រដ្ឋាភិបាលលើកយកវិស័យធំៗមួយចំនួនសម្រាប់ធ្វើជាយុទ្ធសាស្ត្រអភិវឌ្ឍន៍ជាតិ៥ឆ្នាំដល់ឆ្នាំ២០១៨

នៅព្រឹកថ្ងៃទី៩ ធ្នូ នេះមន្ត្រីក្រសួងផែនការបានដឹកនាំកិច្ចពិភាក្សាមួយមន្ត្រីមកពី អន្តរក្រសួងដើម្បីឈានទៅបញ្ចប់សេចក្តីព្រាងផែនការយុទ្ធសាស្ត្រ អភិវឌ្ឍន៍ជាតិ ៥ឆ្នាំ ពីឆ្នាំ ២០១៤ ដល់ឆ្នាំ២០១៨។

រដ្ឋាភិបាលបានលើកយកវិស័យកសិកម្ម ឧស្សាហកម្ម វិស័យសេវាកម្ម ទេសចរណ៍ អប់រំ បរិស្ថាន និងសុខាភិបាល ធ្វើជាមូលដ្ឋាន ដើម្បីអភិវឌ្ឍន៍ជាតិ ក្នុងរយៈពេល៥ឆ្នាំទៅមុខ។

លោក ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ បានមានប្រសាសន៍ថា ផែនការយុទ្ធសាស្ត្រនេះ បានក្តោមទិសដៅក្នុងការអភិវឌ្ឍជាតិ សម្រាប់៥ឆ្នាំដល់ឆ្នាំ២០១។

លោកបានបញ្ជាក់ថា ផែនការជាតិនេះ បានកំណត់ទិសដៅអភិវឌ្ឍន៍ជាតិទាំងមូល លើគ្រប់វិស័យ។

(សំឡេង លោក ឆាយ ថន )

យោងតាមផែនការនេះ បានបង្ហាញថា រដ្ឋាភិបាលបានកាត់បន្ថយភាពក្រីក្រពី៤០ភាគរយ កាលពីឆ្នាំ១៩៩០ ឲ្យមកនៅត្រឹមក្រោម២០ភាគរយនៅឆ្នាំ២០១២។

ចំណូលប្រជាពលរដ្ឋ បានកើនឡើងពី២០០ដុល្លារក្នុង១ឆ្នាំកាលពីឆ្នាំ២០០០ ឲ្យឡើងដល់ប្រមាណ១០០០ដុល្លារ នៅឆ្នាំ២០១។

លោក ញ៉ែម បុញ្ញាឬទ្ធិ អ្នកនាំពាក្យគណបក្សសង្គ្រោះជាតិ បានមានប្រសាសន៍ថា ផែនការអភិវឌ្ឍន៍ជាតិគួរតែផ្តោតទៅលើវិស័យមួយចំនួន និងមានកំណត់ពេលវេលាអនុវត្តន៍។

(សំឡេង លោក ញ៉ែម បុញ្ញាឫទ្ធិ )

ជាមួយគ្នានេះដែរ លោក យ៉ង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាពក៏បានបញ្ជាក់ដោយស្នើឲ្យផែនការនេះ ត្រូវឆ្លើយតបបំណងប្រាថ្នារបស់ប្រជាពលរដ្ឋ។

(សំឡេង លោក យ៉ង់ គិមអេង )

លោកចង់ឲ្យផែនការជាតិផ្តោតទៅលើការកែទម្រង់ប្រព័ន្ធយុត្តិធម៌ វិស័យអប់រំ និងវិស័យសិទ្ធិមនុស្ស។

សូមបញ្ជាក់ថា ផែនការយុទ្ធសាស្ត្រនេះ បានដាក់ទិសដៅអភិវឌ្ឍន៍លើវិស័យសេដ្ឋកិច្ចនយោបាយ និងសង្គម សម្រាប់ការអនុវត្តក្នុងរយៈពេល៥ឆ្នាំ។

មន្ត្រីក្រសួងផែនការបានបញ្ជាក់ថា ផែនការនេះ មានតម្លៃជាច្បាប់ ដោយត្រូវឆ្លងក្រុមប្រឹក្សាសេដ្ឋកិច្ចជាតិ ឆ្លងគណៈរដ្ឋមន្ត្រី និងបញ្ជូនទៅរដ្ឋសភា អនុម័តទៀត ហើយសង្ឃឹមថា ផែនការនេះនឹងក្លាយទៅជាច្បាប់នៅចុងខែមករាឆ្នាំ២០១៤ខាងមុខនេះ៕

Labels: ព័ត៌មានជាតិ

Adonis golden Ratio