មន្ត្រីសិទ្ធិមនុស្សរិះគន់ការដំឡើងសក្តិនាយទាហានជាន់ខ្ពស់ទៅជាផ្កាយ៤

ប្រមុខរដ្ឋាភិបាលបានយល់ព្រមចំពោះសំណើរដ្ឋមន្ត្រីក្រសួងការពារ ជាតិ សុំដំឡើងសក្តិនាយទាហានផ្កាយ៣មួយចំនួន ទៅជាផ្កាយ៤ ឬហៅថា នាយឧត្តមសេនីយ៍។ ប៉ុន្តែ ការយល់ព្រមនេះ មិនទាន់ចូលជាផ្លូវការនៅឡើយ ទាល់តែមានព្រះរាជក្រឹត្យតែងតាំងពីព្រះមហាក្សត្រកម្ពុជា។
មន្ត្រីអង្គការសិទ្ធិមនុស្ស បានរិះគន់ថា ការដំឡើងសក្តិនាយទាហានជាន់ខ្ពស់ពីផ្កាយ៣ ទៅផ្កាយ៤
នៅក្នុងកាលៈទេសៈនេះ គឺជាការបង្ហាញរូបភាពជាចំហថា រដ្ឋាភិបាលគាំទ្រសកម្មភាព និងលើកទឹកចិត្តនាយទាហាន ដែលបានសម្រេចចិត្តគាំទ្រសកម្មភាពរដ្ឋាភិបាល ក្នុងដំណាក់កាលជាប់គាំងនយោបាយនេះ។
លោក នី ចរិយា មន្ត្រីសមាគមការពារសិទ្ធិមនុស្សអាដហុក (ADHOC) មានប្រសាសន៍នៅថ្ងៃទី៥ កុម្ភៈ ថា ការដំឡើងសក្តិនាយទាហានជាន់ខ្ពស់ ក្រោយការប្រើទាហានបង្ក្រាបកម្មករតវ៉ាប្រាក់ខែនៅតាមផ្លូវជាតិ លេខ៤ និងផ្លូវវ៉េងស្រេង តំបន់ប្រមូលផ្តុំរោងចក្រកាត់ដេរនោះ មិនមែនជារូបភាពមួយល្អចំពោះរដ្ឋាភិបាលទេ។
លោក នី ចរិយា៖ «ទី១ កំពុងលើកស្ទួយប្រព័ន្ធដឹកនាំតាមបែបយោធាហើយ បានន័យថា យើងឲ្យតម្លៃទៅលើយោធាជាងការឲ្យតម្លៃលើការគោរពច្បាប់។ ទី២ បង្ហាញថា អ្វីដែលយោធាបានបង្ក្រាបដែលមតិជាតិ និងអន្តរជាតិ រិះគន់ថាជារឿងរំលោភសិទ្ធិមនុស្សនេះ រដ្ឋាភិបាលមានចេតនាមួយបង្ហាញថា រឿងនេះជាការធ្វើដោយមានការគាំទ្រពីរដ្ឋាភិបាល។ អ៊ីចឹង វាជាការលើកទឹកចិត្តដល់អ្នករំលោភសិទ្ធិមនុស្ស និងបង្ហាញថា ពីពេលនេះទៅ រដ្ឋាភិបាលមិនយកចិត្តទុកដាក់លើការរំលោភសិទ្ធិមនុស្សទៀតទេ»។
លោក ទៀ បាញ់ ជាឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិ បានធ្វើសេចក្តីស្នើសុំជាផ្លូវការមួយទៅ លោក ហ៊ុន សែន កាលពីថ្ងៃទី៣០ មករា សុំដំឡើងសក្តិនាយទាហានផ្កាយ៣ ចំនួន ២៩រូប ឲ្យមានសក្តិផ្កាយ៤។
លិខិតចុះថ្ងៃទី៣០ មករា ដែលចុះហត្ថលេខាដោយ លោក ទៀ បាញ់ ស្នើសុំដំឡើងសក្តិនាយទាហាននោះ មានចំណារយល់ព្រមរបស់លោកនាយករដ្ឋមន្ត្រី ហ៊ុន សែន ចុះថ្ងៃទី៣១ មករា។
នៅក្នុងចំណោមឈ្មោះនាយទាហានផ្កាយ៣ ចំនួន ២៩រូប ដែលរដ្ឋមន្ត្រីក្រសួងការពារជាតិ ស្នើសុំដំឡើងសក្តិផ្កាយ៤ នោះ មាននាយទាហានថ្នាក់អនុរដ្ឋលេខាធិការចំនួន ១០រូប មាននាយទាហានថ្នាក់អគ្គមេបញ្ជាការរងចំនួន ៧រូប និងមានមេបញ្ជាការកងទ័ពជើងទឹក និងជើងអាកាសផងដែរ។
វិទ្យុអាស៊ីសេរី មិនអាចទាក់ទងសុំការអធិប្បាយពីលោកផ្កាយ៣ ឈុំ សុជាតិ ជាអនុរដ្ឋលេខាធិការ និងជាអ្នកនាំពាក្យក្រសួងការពារជាតិ និងលោក ទៀ បាញ់ រដ្ឋមន្ត្រីក្រសួងការពារជាតិ បានឡើយចំពោះរឿងដំឡើងសក្តិនាយទាហានជាន់ខ្ពស់នេះ។
ទាក់ទងជាមួយការលើកឡើងរបស់មន្ត្រីសមាគមសិទ្ធិមនុស្ស និងប្រជាពលរដ្ឋខ្លះថា ការដំឡើងសក្តិនាយទាហាននេះ ជារឿងទិញទឹកចិត្តនាយទាហានជាន់ខ្ពស់នោះ លោករដ្ឋលេខាធិការ ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី មានប្រសាសន៍នៅថ្ងៃទី៥ កុម្ភៈ ច្រានចោលការចោទប្រកាន់នេះទាំងស្រុង។
លោក ផៃ ស៊ីផាន៖ «ការដំឡើងឋានន្តរសក្តិ គឺយើងធ្វើទៅតាមបែបបទ និងច្បាប់ដែលអនុញ្ញាត គឺមិនមែនធ្វើទៅតាមទំនើងចិត្តរបស់ថ្នាក់ដឹកនាំយើងទេ គឺធ្វើទៅតាមភាពចំណាស់នៃការងារដែលគេបានធ្វើ។ យើងសុំច្រានចោលអ្វីដែលគេយល់ច្រឡំថា ការដំឡើងសក្តិនេះដើម្បីផ្គាប់ចិត្ត ឬទិញទឹកចិត្តយុទ្ធជនយើង។ មិនមែនទេ គឺយើងធ្វើទៅតាមច្បាប់ដែលបានកំណត់ និងអនុញ្ញាតឲ្យយើងធ្វើ»។
កាលពីថ្ងៃទី២ និងទី៣ មករា មានការប្រើកម្លាំងទាហានពីកងពលពិសេស ដើម្បីបង្ក្រាបបាតុកម្មតវ៉ារបស់កម្មកររោងចក្រនៅតាមផ្លូវជាតិលេខ ៤ និងនៅតំបន់ផ្លូវវ៉េងស្រេង ដែលបណ្ដាលឲ្យមានការស្លាប់កម្មករចំនួន ៥នាក់ របួសជិត ៤០នាក់ និងត្រូវចាប់ខ្លួន ២៣នាក់ បញ្ជូនទៅតុលាការធ្វើការចោទប្រកាន់ និងឃុំខ្លួន។ នៅថ្ងៃទី៣ មករា នេះដែរ ក្រសួងការពារជាតិ បានចេញសេចក្តីប្រកាសព័ត៌មានមួយប្ដេជ្ញាការពារជាតិ សាសនា ព្រះមហាក្សត្រ ការពារដាច់ខាតរដ្ឋធម្មនុញ្ញ ព្រមទាំងលទ្ធផលបោះឆ្នោត និងជាពិសេស គាំទ្រការដឹកនាំរបស់លោកនាយករដ្ឋមន្ត្រី ហ៊ុន សែន ក្នុងតំណែងជានាយករដ្ឋមន្ត្រីក្នុងអាណត្តិទី៥នេះ។
ការចេញសេចក្តីប្រកាសព័ត៌មាននេះ កើតមានឡើងក្នុងពេលគណបក្សសង្គ្រោះជាតិ ដែលជាគណបក្សប្រឆាំងនៅកម្ពុជា តវ៉ាថា លទ្ធផលបោះឆ្នោតកាលពីថ្ងៃទី២៨ កក្កដា កន្លងទៅ មានភាពមិនត្រឹមត្រូវ និងទាមទារសុំឲ្យមានការផ្ទៀងផ្ទាត់លទ្ធផលបោះឆ្នោតឡើងវិញ ឬសុំឲ្យមានការរៀបចំបោះឆ្នោតឡើងវិញ៕