IRI៖ ចំនួនពលរដ្ឋថាកម្ពុជាដើរលើផ្លូវត្រូវបានធ្លាក់ចុះ

របាយការណ៍ស្ដីពីការស្ទង់មតិពលរដ្ឋ ដែលមានកម្រាស់ ៤៦ទំព័រវិទ្យាស្ថានសាធារណរដ្ឋអន្តរជាតិ ហៅថា អាយ.អ.អាយ (IRI) របស់សហរដ្ឋអាមេរិក បានរកឃើញថា ទស្សនៈពលរដ្ឋថារដ្ឋាភិបាលកម្ពុជា ដើរលើផ្លូវត្រូវនោះ បានធ្លាក់ចុះ និងគាំទ្រយ៉ាងមុតមាំ អោយមានកំណែទម្រង់ប្រជាធិបតេយ្យ។ចេញផ្សាយសម្រាប់ខែតុលា ដល់ខែវិច្ឆិកា ឆ្នាំ២០១៣ គឺបន្ទាប់ពីបានសាកសួរពលរដ្ឋពេញវ័យចំនួន ២ពាន់នាក់ នៅទូទាំង
ប្រទេស។ អាយ.អ.អាយ បង្ហាញថា មានការធ្លាក់ចុះយ៉ាងគំហុកនៃសុទិដ្ឋិនិយមចំពោះការដឹកនាំប្រទេសក្នុងពេលបច្ចុប្បន្ន។ ខណៈដែល ៥៥% នៃអ្នកឆ្លើយសំណួរនៅតែគិតថា ការដឹកនាំប្រទេសកំពុងដើរលើផ្លូវត្រូវ ប៉ុន្តែ ចំនួននេះបង្ហាញថា ធ្លាក់ចុះ ២៤% បើប្រៀបធៀបនឹងមួយឆ្នាំកន្លងទៅ ដែលកាលណោះអ្នកឆ្លើយសំណួរមានចំនួន ៧៩% ថា ការដឹកនាំប្រទេសកំពុងដើរលើផ្លូវត្រូវ។

ការស្ទង់មតិក៏បានបង្ហាញដែរថា ក្នុងចំណោមកត្តាសំខាន់ជាច្រើនក្នុងការសម្រេចចិត្តបោះឆ្នោតអោយគណបក្សនយោបាយមួយ កាលពីខែកក្កដា ឆ្នាំ២០១៣ អ្នកបោះឆ្នោតបានបង្ហាញហេតុផលថា ពួកគេត្រូវការផ្លាស់ប្ដូរ។

ចំពោះពលរដ្ឋដែលគិតថា ប្រទេសរបស់គេកំពុងធ្វើដំណើរលើផ្លូវខុស បានសំអាងហេតុផលអំពើពុករលួយ បក្ខពួកនិយម និងការបំផ្លាញបរិស្ថាន។ ចំពោះអ្នកយល់ថា កម្ពុជា កំពុងធ្វើដំណើរលើផ្លូវត្រូវ គឺសំអាងលើការអភិវឌ្ឍហេដ្ឋារចនាសម្ព័ន្ធ មានផ្លូវថ្នល់ សាលារៀន មន្ទីរពេទ្យ និងវត្តវ៉ាជាដើម។

ការស្ទង់មតិដដែលក៏បង្ហាញដែរថា ពលរដ្ឋចំនួន ៨៣% នៃអ្នកឆ្លើយសំណួរបានគាំទ្រអោយកែទម្រង់ប្រជាធិបតេយ្យ រួមមានការបោះឆ្នោតជ្រើសរើសមេភូមិ មានប្រព័ន្ធយុត្តិធម៌ឯករាជ្យ និងការពារសិទ្ធិសេរីភាពបញ្ចេញមតិ។

ស្របគ្នានេះ គណបក្សប្រជាជនកម្ពុជា ត្រូវគេមើលឃើញថា មានការគាំទ្រពីពលរដ្ឋផ្នែកហេដ្ឋារចនាសម្ព័ន្ធ ការអប់រំ ការប្រឆាំងបទល្មើស និងគ្រឿងញៀន និងការការពាររបបរាជានិយម។ អ្នកឆ្លើយសំណួរទុកចិត្តគណបក្សសង្គ្រោះជាតិ ទាក់ទងនឹងបញ្ហាសេរីភាព សិទ្ធិកម្មករ និងតម្លៃម្ហូបអាហារ។ និយាយអំពីការការពារសិទ្ធិបញ្ចេញមតិ ៤៩% នៃអ្នកឆ្លើយសំណួរ គាំទ្រគណបក្សសង្គ្រោះជាតិ ខណៈដែល ៣៥% គាំទ្រគណបក្សប្រជាជន