ជំនួបចរចាលើកដំបូងរវាងរដ្ឋាភិបាលប៉ាគីស្ថាននិងពួកតាលីបង់

តំណាងតាលីបង់ មុនជំនួបចរចាជាមួួយតំណាងរដ្ឋាភិបាលប៉ាគីស្ថាន

ការចរចារវាងរដ្ឋាភិបាលប៉ាគីស្ថាន និងពួកឧទ្ទាមតាលីបង់ បានចាប់ផ្តើមនៅព្រឹកថ្ងៃព្រហស្បតិ៍ទី ៦ កុម្ភៈនេះ នៅទីក្រុងអ៊ីស្លាម៉ាបាត ដើម្បីសាកល្បងបិទបញ្ចប់អំពើហិង្សាក្នុងប្រទេសអូសបន្លាយតាំង ពី៧ឆ្នាំមក។ ជាជំនួបបឋម រៀបចំឡើងដើម្បីកំណត់បរិបទផ្សេងៗទាក់ទងនឹងការចរចាស្វែង
រក សន្តិភាព។ ការចរចាដែលត្រូវបានលើកពេលជាច្រើនលើកច្រើនសា កំពុងប្រព្រឹត្តទៅក្នុងពន្លកនៃក្តីសង្ឃឹមច្រើន ប៉ុន្តែការស្វាគមន៍នៅមានលក្ខណៈប្រុងប្រយ័ត្នដដែល។មានការយឺតយ៉ាវពីរថ្ងៃមែន ប៉ុន្តែនៅទីបំផុត និងជាលើកទីមួយ គិតចាប់តាំងពីនាយករដ្ឋមន្ត្រីប៉ាគីស្ថាន បានសម្រេចផ្តល់សំណាងជាថ្មីដល់ការស្វែងរកសន្តិភាពតាមផ្លូវចរចាមក ដែលមានជំនួបរវាងអន្តរការីតំណាងរដ្ឋាភិបាលនិងតំណាងពួកឧទ្ទាម អ៊ីស្លាម អាចប្រព្រឹត្តទៅបាន។ ការចរចាបានគ្រោងធ្វើដំបូងឡើយថ្ងៃអង្គារទី៤ កុម្ភៈ តែការណាត់ជួបគ្នានោះ ត្រូវបានលុបចោលទៅវិញ។ ហើយភាគីរដ្ឋាភិបាលប៉ាគីស្ថានអះអាងថាគឺបណ្តាលមកពីខាងពួកតាលីបង់។

តាលីបង់ឬពួកឧទ្ទាមTahreek-e-Taliban ប៉ាគីស្ថាន (TTP) បានរើរុះប្រតិភូ នៅនាទីចុងក្រោយ ដោយពេលនេះមានតំណាងពីរនាក់ជាប្រមុខសាសនា ប្រកាន់ជំហរតឹងរ៉ឹង ម្នាក់ជាមេដឹកនាំចលនា Jamaat-e-islami ជាបក្សអ៊ីស្លាមនិយម។

រដ្ឋាភិបាលក្រុងអ៊ីស្លាម៉ាបាត របស់លោក ណាវ៉ា ស្ហារីហ្វ ចង់ឃើញមានដំណោះស្រាយជាមួយពួកតាលីបង់ តាមផ្លូវចរចាខ្លាំងណាស់ ព្រោះអំពើហិង្សាក្នុងរយៈពេល៧ឆ្នាំចុងក្រោយនេះ បានសម្លាប់ជីវិតមនុស្សអស់រាប់ពាន់នាក់។

តាំងពីខែវិច្ឆិកា រាល់ទំនាក់ទំនងបឋមជាមួយនឹងពួកឧទ្ទាមត្រូវកាត់ផ្តាច់ទាំងអស់ ពោលគឺក្រោយពីមេដឹកនាំតាលីបង់ម្នាក់បានស្លាប់ដោយយន្តហោះគ្មាន មនុស្សបើកឌ្រូនបាញ់ចំមក។ ដូច្នេះការប្រកាសឱ្យដឹងអំពីការភ្ជាប់ចំណងចរចាឡើងវិញ ពិតជាក្តីសង្ឃឹមថ្មីសម្រាប់ប៉ាគីស្ថាន។ ប៉ុន្តែខាងតាលីបង់ ហាក់ដូចជាមិនសូវស្វាគមន៍ទេ និងហាក់បានសម្តែងការបែងបាក់គ្នាផង ជាពិសេសទៅលើប្រសិទ្ធិភាពនៃការចរចា។ ជាក់ស្តែងកាលពីខែមករា គ្រាន់តែបានឮការប្រកាសចរចាជាមួយរដ្ឋាភិបាលភ្លាម ពួកតាលីបង់បានស្វាគមន៍ជាមួយនឹងភេរវកម្មបំផ្ទុះគ្រាប់បែក ស្លាប់មនុស្សអស់៧នាក់។

ម្យ៉ាងវិញទៀត សំណើរបស់ភាគីទាំងពីរ មានលក្ខណៈផ្ទុយគ្នាស្រឡះ។ តាលីបង់ទាមទារឱ្យមានច្បាប់អ៊ីស្លាម Charia និងដាច់ខាតមិនប៉ះពាល់រដ្ឋធម្មនុញ្ញ ចំពោះរដ្ឋាភិបាល។ ជាហេតុធ្វើឱ្យគេនឹកឃើញជានិច្ចដល់ជំនួបចរចាមុនៗ ដែលតែងតែបិទបញ្ចប់ទៅវិញដោយភាពបរាជ័យ៕