មជ្ឈមណ្ឌលសិទ្ធមនុស្សកម្ពុជាធ្វើការបំភ្លឺការចោទរបស់ខ្លួន

មជ្ឈមណ្ឌលសិទ្ធមនុស្សកម្ពុជាដែលហៅកាត់ថា CCHR បានអះអាងថាខ្លួនដឹងពីប្រវត្តិរបស់ពាក្យថា យួន ហើយបន្តអះអាងថាការប្រើពាក្យនេះរបស់ថ្នាក់ដឹកនាំគណបក្ស សង្គ្រោះជាតិកាលពីថ្ងៃទី ១០ ធ្នូ គឺមានលក្ខណៈប្រកាន់ពូជសាន៍។សូមរំលឹកថា កាលពីថ្ងៃទី ១២ ធ្នូ មជ្ឈមណ្ឌលសិទ្ធមនុស្សកម្ពុជា បានចេញលិខិតចំហមួយស្តីពីការប្រើភាសាដែលមានលក្ខណៈប្រកាន់ពូជសាសន៍របស់
លោក សម រង្ស៊ី ប្រធានគណបក្សសង្គ្រោះជាតិ ជាពិសេសការប្រើពាក្យថា យួន របស់លោក សម រង្ស៊ី ដើម្បីសំដៅដល់ជនអន្តោប្រវេសន៍វៀតណាមនៅកម្ពុជា ដែលជាពាក្យមួយ មជ្ឈមណ្ឌលសិទ្ធមនុស្សយល់ថាមានន័យមាក់ងាយនិងបន្តុះបង្អាប់។

ក្រោយការផ្សាយលិខិតនេះ មជ្ឈមណ្ឌលសិទ្ធមនុស្សកម្ពុជា បានទទួលការរិះគន់ជាខ្លាំង ទាំងតាមប្រព័ន្ធ អ៊ីម៉ែល និងបណ្តាញសង្គមដែលសុទ្ធតែបកស្រាយថា ពាក្យ យួន គឺគ្មានន័យមាក់ងាយនិងបន្តុះបង្អាប់ទេ។

លិខិតប្រកាសព័ត៌មានរបស់មជ្ឈមណ្ឌលសិទ្ធមនុស្សកម្ពុជា ចុះថ្ងៃទី ១៨ ធ្នូ បញ្ជាក់ថា ទោះជា យួន មានន័យមាក់ងាយឬគ្មាននោះ វាជាបញ្ហាបន្ទាប់បន្សំទេ។ បញ្ហាសំខាន់គឺអ្នកដឹកនាំក្នុងឆាកនយោបាយបានធ្វើការបែងចែកប្រកាន់បក្សពួកនិងបានរិះគន់ជនជាតិវៀតណាមដោយផ្ទាល់និងដោយប្រយោល។

ក្នុងលិខិតដដែលនេះ លោក អ៊ូ វីរៈ ប្រធានមជ្ឈមណ្ឌលសិទ្ធមនុស្សកម្ពុជាបានបង្ហាញនួវជំហរដដែលឥតប្រែប្រួលឡើយទាក់ទងទៅនឹងការរិះគន់របស់លោកចំពោះការប្រើពាក្យយួន។ លោកថា ការបន្ទោសជនជាតិវៀតណាមពីបញ្ហារបស់សង្គមកម្ពុជា គឺជារឿងគ្រោះថ្នាក់និងខាតពេលវេលា។ លោកបន្ថែមទៀតថា ក្នុងនាមជាអង្គការឯករាជ មជ្ឈមណ្ឌលសិទ្ធមនុស្សកម្ពុជាត្រូវតែនិយាយចេញពីការបំពានសិទ្ធមនុស្សមិនថាពីសំណាក់រដ្ឋាភិបាល ឬគណបក្សប្រឆាំងនោះទេ។

លោកថា គ្រប់បក្សទាំងអស់ និងអ្នកមានមុខមានមាត់ គួរប្រើប្រាស់ភាសាដោយមានការទទួលខុសត្រូវ ហើយមិនត្រូវប្រើភាសាដែលញុះញង់បង្កឲ្យមានការជម្លោះនោះទេ៕