ស្ត្រីម្នាក់លេបថ្នាំប៉ងសម្លាប់ខ្លួនព្រោះតែខឹងប្តីស្តីបន្ទោស

រាជធានីភ្នំពេញ ៖ ស្ដ្រីចិត្តខ្លាំងម្នាក់បានដាច់ចិត្តលេបថ្នាំសម្លាប់ខ្លួនព្រោះតែខឹងប្ដីស្ដីបន្ទោសបន្ដិច បន្ដួច ប៉ុន្តែមិនបានសម្រេចនោះទេ ដោយក្រុមគ្រួសារដឹកយកមកសង្គ្រោះនៅមន្ទីរពេទ្យទាន់ពេលវេលា ។ស្ដ្រីដែលចិត្ដខ្លាំងលួចលេបថ្នាំប៉ុនប៉ង ធ្វើអត្ដឃាត នេះឈ្មោះ ធា អាយុ៣៤ឆ្នាំ មុខរបរមេផ្ទះ និងមាន ទីលំនៅកន្លែងកើតហេតុខាងលើ ។ ហេតុការណ៍ នេះកើតឡើងនៅវេលា ម៉ោង៥និង៣០នាទីល្ងាចថ្ងៃទី២៨ខែមករា ឆ្នាំ២០១៤ នៅភូមិថ្នល់បំបែក សង្កាត់ ចោមចៅ ខណ្ឌពោធិ៍សែនជ័យ ។

ប្ដីស្ដ្រីរងគ្រោះបានឱ្យ ដឹងថា នៅមុនពេលកើតហេតុគាត់និង ប្រពន្ធបានឈ្លោះប្រកែកគ្នាបន្ដិចបន្ដួច សោះ ហើយជារឿងធម្មតាក្នុងគ្រួសារ ។ ប៉ុន្តែពីស្ដីបន្ទោសរួច រូបគាត់ជាស្វាមីបានចេញ ទៅក្រៅបាត់ទៅ រហូតដល់ម៉ោងខាងលើ ទើបត្រឡប់មកវិញ ហៅប្រពន្ធឱ្យរៀបបាយ ហូប តែរកមិនឃើញ ក៏ឡើងទៅបន្ទប់ដេក ស្រាប់តែឃើញប្រពន្ធកំពុងដេកបែកពពុះ មាត់ស្គុល និងឃើញមានថ្នាំងុយដេក៤-៥គ្រាប់នៅក្បែរខ្លួនទៀតផង។

ប្ដី ស្ដ្រីរងគ្រោះឱ្យដឹងទៀតថា បន្ទាប់ពី ឃើញប្រពន្ធសន្លប់លែងដឹងខ្លួនដូច្នេះ ក៏ ប្រញាប់ប្រញាល់ដឹកទៅកាន់គ្លីនិកឯកជន ចោមចៅ ដើម្បីឱ្យគ្រូពេទ្យសង្គ្រោះ តែដោយគ្រូពេទ្យប្រាប់ថា មានអាការៈធ្ងន់ធ្ងរ ទើបបញ្ជូនទៅកាន់មន្ទីរពេទ្យព្រះកុសុមៈបន្តទៀតទោះយ៉ាងណាប្រព័ន្ធគាត់បានរួចពីសេចក្តីស្លាប់ ហើយដោយគ្រួពេទ្យបានសង្គ្រោះទាន់ពេលវេលា ៕