បារាំងចូលសមរភូមិមុខធ្វើប្រតិបត្តិការយោធាសង្គ្រោះអាហ្វ្រិកកណ្តាល

កងទ័ពប្រមាណ១២០០នាក់ នឹងត្រូវប្រមូលបញ្ជួនផ្តុំគ្នាទៅធ្វើប្រតិបត្តិការ Sangari នៅអាហ្វ្រិកកណ្តាល។ បេសកកម្មនេះមានកម្មវត្ថុនាំសន្តិសុខមកឱ្យអាហ្វ្រិកកណ្តាល ដែលកំពុងរងការកាប់សម្លាប់សងសឹកគ្នាយ៉ាងអនាណាថា។ រដ្ឋធានី បង់ហ្គី ទើបឆ្លងកាត់រលកហិង្សាពុំធ្លាប់មាន។

ប្រឈមមុខននឹងស្ថានភាព ស្ទើរក្លាយទៅជាការប្រល័យពូជសាសន៍គ្នាដូច្នេះ ក្រុមប្រឹក្សាសន្តិសុខអង្គការសហប្រជាជាតិ បានចេញសម្រេចចិត្ត យល់ព្រមអនុញ្ញាតឱ្យបារាំងប្រើទ័ពជួយពង្រឹងសន្តិសុខ។នៅពេលនេះទាហានបារាំង មានគ្នាសរុប ៦៥០នាក់ ឈរជើងនៅបង់ហ្គី ដោយយកអាកាសយានដ្ឋាន Mpoko ធ្វើជាមូលដ្ឋានទ័ព។ ទ័ពជំនួយបន្ថែម ២០០នាក់ទើបតែនឹងទៅដល់អាហ្វ្រិកកណ្តាល កាលពីចុងសប្តាហ៍មុននេះ ដែលសុទ្ធសឹងជាទ័ពអាកាស ទ័ពទឹកជញ្ជូនពស្តុភារ និងធ្វើជាម្ចាស់ផ្ទះចាំទទួលកម្លាំងមកពីប្រតិបត្តិការ Sangari។

ប្រតិបត្តិការ សង់ហ្ការី នេះ បានប្រមូលផ្តុំទាហានបារាំងពីគ្រប់ទិសទី ក្នុងទ្វីបអាហ្វ្រិក មកជុំគ្នា នៅអាហ្វ្រិកកណ្តាល ៖ មួយភាគមកពីប្រទេសឆាដ ដែលជាមូលដ្ឋានទ័ពជើងអាកាស មួយភាគទៀតមកពីប្រទេសកាមឺរ៉ូន។ កងប្រតិបត្តិការនេះ នឹងត្រូវចែកជាពីរក្រុម មួយជាអ្នកចាត់ចែងដឹកនាំ និងមួយក្រុមទៀតជាកងចល័ត បំពាក់ដោយរថពាសដែក ធ្វើសកម្មភាពខ្លាំង និងជាក្រុមទីមួយ ដែលបានចូលទៅដល់ប្រទេសអាហ្វ្រិកកណ្តាល ដោយថ្មើរជើង ស្របតាំងព្រំដែនខាងលិចប្រទេស។

លោក ហ្សង់អ៊ីវ ឡឺទ្រីយ៉ង់ រដ្ឋមន្ត្រីក្រសួងការពារជាតិបារាំង 

“ទាហានបារាំងកំពុងស្ថិតនៅអាកាសយានដ្ឋាន ក្នុងបេសកកម្ម មានកំរិត គឺរក្សាសន្តិសុខវាលយន្តហោះ និង ដើម្បីការពារជនជាតិបារាំងរស់នៅទីនោះ សង្កាត់ពាណិជ្ជកម្មនយោបាយ ដូចជាស្ថានទូតបរទេស ឬសង្កាត់ដែលមានមនុស្សរស់នៅផ្តុំគ្នាច្រើន។ នៅយប់ម្សិលមិញ កងកម្លាំងបានធ្វើល្បាតពេញរដ្ឋធានី។ ស្ថានការណ៍ក៏បានស្ងប់ស្ងាត់។ ថ្ងៃនេះយើងរង់ចាំការមកដល់នៃកងកម្លាំងអាហ្វ្រិកផ្សេងៗទៀតដែលនឹងត្រូវមកសហការជាមួយទ័ពបារាំង។”

ពីពេលនេះ កងពលមួយក្រុមផ្សេងទៀត នឹងចេញធ្វើសកម្មភាព ដោយមានខ្លះជាកម្មុងដូពិសេស ដែលមានទម្លាប់ជាទ័ពប្រយុទ្ធជើងមុខ វាយប្រហារចំណុចក្តៅៗ បើកផ្លូវមុនគេ។ ហើយដើម្បីគ្រប់គ្រងស្ថានការណ៍ពេញឱ្យបានទូលំទូលាយក្នុងផ្ទៃប្រទេស ទាហានបារាំងក៏មានដាក់ពង្រាយនៅក្រៅរដ្ឋធានីដែរ។

► សូមអាន ៖ ទាហានបារាំងជាងមួយពាន់នាក់នឹងត្រូវដាក់ពង្រាយនៅសាធារណរដ្ឋអាហ្វ្រិកកណ្តាល

បេសកកម្មបារាំងនេះ បានប្រែប្រួល ទៅតាមសភាពការណ៍ នាពេលប៉ុន្មានម៉ោងចុងក្រោយនេះ។ ពីមុន ក្នុងពេលរង់ចាំសេចក្តីសម្រេចចិត្តរបស់អង្កការសហប្រជាជាតិ បារាំងនិយាយអំពី ការជួយពង្រឹងកម្លាំងកងទ័ពអាហ្វ្រិកមួកខៀវ។ ប៉ុន្តែការកាប់សម្លាប់ សងសឹកគ្នាបានរាលដាលដល់រដ្ឋធានី បានរុញច្រានបេសកកម្មបារាំងឱ្យឈរជួរមុខ។

ឆ្លើយនឹងសំណួរថា ពេលនេះបារាំងកំពុងជាប់សង្គ្រាមពីរនៅអាហ្វ្រិក ម៉ាលី និងអាហ្វ្រិកកណ្តាល ? មិនមែនទេ ប្រតិបត្តិការនៅ សាធារណរដ្ឋអាហ្វ្រិកកណ្តាល មានលក្ខណៈខុសពីនៅប្រទេសម៉ាលី។ លោក ហ្វ្រង់ស័រហូឡង់

“បេសកកម្មនៅអាហ្វ្រិកកណ្តាល ថ្ងៃនេះ ខុសពីនៅម៉ាលី បារាំងទៅធ្វើប្រតិបត្តិការដើម្បីបញ្ចៀសមហន្តរាយមនុស្សជាតិ។ ខ្ញុំមានទំនុកចិត្តទាំងស្រុងលើកងទាហានបារាំង ក្នុងបេសកកម្មនេះ ដែលជាអន្តរាគមន៍លឿន ខ្លី និងដែលគ្មានហេតុផលអ្វីត្រូវអូសបន្លាយយូរទេ។ ខ្ញុំជឿជាក់ថានឹងមានជោគជ័យ។”

►សូមអាន ៖ ស្ថានការណ៍សាធារណរដ្ឋអាហ្វ្រិកកណ្តាលឡើងដល់ក្រុមប្រឹក្សាសន្តិសុខអង្គការសហប្រជាជាតិ

សូមបញ្ជាក់ថា កាលពីខែមករាឆ្នាំ២០១២ បារាំងបានបញ្ជូនកម្លាំងបន្ទាន់ទៅសង្គ្រោះម៉ាលី ដោយត្រូវធ្វើសង្គ្រាមកម្ចាត់ពួកភេរវជនអ៊ីស្លាមជ្រុលនិយម និងបណ្តេញពួកនេះពីភាគខាងជើងម៉ាលី។ បន្ទាប់មកទើបមានទ័ពអាហ្វ្រិក និងទ័ពមួកខៀវអង្គការសហប្រជាជាតិមកបន្តបេសកកម្ម។ ប្រតិបត្តិការដែលនៅតែអូសបន្លាយរហូតមកទល់ពេលនេះ មិនដឹងថាថ្ងៃណានឹងអាចបញ្ចប់បានទេ។ ចំណែកនៅសាធារណរដ្ឋអាហ្វ្រិកកណ្តាលវិញ ប្រតិបត្តិការបារាំងមានរូបភាពផ្សេង។ ប៉ារីសនិយាយពីអន្តរាគមន៍រក្សាសន្តិសុខប្រជាជនស៊ីវិល។ ហើយគ្មានសត្រូវ ត្រូវវាយប្រហារច្បាស់លាស់ទេ មិនដឹងថាជា ពួកឧទ្ទាមសេឡេកា ដែលជួយជ្រោមជ្រែងប្រធានាធិបតី ឱ្យកាន់អំណាចបច្ចុប្បន្ន ឬជាក្រុមប្រដាប់អាវុធ ក្រុមស្វ័យកាពារ។ ក្រុមទាំងអស់នេះបានបង្កអសន្តិសុខ និងភាពភ័យខ្លាចដល់ប្រជាជន នៅភូមិនេះចំពោះអ្នកកាន់សាសនាគ្រិស្ត ឬនៅភូមិនោះចំពោះអ្នកកាន់សាសនាអ៊ីស្លាម៕