សេវាសុខភាពផ្លូវចិត្តអូស្រ្តាលីកំពុងតែរកវិធីដោះស្រាយនឹងការញៀនអ៊ិនធើរណិតនិងកុំព្យូទ័រហ្គេម

ស្ថាប័នផ្ដល់សេវាសុខភាពផ្លូវចិត្តនៅប្រទេសអូស្រ្តាលីរាយការណ៍អំពីការកើនឡើងនៃចំនួនយុវវ័យដែលស្វែងសុំជំនួយដើម្បីដោះស្រាយបញ្ហាញៀនអ៊ិនធើរណិតនិងកុំព្យូទ័រហ្គេម។ការមានទូរសព្ទទំនើបឬ Smartphone នៅក្នុងចំណោមយុវវ័យអាយុពី១៤ ទៅ១៧ឆ្នាំ មានន័យថា ការប្រើអ៊ិនធើរណិតគឺងាយស្រួលជាងពេលមុនៗឆ្ងាយណាស់។

យ៉ាងណាមិញ ការផ្ដាច់ខ្លួនចេញពីបណ្ដាញសង្គម និងកុំព្យូទ័រហ្គេម គឺមានការលំបាកខ្លាំងឡើងៗសម្រាប់ជនវ័យជំទង់មួយចំនួន។

អ្នកស្រី Cate Sinclair មកពីអង្គការ Cornerstone Youth Services និយាយថា យុវវ័យភាគច្រើនកំពុងតែស្វែងសុំការព្យាបាលបញ្ហាពាក់ព័ន្ធនឹងការញៀនអ៊ិនធើរណិត។

វេជ្ជបណ្ឌិត Philip Tam ដែលជាវេជ្ជបណ្ឌិតម្នាក់ក្នុងចំណោមអ្នកឯកទេសខាងព្យាបាលការញៀនអ៊ិនធើរណិតនិយាយថា បញ្ហានេះទាមទារនូវការយកចិត្តទុកដាក់ជាចាំបាច់ពីសំណាក់សាលារៀន ក្រុមគ្រួសារនិងក្រុមប្រឹក្សាមាតាបិតា។

រដ្ឋាភិបាលអូស្រ្តាលីនិយាយថា ខ្លួនផ្ដល់ថវិកាទៅមជ្ឈមណ្ឌល Headspace ដើម្បីផ្ដល់ការប្រឹក្សាសម្រាប់បញ្ហាញៀនដោយរួមទាំងការញៀនអ៊ិនធើរណិតផងដែរ៕