អ្នកគាំទ្រសិទ្ធិមនុស្សសុំឲ្យរដ្ឋាភិបាលខ្មែរបិទមន្ទីរឃុំឃាំង៨កន្លែង

អ្នកគាំទ្រសិទ្ធិមនុស្សកំពុងតែស្នើសុំឲ្យរដ្ឋាភិបាលខ្មែរបិទជាបន្ទាន់នូវមណ្ឌលឃុំឃាំងចំនួន៨កន្លែង ដោយចោទថា អ្នកទោសនៅក្នុងមណ្ឌលទាំងនោះកំពុងតែរងអំពើទារុណកម្ម។

អង្គការ Human Rights Watch បានដាក់ចេញនូវរបាយការណ៍មួយ ស្ដីពីបទពិសោធន៍របស់ទណ្ឌិត ដែលបានរៀបរាប់អំពីការវាយដំដោយប្រើទុយយោទឹកជ័រ និងដំបង ឬមែកឈើជាដើម។

របាយការណ៍នោះនិយាយថា ស្រ្តីអ្នកទោសមួយចំនួនបានចោទអំពីការបំពារបំពានផ្លូវភេទ ពីសំណាក់បុរសអ្នកយាម។

លោក Joseph Amon នាយកផ្នែកសិទ្ធិមនុស្សនិងសុខភាពនៃអង្គការ Human Rights Watch និយាយថា ទណ្ឌិតកំពុងជាប់ឃុំ ដោយពុំមានការកាត់ទោស ហើយជាទូទៅភាគច្រើននៃជនដែលជាប់ឃុំ គឺជាអ្នកប្រើគ្រឿងញៀន និងក្រុមមនុស្សឯទៀត ដែលរដ្ឋាភិបាលយល់ឃើញថាជាក្រុមដែលគេមិនចង់ឲ្យមាននៅក្នុងសង្គម មានដូចជាអ្នកសុំទាន និងអ្នកប្រព្រឹត្តរបរផ្លូវភេទជាដើម៕

ប្រភព ABC Radio Australia