រដ្ឋាភិបាលបើកការស៊ើបអង្កេតអំពើហិង្សានៅផ្លូវវ៉េងស្រេង

ដោយ ប្រាក់ ធីតា

ទីបំផុតទៅ រដ្ឋាភិបាលបានសម្រេចបើកការស៊ើបអង្កេតករណីហិង្សា នៅផ្លូវវ៉េងស្រេង កាលពីថ្ងៃទី៣មករា។ ក្នុងកិច្ចប្រជុំគណៈរដ្ឋមន្ត្រីកាលពីថ្ងៃសុក្រ លោកនាយករដ្ឋមន្ត្រី ហ៊ុន សែនបានជំរុញឲ្យគណៈកម្មការពិសេសទាំងបី ខិតខំធ្វើការងាររបស់ខ្លួន ដើម្បីស្វែងរកមូលហេតុនៃអំពើហិង្សា។ អង្គការលីកាដូបានគាំទ្រចំពោះចំណាត់ការរបស់រដ្ឋាភិបាល ប៉ុន្តែបានស្នើសុំឲ្យមានការស៊ើបអង្កេតដោយឯករាជ្យ និងយុត្តិធម៌ ហើយត្រូវតែផ្តន្ទាទោសដល់ជនល្មើសឲ្យបានពិតប្រាកដ។
រដ្ឋាភិបាលបានបង្កើតគណៈកម្មការពិសេសចំនួនបី ដើម្បីស៊ើបអង្កេតករណីហិង្សានៅលើផ្លូវវ៉េងស្រេង។ គណៈកម្មការទី១ ដើម្បីស្រាវជ្រាវរកការខូចខាតដោយសារបាតុកម្មអនាធិបតេយ្យ ទី២-ស្រាវជ្រាវឧប្បទ្ទវហេតុដែលបានកើតឡើង និងទី៣-សិក្សាអំពីថ្លៃឈ្នួលអប្បបរមារបស់កម្មករ។ នៅក្នុងកិច្ចប្រជុំគណៈរដ្ឋមន្ត្រីកាលពីថ្ងៃសុក្រ លោកនាយករដ្ឋមន្ត្រី ហ៊ុន សែន បានជំរុញឲ្យគណៈកម្មការទាំងបី ខិតខំបំពេញការងាររបស់ខ្លួនឲ្យបានល្អ។

លោកស្រី ពុង ឈីវហ្គិច ប្រធានអង្គការការពារសិទ្ធិមនុស្ស លីកាដូ បានសម្តែងការគាំទ្រចំពោះការបង្កើតគណៈកម្មការពិសេសស៊ើបអង្កេតលើករណីហិង្សា លើផ្លូវវ៉េងស្រេង របស់រដ្ឋាភិបាល ប៉ុន្តែ លោកស្រីសុំឲ្យការស៊ើបអង្កេតនោះឯករាជ្យ ហើយនិងយុត្តិធម៌ ដោយដាក់ទោសទៅលើអ្នកដែលប្រព្រឹត្តបទលើ្មសពិតប្រាកដ មិនមែនដាក់ទោសទៅលើអ្នកដែលគ្មានកំហុសនោះទេ។

លោក ស្រីពុង ឈីវហ្គិច បានប្រាប់វិទ្យុបារាំងនៅថ្ងៃនេះថា ប្រសិនបើគណៈកម្មការពិសេសទាំងបីនោះស៊ើបអង្កេតរកឃើញអ្នកដែលបង្កអំពើហិង្សា និងរកជនដៃដល់ដែលបានបាញ់សម្លាប់មនុស្សយកមកផ្តន្ទាទោសតាមច្បាប់ប្រទេសនោះ នោះកម្ពុជានិងមិនរងការរិះគន់ពីអន្តរជាតិទៀតឡើយ។

គួរបញ្ជាក់ថា អំពើហិង្សានៅលើផ្លូវវ៉េងស្រេង ដែលបានកើតឡើងកាលពីថ្ងៃទី ២ និងទី ៣មករានោះ បានបណ្តាលឲ្យមានមនុស្ស ៤នាក់ស្លាប់ និងរងរបួសជាច្រើននាក់ ហើយមានមនុស្សចំនួន ២៣នាក់ត្រូវបានចាប់ខ្លួន។ អំពើហិង្សានេះ កើតមានឡើង បន្ទាប់ពីការប៉ះទង្គិចគ្នា រវាងកម្មករទាមទារដំឡើងប្រាក់ខែ ១៦០ដុល្លារ និងកងម្លាំងសមត្ថកិច្ចប្រដាប់អាវុធ។

សាធារណៈមតិជាតិ និងអន្តរជាតិបានរិះគន់យ៉ាងខ្លាំងទៅលើអាជ្ញាធរមានសមត្ថកិច្ច ដែលបានប្រើកម្លាំងហួសហេតុបាញ់ទៅលើក្រុមអ្នកតវ៉ា។ ប៉ុន្តែ ភាគីអាជ្ញាធររដ្ឋាភិបាលវិញ បានការពារខ្លួនពីការចោទប្រកាន់ ដោយពន្យល់ថា នេះជាវិធានការការពារខ្លួនទល់នឹងក្រុមកុបករតែប៉ុណ្ណោះ៕