ចាំទទួលម្ហូបអាហារ បន្ទាប់ពីហ្វីលីពីនបានរងគ្រោះព្យុះសង្ឃរា កាលពីខែធ្នូ ឆ្នាំ២០១៣

នៅថ្ងៃអង្គារនេះ អង្គការសហប្រជាជាតិបានប្រកាសក្នុងសេចក្តីថ្លែងការណ៍របស់ខ្លួនមួយថា ចាប់ពីពេលនេះតទៅ កុមារទាំងឡាយណាដែលត្រូវគេរំលោភបំពានសិទ្ធិ អាចដាក់ពាក្យប្តឹងដោយផ្ទាល់ ទៅអង្គការសហប្រជាជាតិតែម្តង។ អង្គការសហប្រជាជាតិមានគណៈកម្មាធិការពិសេសមួយ ទទួលបន្ទុកកិច្ចការនេះ។

អង្គការសហប្រជាជាតិបានប្រកាស ក្នុងសេចក្តីថ្លែងការណ៍ខ្លួន នៅថ្ងៃអង្គារនេះថា កុមារដែលត្រូវគេរំលោភបំពានសិទ្ធិ អាចដាក់ពាក្យបណ្តឹង ដោយផ្ទាល់ ទៅគណៈកម្មការពិសេសអង្គការសហប្រជាជាតិតែម្តង។ គណៈកម្មាធិការពិសេសនេះ មានសមាជិក១៨នាក់ ទទួលបន្ទុកកិច្ចការនេះ។

ពិធីសារមិនចាំបាច់ ទី៣ ទាក់ទងនឹងអនុសញ្ញាអង្គការសហប្រជាជាតិ ស្តីពីសិទ្ធិកុមារ នឹងចូលជាធរមាននៅខែមេសា ខាងមុខនេះហើយ។ ពិធីសារនេះ រៀបចំបែបបទទំនាក់ទំនង និងការពារសិទ្ធិកុមារ ដោយសំរេចអោយមានការដាក់ពាក្យប្តឹង ករណីមានការរំលោភបំពានសិទ្ធិកុមារ។ យោងតាមខ្លឹមសារពិធីសារនេះ កុមារទាំងឡាយ ទោះជាកុមារនោះនៅម្នាក់ឯង រឺក៏មានគ្នាច្រើននាក់ ច្រើនក្រុមក្តី អាចនឹងដាក់ពាក្យប្តឹងផ្ទាល់ ទៅអង្គការសហប្រជាជាតិ ប្រសិនបើមានការរំលោភលើសិទ្ធិរបស់ពួកគេកើតឡើង។

ពោលគឺសំដៅលើករណីរំលោភដែលចែងក្នុងអនុសញ្ញា ស្តីពីសិទ្ធិកុមារ និងពិធីសារមិនចាំបាច់ចំនួន២របស់អង្គការសហប្រជាជាតិ ដែលបានចូលជាធរមានក្នុងពេលកន្លងមក។ ពិធីសារទាំង២នោះ គឺទី១-ពិធីសារស្តីពីកុមារក្នុងជម្លោះប្រដាប់អាវុធ និងទី២-ពិធីសារស្តីពីការលក់ដូរកុមារ ការធ្វើពេស្យាចារលើកុមារ និងការអោយកុមារធ្វើសកម្មភាពអាសអាភាស។

ករណីមានកុមារ រឺក្រុមកុមារ ដាក់ពាក្យប្តឹងប្រឆាំងការសងសឹកណាមួយ គណៈកម្មាធិការអង្គការសហប្រជាជាតិទទួលបន្ទុកកិច្ចការនេះ នឹងចាត់វិធានការការពារកុមាររូបនោះ រឺក៏ការពារក្រុមកុមារទាំងនោះ ដោយសុំអោយរដ្ឋាភិបាលប្រទេសរបស់កុមារ ចាត់វិធានការបណ្តោះអាសន្ន ដើម្បីការពារកុមារ រឺក៏ក្រុមកុមារនោះ។ ហើយករណីប្រទេសរបស់កុមារ ដែលបានដាក់ពាក្យប្តឹង ត្រូវបានជាប់សង្ស័យថា រំលោភអនុសញ្ញាទាក់ទងសិទ្ធិកុមារនេះ គណៈកម្មាធិការអង្គការសហប្រជាជាតិ នឹងចេញអនុសាសន៍តំរូវអោយរដ្ឋាភិបាលនោះ គោរពអនុវត្តតាមដោយខានមិនបាន។

ពិធីសារមិនចាំបាច់ស្តីពីការដាក់ពាក្យប្តឹងរបស់កុមារនេះ ត្រូវមហាសន្និបាតអង្គការសហប្រជាជាតិ អនុម័ត កាលពីខែធ្នូ ឆ្នាំ២០១១។ កន្លងមក ប្រទេសចំនួន៩ មាន ថៃ អាល្លឺម៉ង់ អាល់បានី បូលីវី អេស្ប៉ាញ ហ្កាបុង ម៉ុងតេណេហ្ក្រូ ពរទុយហ្កាល់ និងស្លូវ៉ាគី បានអនុម័ត ពិធីសារនេះរួចមកហើយ។ នៅថ្ងៃអង្គារនេះ កូស្តារីកា ក្លាយជាប្រទេសទី១០ ដែលចុះហត្ថលេខាអនុម័តពិធីសារនេះ ជាលក្ខខណ្ឌធ្វើអោយពិធីសារទាក់ទងសិទ្ធិកុមារនេះ ចូលជាធរមាន៕