អ៊ីរ៉ង់បើកប្រតិបត្តិការចែចង់ប្រទេសជិតខាងក្នុងតំបន់

ដោយ អៀង សុខម៉ិញ

បន្ទាប់ពីបានរកឃើញកិច្ចព្រមព្រៀងនុយក្លេអ៊ែរជាមួយក្រុមប្រទេសមហាអំណាច អ៊ីរ៉ង់ដែលបណ្តាជនភាគច្រើនកាន់សាសនាអ៊ីស្លាមនិកាយឈីអ៊ីត បានបង្ហាញចេតនាលាដៃស្វាគមន៍ចង់ធ្វើសហប្រតិបត្តិការជាមួយនឹងប្រទេសអារ៉ាប៊ីសាអូឌីត ជាគូប្រជែងក្នុងតំបន់ផង ជាគូប្រជែងសាសនាផង។
គឺក្នុងឱកាសបំពេញទស្សនកិច្ចមួយជុំនៅតំបន់ឈូងសមុទ្ទពែក្ស ដែលប្រមុខការបរទេសអ៊ីរ៉ង់ បានប្រកាសទៅបំពេញទស្សនកិច្ចនៅទីក្រុងរីយ៉ាត ប៉ុន្តែពុំទាន់មានការកំណត់កាលបរិច្ឆេទច្បាស់លាស់សម្រាប់ទស្សនកិច្ចជាទីរង់ចាំនេះទេ។

រដ្ឋាភិបាលអ៊ីរ៉ង់ថ្មីដែលល្បីថាមាននិន្នាការមិនតឹងរឹង បន្ទាប់ពីបានរកឃើញកិច្ចព្រមព្រៀងនុយក្លេអ៊ែរជាមួយមហាអំណាចហើយ មិនបណ្តែតបណ្តោយឱ្យខូចការជាមួយនឹងប្រទេសជិតខាងទេ ជាពិសេសជាមួយនឹងអារ៉ាប៊ីសាអូឌីត។ រីយ៉ាត និងបណ្តាប្រទេសដទៃក្នុងតំបន់ ជាសម្ព័ន្ធមិត្តអាមេរិក បានគាំទ្រឱ្យមានកិច្ចព្រមព្រៀងនុយក្លេអ៊ែរអ៊ីរ៉ង់នៅទីក្រុងហ្សឺណែវមែន ប៉ុន្តែអ្នកទទួលខុសត្រូវមួយចំនួននៅមិនទុកចិត្ត និងទាមទារឱ្យមានការធានាសុវត្ថិភាពជាតិ ក្រែងអ៊ីរ៉ង់លួចអភិវឌ្ឍន៍អាវុធនុយក្លេអ៊ែរពីក្រោយកម្មវិធីថាមពលបរមាណូ។

អារ៉ាប៊ីសាអូឌីត និងអ៊ីរ៉ង់ ប្រទេសកាន់សាសនាអ៊ីស្លាមដូចគ្នា ប៉ុន្តែនិកាយផ្សេងគ្នា (និកាយស៊ុយនីតនៅអារ៉ាប៊ីសាអូឌីត និងនិកាយស៊ីអ៊ីតនៅអ៊ីរ៉ង់ )ដែលពេលខ្លះសឹងចាត់ទុកគ្នាជាសត្រូវ ជាគូប្រជែងគ្នាខ្លាំងក្នុងពិភពអ៊ីស្លាម និងក្នុងតំបន់តែម្តង។

ប៉ុន្តែពេលនេះ សម្រាប់តេអេរ៉ង់ អារ៉ាប៊ីសាអ៊ូឌីត ជាប្រទេសដ៏សំខាន់ និងមានឥទ្ធិពលនៅក្នុងតំបន់ ដែលអ៊ីរ៉ង់ត្រូវការចាំបាច់ពង្រឹងសហប្រតិបត្តិការជាមួយ។ នេះជាប្រសាសន៍របស់លោករដ្ឋមន្ត្រីក្រសួងការបរទេសអ៊ីរ៉ង់ នៅក្នុងសន្និសីទកាសែតរួមគ្នាជាមួយសមភាគីកូវែត។

លើសពីនេះទៅទៀត ប្រមុខការទូតអ៊ីរ៉ង់ កំពុងសាកល្បងស្វែងរកទំនាក់ទំនងល្អ និងប្រាថ្នាដោះស្រាយវិបត្តិដែនដីដែលមានការរកាំរកូសជាមួយប្រទេសអេមីរ៉ាតអារ៉ាប់រួម ដោយប្រកាសត្រៀមខ្លួនចរចាកោះមួយក្នុងចំណោមកោះបីជាប់ជម្លោះ៕