ឥណ្ឌាចាត់វិធានការសងសឹកអាមេរិកដែលបានឃាត់ខ្លួនស្ត្រីការទូតឥណ្ឌានៅក្រុងញូវយក

ស្ត្រីការទូតឥណ្ឌា លោកស្រី Devyani Khobragade

នៅថ្ងៃអង្គារនេះ ឥណ្ឌាបានចាត់វិធានការតបតទៅរដ្ឋាភិបាលអាមេរិក ដើម្បីសងសឹកនឹងការដែលអាមេរិកបានឃាត់ខ្លួន និងឆែកឆេរខ្លួនស្ត្រីការទូតឥណ្ឌាមួយរូប នៅទីក្រុងញូវយក កាលពីថ្ងៃព្រហស្បតិ៍ សប្តាហ៍មុន។ រដ្ឋាភិបាលឥណ្ឌា បានបញ្ជាអោយដកហូតអត្តសញ្ញាណបណ្ណដែលក្រសួងការបរទេសឥណ្ឌាធ្លាប់បានផ្តល់អោយមន្ត្រីតំណាងអាមេរិក នៅឥណ្ឌា។
យោងតាមប្រភពព័ត៌មានមិនបញ្ចេញអត្តសញ្ញាណ ដែលសារព័ត៌មានបារាំង អាអេហ្វប៉េ AFP ទទួលបានពីក្រសួងការបរទេសឥណ្ឌា នៅថ្ងៃអង្គារនេះ រដ្ឋាភិបាលឥណ្ឌាបានចេញបញ្ជាដកហូតយកអត្តសញ្ញាណបណ្ណដែលក្រសួងការបរទេសឥណ្ឌាបានប្រគល់ទៅអោយមន្ត្រីតំណាងសហរដ្ឋអាមេរិកនានា ដែលកំពុងរស់នៅឥណ្ឌា។

អត្តសញ្ញាណបណ្ណនេះ អាចអោយមន្ត្រីអាមេរិកកាំងទាំងនេះ មានអាទិភាពឆាប់ត្រូវបានគេត្រួតពិនិត្យនៅអាកាសយានដ្ឋានឥណ្ឌា និងនៅតាមទីកន្លែងសាធារណៈផ្សេងទៀត។ ជាការសងសឹក រដ្ឋាភិបាលឥណ្ឌាក៏នឹងបង្កកការនាំចូលនូវទ្រព្យសម្បត្តិបែបសាសនារឺអរូបិយ ដែលត្រូវបញ្ជូនទៅអោយស្ថានទូតអាមេរិក នៅឥណ្ឌាផងដែរ។

ប៉ូលិសឥណ្ឌាបានដកយកចេញរបាំងសន្តិសុខ ដែលដាក់នៅជិតស្ថានទូតអាមេរិក ប្រចាំនៅក្រុងញូវដេល្លី។

វិធានការទាំងអស់នេះ គឺជាការសងសឹកចំពោះអាជ្ញាធរអាមេរិក ដែលបានឃាត់ខ្លួនស្ត្រីការទូតឥណ្ឌាមួយរូប នៅទីក្រុងញូវយក។ ស្ត្រីការទូតរូបនោះ ឈ្មោះ ដេវយ៉ានី ខូប្រាហ្កាដេ Devyani Khobragade ជាអនុប្រធានកុងស៊ុលរបស់ឥណ្ឌា។ លោកស្រីខូប្រាហ្កាដេ ត្រូវបានអាជ្ញាធរអាមេរិកឃាត់ខ្លួន កាលពីថ្ងៃព្រហស្បតិ៍ នៅពេលលោកស្រីកំពុងជូនកូនៗលោកស្រីទៅសាលារៀន។ លោកស្រី ខូប្រាហ្កាដេ ជាប់ចោទពីបទធ្វើសេចក្តីបញ្ជាក់ក្លែងក្លាយទាក់ទងនឹងទិដ្ឋាការអ្នកបំរើការក្នុងផ្ទះរបស់លោកស្រី។ អាជ្ញាធរអាមេរិកបានដាក់ខ្នោះ និងបានឆែកឆេររាងកាយគាត់ ហើយថែមទាំងបានឃុំខ្លួនគាត់ អោយនៅជាមួយអ្នកជក់គ្រឿងញៀនទៀតផង។ ប៉ុន្តែ អាជ្ញាធរអាមេរិកបានដោះលែងលោកស្រី ខូប្រាហ្កាដេ មកវិញ ក្រោយពីបានឃាត់ខ្លួនគាត់បានប៉ុន្មានម៉ោងរួចមក។

រដ្ឋាភិបាលឥណ្ឌាមានការខឹងសម្បារខ្លាំង និងបានប្រាប់ថា ទង្វើអាមេរិកបែបនេះមិនអាចទទួលយកបាននោះទេ។ រដ្ឋមន្ត្រីការបរទេសឥណ្ឌា សាលម៉ាន ខឺរស្ហ៊ីត Salman Khurshid ធ្លាប់បាន ប្រកាសរួចមកហើយថា នឹងចាត់វិធានការតបតទៅនឹងអាមេរិកក្នុងរឿងនេះ៕