ការបើកប្រាក់ខែមន្ត្រីរាជការតាមរយៈធនាគារមិនគ្រប់គ្រាន់សម្រាប់ទប់ស្កាត់ការចាយវាយថវិការដ្ឋលើមន្ត្រីរាជការដែលមានតែឈ្មោះនោះឡើយ។
បុគ្គលិកមន្ត្រីរាជការនៅតាមស្ថាប័នក្រសួងមួយចំនួនក្នុងប្រទេសកម្ពុជាទំនងជាអាចចាប់ផ្តើមបើកប្រាក់ខែរបស់ខ្លួនតាមរយៈធនាគារនៅដើមឆ្នាំ ២០១៤តទៅ។ នេះបើតាមការឲ្យដឹងរបស់មន្ត្រីរដ្ឋាភិបាល។
ថ្លែងក្នុងឱកាសនៃការបើកសន្និសីទជាតិស្តីពីការរៀបចំគោលនយោបាយផែនការសកម្មភាព និងថវិកា ដែលធ្វើឡើងនៅក្រសួងមហាផ្ទៃកាលពីព្រឹកមិញនេះ លោក ពេជ្រ ប៊ុនធិន រដ្ឋមន្ត្រី ក្រសួងមុខងារសាធារណៈបានឲ្យដឹងថាក្រសួងបាន និងកំពុងរៀបចំ ធ្វើការលើគម្រោងនៃបើកប្រាក់ខែដល់មន្ត្រីរាជការតាមរយៈធនាគារ។
លោកបន្តថាធ្វើបែបនេះដើម្បីឲ្យក្រសួងអាចមានលទ្ធភាពនិងងាយស្រួលក្នុងការត្រួតពិនិត្យមើលចំនួនមន្រី្តរាជការពិតប្រាកដ ដើម្បីឈានដល់ការបើកប្រាក់ខែត្រឹមត្រូវ។
លោកបញ្ជាក់ថា រដ្ឋាភិបាលអាចកាត់បន្ថយការខាតបង់ប្រាក់បើកប្រាក់ខែឲ្យមន្ត្រីឬក្រុមបុគ្គលិករដ្ឋដែលមានតែឈ្មោះបើកប្រាក់ខែតែមិនដែលធ្វើការ ឬគេនិយមហៅថាមន្ត្រីរាជការខ្មោច។
«ពីខែមួយនេះទៅមានក្រសួងខ្លះនឹងចាប់ផ្តើមបើកប្រាក់ខែតាមប្រព័ន្ធធនាគារហើយ។យើងអាចគ្រប់គ្រងបញ្ហាបុគ្គលិកខ្មោចបាន។ យើងនឹងស្រាវជ្រាវបញ្ហានេះ ប្រសិនបើអ្នកដែលមានតែឈ្មោះយើងបើកតាមធនាគារនេះយើងអាចកាត់បន្ថយឬលុបបាន។»
លោកបន្តថាក្រសួង៣សំខាន់ៗដែលនឹងចាប់អនុវត្តកម្មវិធីនេះ គឺក្រសួងមុខងារសាធារណៈ ក្រសួងអប់រំ និងក្រសួងសេដ្ឋកិច្ចនិងហិរញ្ញវត្ថុ។ ហើយក្រសួងនីមួយៗអាចមានសិទ្ធិក្នុងការជ្រើសរើសយកធនាគារដែលជាដៃគូររៀងៗខ្លួន។
«មានក្រសួងគេផ្សេងៗគេអាចជ្រើសរើសក្រសួងណាក៏បានដែរ។»
លោក កែម ឡី អ្នកវិភាគសង្គមឯករាជ្យលើកឡើងថា លោកអបអរសាទរចំពោះគម្រោងរបស់ ក្រសួង ដែលថានឹងចាប់បើកប្រាក់ខែដល់មន្ត្រីរាជការតាមរយៈធនាគារ ដោយហេតុថាមន្ត្រីរាជការអាចនឹងទទួលបានប្រាក់ខែតាមពេលវេលាទៀងទាត់រៀងរាល់ខែ។ ក៏ប៉ុន្តែក្រសួងស្ថាប័នត្រូវតែធ្វើយ៉ាងណាពន្លឿនដំណើរការ ដូចជាការផ្តល់ព័ត៌មានថ្មីអំពីចំនួនបុគ្គលិក បុគ្គលិកដែលត្រូវបានប្រាក់បន្ថែម ជាដើមនោះទៅឲ្យទាន់ពេលវេលាដល់ធនាគារ។
«ប្រាក់ខែពីមួយខែទៅមួយខែមានការប្រែប្រួល វាមិននៅដដែល។»
លោកបន្ថែមទៀតថាស្ថាប័នមន្ត្រីប៉ូលិស ទាហាន និងកងអង្គរក្សជាកន្លែងដែលមានចំនួនបុគ្គលិកខ្មោចច្រើនជាងគេ។ អ្នកវិភាគរូបនេះបញ្ជាក់ផងដែរថាតាមទិន្នន័យដែលលោកទទួលបាន ចំនួនមន្ត្រីខ្មោចសរុបចាប់ពី ឆ្នាំ ១៩៩៨ រហូតដល់ឆ្នាំ ២០០៨ យ៉ាងហោចណាស់មានជាង ៣ម៉ឹននាក់។ លោកឲ្យដឹងទៀតថា ដើម្បីអាចឲ្យរដ្ឋាភិបាលកាត់បន្ថយថវិការដ្ឋដែលចាយវាយខ្ជះខ្ជាយ ទៅលើមន្ត្រីខ្មោចបានរដ្ឋាភិបាលចាំបាច់ត្រូវធ្វើជំរឿនមន្ត្រីរាជការ កងកម្លាំងប៉ូលិស ទាហាន និងកងអង្គរក្សជាមុនសិន។
«ដើម្បីគ្រប់គ្រងមន្ត្រីខ្មោចមិនមែនគ្រាន់តែរៀបចំបើកប្រាក់ខែតាមធនាគារហ្នឹងគ្រប់គ្រាន់ទេ។ យើងត្រូវធ្វើជំរឿនមន្ត្រីរាជការ មន្ត្រីប៉ូលិស អង្គរក្សឲ្យបានត្រឹមត្រូវ។»
លោក កែម ឡីបញ្ជាក់ទៀតផងដែរថា ប្រសិនបើរដ្ឋាភិបាលអាចកាត់បន្ថយ ឬលុបបំបាត់ការចំណាយថវិកាជាតិលើមន្ត្រីរាជការខ្មោចបាននោះ រដ្ឋនឹងជាមានលទ្ធភាពគ្រប់គ្រាន់ដំឡើងប្រាក់ខែដល់មន្ត្រីរាជការ និងគ្រូបង្រៀនយ៉ាងតិច ៥០០ ដុល្លារសហរដ្ឋអាម៉េរិក ស្នើនឹង ២លានរៀល៕
ប្រភព ABC Radio Australia
Labels:
ទស្សនៈសារព័ត៌មាន
Previous Article
