មេដឹកនាំពិភពលោកកំពុងគោរពវិញ្ញាណក្ខន្ធ និងសម្តែងការសោកសង្រែកចំពោះវីរបុរសអាហ្វ្រិកខាងត្បូង លោក Nelson Mandela ដែលបានទទួលមរណភាព កាលពីព្រហស្បតិ៍ម្សិលមិញ ក្នុងជន្មាយុ៩៥ឆ្នាំ។ មេដឹកនាំពិភពលោកទាំងអស់ រួមទាំងអគ្គលេខាធិការអង្គការ សហប្រជាជាតិ
មេដឹកនាំអាមេរិក បារាំង និងអង់គ្លេស រួមទាំងប្រទេសដទៃទៀត មានប្រតិកម្មផ្សេងៗគ្នាចំពោះវីរភាពរបស់លោក Mandela។មេដឹកនាំពិភពលោកបានលើកតម្លៃវីរភាពវីរបុរសអាហ្វ្រិកខាងត្បូង លោក Nelson Mandela ផ្សេងៗគ្នា។ អគ្គលេខាធិការអង្គការសហប្រជាជាតិ លោក បាន គីមូន បានហៅលោក Nelson Mandela ថាជាបិតាយុត្តិធម៌ ជាអ្នកស្វែងរកវីរភាព សន្តិភាពសម្រាប់មនុស្សជាតិ។ ចំណែកប្រធានាធិបតីអាមេរិក លោក បារ៉ាក់ អូបាម៉ាវិញ បាននិយាយថា លោក វីរបុរសអាហ្វ្រិកខាងត្បូងរូបនេះ គឺជាតំណាងនៃការផ្លាស់ប្តូរប្រកបដោយវឌ្ឍនភាព។ មេដឹកនាំអាមេរិកបានគូសបញ្ជាក់ថា ពិភពលោកបានបាត់បង់វីរបុរសដ៏មានឥទ្ធិពលម្នាក់ដែលបានលះបង់ចំពោះមនុស្សជាតិ និងពិភពលោកទាំងមូល។នាយករដ្ឋមន្ត្រីអង់គ្លេស លោក David Cameron ក៏មិនបានបង្អង់ក្នុងការលើកសរសើរលោក Nelson Mandela ទេ។ នាយករដ្ឋមន្ត្រីរូបនេះ បានលើកឡើងថាការស្លាប់របស់អតីតប្រធានាធិបតីអាហ្វ្រិកខាងត្បូងនេះ គឺជាបាត់បង់ពន្លឺសម្រាប់ពិភពលោក។ ហើយថា លោក Nelson Mandela គឺជាវីរបុរសសម្រាប់មនុស្សទាំងអស់គ្នា។ សម្រាប់សភាអាហ្រ្វិក ការស្លាប់របស់វីរបុរស Mandelaគឺជាការបាត់បង់វីរបុរសនៃសន្តិភាព យុត្តិធម៌ សមធម៌។ ហើយថា មួយជីវិតរបស់លោក Nelson Mandela គឺជំរុញឱ្យមានការអភិវឌ្ឍ ដើម្បីឈានទៅរកការបញ្ចប់ភាពអត់ឃ្លាន និងភាពក្រីក្រ។បុព្វជិតសាសនា Desmond Tutu ដែលជាជ័យលាភីសន្តិភាពពិភពលោកឆ្នាំ១៩៨៤វិញ បានលើកឡើងថាមិនដែលមានទេក្នុងប្រវត្តិសាស្ត្រ ដូចលោកNelson Mandela នេះ ដែលបានហ៊ានពលីអាយុជីវិតប្រឆាំងនឹងរបបយង់ឃ្នង អាប៉ាថេត(apartheid) ។ ហើយបានដឹកនាំប្រជាជាតិអាហ្វ្រិកខាងត្បូងចេញពីរបបខ្មៅងងឹង មកកាន់យុគសម័យថ្មី។
ពាក្យមួយម៉ាត់របស់មេដឹកនាំនយោបាយពិភពលោកចំពោះ លោក Nelson Mandela ថាអតីតប្រធានាធិបតីអាហ្វ្រិកខាងត្បូងរូបនេះ ជាពន្លឺនៃក្តីសង្ឃឹមសម្រាប់ប្រទេសដែលហែកហួរដោយសារអំពើហិង្សា៕សម្រាប់លោកប្រធានាធិបតីអាហ្រ្វិកខាងត្បូង ហ្សាក់កូប ហ្ស៊ូម៉ា ការបាត់បង់លោក Nelson Mandela ប្រៀបបាននឹងការដែលជាតិអាហ្រ្វិកខាងត្បូងបានបាត់បង់កូនប្រុសម្នាក់ដ៏ចំណាន។
Labels:
ព័ត៌មានអន្តរជាតិ
Previous Article
