ខេត្តសៀមរាប ប្រារព្ធទិវាពិភពលោកប្រយុទ្ធនឹងជំងឺអេដស៍

កាលពីព្រឹកមិញនេះ អាជ្ញាធរខេត្ត្សៀមរាប សហការជាមួយអាជ្ញាធរជាតិប្រយុទ្ធនឹងជំងឺអេដស៍ បានរៀបចំទិវាពិភពលោកប្រយុទ្ធនឹងជំងឺអេដស៍ ក្រោមប្រធានបទ ឈានឆ្ពោះទៅរកគ្មានការឆ្លងថ្មី គ្មានការរើសអើង និង គ្មានការស្លាប់ ក្នុងគោលបំណងផ្សព្វផ្សាយដល់ប្រជាពលរដ្ឋទូទៅ ឲ្យបានយល់ដឹងកាន់តែច្បាស់ នឹងឈានទៅរកការលុបបំបាត់ទាំងស្រុងនៅកម្ពុជា ត្រឹមឆ្នាំ២០២០។

លោក ក្រូស សារ៉ាត់ ប្រធានមន្ទីរសុខាភិបាលខេត្តសៀមរាប បានមានប្រសាសន៍ថា នៅប្រទេសកម្ពុជាក្នុងឆ្នាំ១៩៩៨ មានប្រេវ៉ាឡង់អ្នកផ្ទុកមេរោគអេដស៍ អ្នកជំងឺអេដស៍លើមនុស្សពេញវ័យ ក្នុងចន្លោះអាយុពី១៥ឆ្នាំទៅ៤៩ឆ្នាំ មានចំនួន២ភាគរយ ហើយមានការថយចុះមកត្រឹម០,៧ភាគរយនៅឆ្នាំ២០១៣ និង បន្តចុះមកត្រឹម០,៦ភាគរយនៅឆ្នាំ២០១៤ ដែលអាចប៉ាន់ប្រមាណបានថា មានអ្នកផ្ទុកមេរោគអេដស៍ អ្នកជំងឺអេដស៍ ចំនួន៦៥.០០០នាក់។

លោកបានបញ្ជាក់ទៀតថា អេដស៍ជាជំងឺមួយ ដែលមកដល់ពេលនេះពុំទាន់មានឱសថណាមួយអាចព្យាបាលឲ្យជាសះស្បើយបានឡើយ ហើយវាជាបញ្ហាដ៏ស្មុគ្រស្មាញបំផុតផងដែរ ដែលប៉ះពាល់ពីបុគ្គលទៅគ្រួសារ រហូតដល់សង្គមទាំងមូល ដូច្នេះប្រការសំខាន់ គឺទាំងអស់គ្នា រួមគ្នាទប់ស្កាត់។

អភិបាលរងខេត្តសៀមរាប លោក សង់ រីហា បានមានប្រសាសន៍ថា ផ្អែកតាមរបាយការណ៍ដែលពាក់ព័ន្ធនឹងបញ្ហាមេរោគអេដស៍នេះ បានឲ្យដឹងថា ស្ថានភាពនៃការឆ្លងជំងឺអេដស៍ មានការថយចុះពីមួយឆ្នាំទៅមួយឆ្នាំ ហើយក្នុងឱកាសនៃការប្រារព្ធទិវាពិភពលោកប្រយុទ្ធនឹងជំងឺអេដស៍លើកទី២៤សម្រាប់ពិភពលោក និង លើកទី២១សម្រាប់កម្ពុជានាឆ្នាំនេះ បានបង្ហាញឲ្យឃើញនូវការប្តេជ្ញាចិត្តរបស់អ្នកទាំងអស់គ្នាទ្វេដង ក្នុងការសម្រេចបានជោគជ័យ អំពីការទប់ស្កាត់ និង កាត់បន្ថយអត្រាឆ្លងនៃមេរោគអេដស៍នេះ ហើយគ្មានអ្វីដែលថាធ្វើមិនបាននោះទេ ប្រសិនបើអ្នកទាំងអស់គ្នារួមគ្នា ឯកភាពគ្នាក្នុងការធ្វើ និងចូលរួមធ្វើទាំងអស់គ្នា ដែលអាចរំពឹងថា នឹងឈានទៅលុបបំបាត់ទាំងស្រុងនៅឆ្នាំ២០២០ខាងមុននេះ។

(សំឡេង លោក សង់ រីហា)

ជាមួយនេះដែរ លោក ស៊ឹម គឹមសែន អនុប្រធានអាជ្ញាធរជាតិប្រយុទ្ធនឹងជំងឺអេដស៍ បានមានប្រសាសន៍យ៉ាងដូច្នេះ។

(សំឡេង លោក ស៊ឹម គឹមសែន)

សូមបញ្ជាក់ថា តាមរបាយការណ៍របស់អង្គការ UNAIDS នៅក្នុងឆ្នាំ២០១១ បានបង្ហាញឲ្យឃើញថា នៅលើសកលលោកទាំងមូល មានអ្នកផ្ទុកមេរោគអេដស៍ប្រមាណ៣៤លាននាក់ ក្នុងនោះមនុស្សឆ្លងថ្មីមានប្រមាណ២លាននាក់ក្នុងមួយឆ្នាំ និង មនុស្សប្រមាណ១,៧លាននាក់ ក្នុងមួយឆ្នាំ បានស្លាប់ដោយសារជំងឺអេដស៍នេះ៕