សិក្ខាសាលាថ្នាក់ខេត្តស្តីពីការតាំងពិព័រណ៍ផលិតផលកសិករឆ្នាំ២០១៣នៅខេត្តសៀមរាប

អង្គការសេដាក សហការជាមួយអង្គការភ្លែនអន្តរជាតិកម្ពុជា បានរៀបចំសិក្ខាសាលាមួយ ស្តីពីការតាំងពិព័រណ៍ផលិតផលកសិករឆ្នាំ២០១៣ នៅខេត្តសៀមរាប ដែលមានរយៈពេល២ថ្ងៃគឺនៅថ្ងៃទី១៩ និងថ្ងៃទី២០ ខែធ្នូនេះ ក្នុងគោលបំណងផ្សព្វផ្សាយនូវផលិតផលជាអង្ករ និង បន្លែគ្មានសារធាតុគីមី ក្រោមប្រធានបទ ផលិតផលខ្ញុំ គ្រួសារខ្ញុំ និង សុខភាពខ្ញុំ។
លោក សម វិទូ នាយកកម្មវិធីអង្គការសេដាក បានមានប្រសាសន៍ថា សិក្ខាសាលានេះ ពិតជាមានសារៈសំខាន់ណាស់សម្រាប់កសិករ ជាពិសេសចំពោះអ្នកបរិភោគទាំងអស់ ឲ្យមានការយល់ដឹងដែលទាក់ទងទៅនឹងសុខភាពលើការប្រើប្រាស់ផលិតផលសរីរាង្គ ខណៈពេលដែលបច្ចុប្បន្ននេះ មានផលិតផលដូចជាអង្ករ និងបន្លែនាំចូលមួយចំនួន ពិតជាមានសារធាតុគីមី ដែលធ្វើឲ្យប៉ះពាល់ដល់សុខភាពអ្នកប្រើប្រាស់ដោយមិនដឹងខ្លួន។

(សំឡេង លោក សម វិទូ)

លោកបានមានប្រសាសន៍បញ្ជាក់ទៀតថា បច្ចុប្បន្ននេះ អ្នកប្រើប្រាស់ភាគច្រើនមានការយល់ដឹងទៅលើការបរិភោគផលិតផលសរីរាង្គនេះ ដូច្នេះធ្វើឲ្យផលិតផលនេះ កំពុងមានតម្រូវការខ្ពស់នៅលើទីផ្សារ ប៉ុន្តែអ្វីដែលកំពុងប្រឈមនោះ គឺការយល់ដឹងអំពីបញ្ហាបច្ចេកទេសរបស់អ្នកផលិតនៅមានកម្រិត។

(សំឡេង លោក សម វិទូ)

ពាក់ព័ន្ធនឹងបញ្ហានេះ លោកស្រី ពេជ្រ សុផារី ប្រធានអង្គការភ្លែនអន្តរជាតិកម្ពុជាប្រចាំខេត្តសៀមរាបបានអះអាងថា តាមរយៈនៃការបង្កបង្កើតផលិតផលសរីរាង្គនេះ បានធ្វើឲ្យស្ថានភាពជីវភាពរបស់កសិករអ្នកផលិតមានការរីកចម្រើនច្រើនបើប្រៀបធៀបទៅនឹងពេលមុន។

លោកស្រី ឯម ផលាមុនី អភិបាលរងខេត្តសៀមរាប បានសម្តែងនូវការគាំទ្រចំពោះកម្មវិធីនេះ ពីព្រោះវាជាផ្នែកមួយយ៉ាងសំខាន់ក្នុងផ្សព្វផ្សាយដល់អ្នកប្រើប្រាស់កាន់តែយល់ដឹងទៅលើសុខភាពរបស់ខ្លួន ប៉ុន្តែសំខាន់គឺអ្នកផលិតទាំងអស់ត្រូវតែមានការយល់ដឹងឲ្យបានខ្ពស់អំពីបច្ចេកទេស។

(សំឡេង លោកស្រី ឯម ផលាមុនី)

សូមបញ្ជាក់ថា កម្មវិធីផលិតផលសរីរាង្គនៅក្នុងខេត្តសៀមរាប បានអនុវត្តនៅស្រុកចំនួន៤ រួមមានស្រុកអង្គរជុំ , អង្គរធំ , បន្ទាយស្រី និង ស្រុកស្រីស្នំ ដែលមានក្រុមចំនួន១៣៣ក្រុម៕