មេដឹកនាំគណបក្សសង្គ្រោះជាតិបានច្រានចោលការលើកឡើងដែលថា ការធ្វើបាតុកម្មជាបន្តបន្ទាប់របស់ គណបក្សសង្គ្រោះជាតិថាបាននឹងកំពុងធ្វើឲ្យមានផលប៉ះពាល់ធ្ងន់ធ្ងរដល់ភាពមិនប្រក្រតីគ្រប់ផ្នែកនៃជីវភាពសង្គម និងភាពថ្លៃថ្នូរបស់កម្ពុជាលើឆាកអន្តរជាតិ។
លោក សម រង្សីប្រធានគណបក្សសង្គ្រោះជាតិថ្លែងថាការធ្វើបាតុកម្មរបស់គណបក្សសង្គ្រោះជាតិមិនធ្វើឲ្យមានផលប៉ះពាល់អ្វីដល់សង្គមកម្ពុជា ឬមុខមាត់កម្ពុជានៅលើឆាកអន្តរជាតិឡើយ។ លោកបន្ថែមថាអំពើពុករលួយដែលរដ្ឋាភិបាលកម្ពុជាបានធ្វើកន្លងមកទៅវិញដែលធ្វើឲ្យប៉ះពាល់ដល់ប្រជាជនកម្ពុជា និងមុខមាត់ប្រទេសលើឆាកអន្តរជាតិ។
«គឺត្រូវបានគេចាត់ទុកថាជាប្រទេសដែលមានអំពើពុករលួយ។ហើយឈ្មោះយើងអាក្រក់ទៀតដោយសាររដ្ឋភិបាលសព្វថ្ងៃបាននាំក្រុមហ៊ុនខិលខួចមកកាប់បំផ្លាញព្រៃឈើ យកដីធ្លីប្រជាពលរដ្ឋ មានការរំលោភសិទ្ធិមនុស្សធ្ងន់ធ្ងរ។»
ប្រត្តិកម្មបែបនេះធ្វើឡើងបន្ទាប់ពីរដ្ឋាភិបាលកម្ពុជាបានចេញសេចក្តីអំពាវនាវដោយបញ្ជាក់ថា ការធ្វើបាតុកម្មរបស់គណបក្សសង្រ្គោះជាតិជារឿយៗមិនស្របទៅតាមគោលការណ៍ លទ្ធិប្រជាធិបតេយ្យ នីតិរដ្ឋហើយបានកំពុងធ្វើឲ្យមានផលប៉ះពាល់ដល់ជីវភាពសង្គម និងភាពថ្លៃថ្នូររបស់កម្ពុជាលើឆាកអន្តរជាតិ។
ក្នុងលិខិតដែលចេញផ្សាយកាលពីព្រឹកមិញក៏បានអំពាវនាវឲ្យគណបក្សសង្គ្រោះជាតិ និងអ្នកចូលរួមបាតុកម្មអនុវត្តឲ្យបានត្រឹមត្រូវនូវសិទ្ធិសេរីភាព និងករណីកិច្ចរបស់ប្រជាពលរដ្ឋដូចមានចែងក្នុងរដ្ឋធម្មនុញ្ញ។ អត្ថន័យផ្សេងៗ ក៏បានបញ្ជាក់ផងដែរថាប្រជាពលរដ្ឋខ្មែរមានសិទ្ធិស្មើគ្នាចំពោះមុខច្បាប់ ការប្រើប្រាស់សិទ្ធិរបស់បុគ្គលម្នាក់ៗមិនត្រូវឲ្យប៉ះពាល់ដល់សិទ្ធិអ្នកដទៃឡើយ។
ក៏ប៉ុន្តែលោក សម រង្សី មានប្រសាសន៍ថាបាតុកម្មរបស់គណបក្សសង្រ្គោះជាតិមានវិន័យ និងសណ្តាប់ធ្នាប់ត្រឹមត្រូវ ហើយការលើកឡើងនៃការទាមទាររបស់ប្រជាពលរដ្ឋដែលធ្វើបាតុកម្មជាការសម្តែងមតិស្របតាមរដ្ឋធម្មនុញ្ញ។
«ដើម្បីឲ្យរដ្ឋាភិបាលដឹងថាគេត្រូវការឲ្យមានការផ្លាស់ប្តូរនយោបាយ។ នយោបាយបែបហ្នឹងវាហិនហោចប្រទេសជាតិយើង។ ហ្នឹងហើយជាសិទ្ធិរបស់ប្រជាពលរដ្ឋដែលមានចែងក្នុងរដ្ឋធម្មនុញ្ញ។»
គិតមកត្រឹមថ្ងៃសុក្រទី ២០ខែធ្នូនេះគណបក្សសង្គ្រោះជាតិបាននឹងកំពុងបន្តការធ្វើបាតុកម្មរបស់ខ្លួនឈានដល់ថ្ងៃទី ៦ ហើយ។ គណបក្សសង្គ្រោះជាតិនៅបន្តទាត់ចោលលទ្ធិផលនៃការបោះឆ្នោត ដែលគណបក្សមួយនេះចាត់ទុកថាមានភាពមិនប្រក្រតីធ្ងន់ធ្ងរ។ មេដឹកនាំគណបក្សសង្គ្រោះជាតិបានប្រកាសធ្វើបាតុកម្មរយៈពេលយូរគ្មានការកំណត់ ទាមទារឲ្យមានការបោះឆ្នោតសាឡើងវិញក្នុងអំឡុងពេល ៣ខែ៕
Labels:
ព័ត៌មានជាតិ
Previous Article
