ករណីសមត្ថកិច្ចរដ្ឋាភិបាល មិនស្របច្បាប់របស់ ហ៊ុន សែន ប្រើកាំភ្លើងបាញ់សម្លាប់កម្មករកម្មការិនី និងប្រជាពលរដ្ឋស្លូតត្រង់បណ្តាលឱ្យមនុស្សយ៉ាងតិច៥នាក់ស្លាប់បាត់បង់ជីវិត និងរាប់សិបនាក់ទៀតរងរបួសធ្ងន់និងស្រាលកំពុងស្ថិតក្រោមការស៊ើបអង្កេតយ៉ាងយកចិត្តទុកដាក់របស់មេធាវីអន្តរជាតិ។ នៅក្នុងពេលកើតហេតុគេឃើញមុខ មេបញ្ជាការកងរាជអាវុធហត្ថរាជធានីភ្នំពេញ ឈ្មោះ រ័ត្ន ស្រ៊ាង
មានវត្តមាននៅកន្លែងកើតហេតុខាងមុខសួនឧស្សាហកម្មកាណាឌីយ៉ាតាមបណ្តោយផ្លូវវេងស្រេងនោះដែរ។ ដូច្នេះការស្វែងរកភស្តុតាងរឿងសមត្ថកិច្ចរដ្ឋាភិបាល ហ៊ុន សែន បាញ់សម្លាប់មនុស្សដូចសត្វធាតុមិនមែនជាការលំបាកឡើយព្រោះភស្តុតាងទាំងឡាយត្រូវបានផ្សព្វផ្សាយជាសាធារណៈនៅតាមបណ្តាញហ្វេសប៊ុក ហើយអង្គការសិទ្ធិមនុស្សក្នុងស្រុកនិងអង្គការសិទ្ធិមនុស្សអន្តរជាតិ ក៏បានឃើញហេតុកា រណ៍ផ្ទាល់ភ្នែកផងដែរ។
មេធាវីអន្តរជាតិក្រោមកិច្ចសហការពីគណបក្សសង្គ្រោះជាតិកំពុងពន្លឿនកិច្ចការរបស់ខ្លួនដើម្បីបញ្ជូនសំណុំរឿងប្រឆាំងអំពើមនុស្សឃាតទាំងអស់ទៅតុលាការព្រហ្មទណ្ឌអន្តរជាតិនាពេលឆាប់ៗខាងមុខ។ ការជំរុញដូចខាងលើនេះ បានកើតមានស្របពេលដែលរដ្ឋាភិបាល ហ៊ុន សែន រងការចោទប្រកាន់ថាពោរពេញដោយវប្បធម៌គ្មានទោសពៃរ៍ និងមានអំពើរំលោភសិទ្ធិមនុស្សយ៉ាងពេញបន្ទុក។ ជាពិសេសកាលពីដើមខែមករា ឆ្នាំ២០១៤ ហ៊ុន សែន នាយករដ្ឋមន្ត្រីនៃគណបក្សចាញ់ឆ្នោតបានបញ្ជាឱ្យកម្លាំងប្រដាប់អាវុធបាញ់ប្រហារសម្លាប់កម្មករ កម្មការិនី និងប្រជាពលរដ្ឋស្លូតត្រង់យ៉ាងព្រៃផ្សៃបំផុត។ រាល់បទឧក្រិដ្ឋដែលបានកើតឡើងចាប់ពីថ្ងៃទី១៥ ខែកញ្ញា ឆ្នាំ២០១៣ រហូតមកគឺជាការទទួលខុសត្រូវទាំងស្រុងរបស់ ហ៊ុន សែន ព្រោះកងកម្លាំងប្រដាប់អាវុធទាំងអស់នៅក្រោមបញ្ជារបស់ ហ៊ុន សែន។
មន្ត្រីជាន់ខ្ពស់គណបក្សសង្គ្រោះជាតិបានឱ្យដឹងថា ក្នុងរយៈពេលដ៏ខ្លីខាងមុខនេះ ក្រុមមេធាវីដែលមានជំនាញខាងផ្នែកឧក្រិដ្ឋកម្មអន្តរជាតិនឹងប្រមូលភស្តុតាងទាំងឡាយពាក់ព័ន្ធអំពើហិង្សានៅកម្ពុជាដែលរដ្ឋាភិបាល ហ៊ុន សែន ប្រព្រឹត្តនាពេលកន្លងមកនិងប្រព្រឹត្តកាលពីពេលថ្មីៗកន្លងទៅនេះ។ ការប្រមូលភស្តុតាងរបស់មេធាវីអន្តរជាតិ គឺដើម្បីតតាំងតាមផ្លូវច្បាប់នៅតុលាការព្រហ្មទណ្ឌអន្តរជាតិ ហៅកាត់ថា (ICC) នាពេលឆាប់ៗខាងមុខនេះ។ លោក កឹម សុខា ដែលជាអនុប្រធានគណបក្សសង្គ្រោះជាតិ ក៏បានឱ្យដឹងកាលពីថ្ងៃទី២០ ខែមករា ដែរថា គណបក្សសង្គ្រោះជាតិបានចុះកិច្ចព្រមព្រៀងរួចហើយ ជាមួយមេធាវីអន្តរជាតិកាលពីពេលថ្មីៗកន្លងទៅនេះ។ លោក កឹម សុខាមានប្រសាសន៍ទៀតថាការឈានដល់ចុះកិច្ចសន្យាជាមួយមេធាវីអន្តរជាតិ គឺបន្ទាប់ពីមានព្រឹត្តិការណ៍បាញ់បង្ក្រាបយ៉ាងសាហាវនៅផ្លូវវេងស្រេងកាលពីថ្ងៃទី០៣ ខែមករា នៅពេលដែលកម្មករតវ៉ាទាមទារដំឡើងប្រាក់ខែគោល១៦០ដុល្លារក្នុងមួយខែ។
ក្រុមអ្នកវិភាគឯករាជ្យបានវាយតម្លៃថាកម្តៅនយោបាយក្នុងប្រទេសកម្ពុជាពេលនេះ ពុំមានការថយចុះឡើយ ព្រោះគណបក្សប្រជាជននិង ហ៊ុន សែន ពុំមានឆន្ទៈក្នុងការដោះស្រាយវិបត្តិនយោបាយតាមអនុសាសន៍របស់សហគមន៍អន្តរជាតិនោះទេ។ ផ្ទុយទៅវិញ ហ៊ុន សែន កំពុងប្រើប្រាស់គ្រប់មធ្យោបាយដើម្បីក្រាញអំណាចបំពានលើឆន្ទៈប្រជាពលរដ្ឋខ្មែរយ៉ាងកំរោល និងអនុវត្តន៍តាមយុទ្ធសាស្ត្ររបស់មេដឹកនាំយួនដោយគ្មានសេចក្តីអៀនខ្មាសទាល់តែសោះ។ ដោយសារតែ ហ៊ុន សែន ខំប្រឹងក្រាញអំណាចក្រោយពេលគណបក្សប្រជាជនចាញ់ឆ្នោត ទើបធ្វើឱ្យប្រទេសកម្ពុជាធ្លាក់ក្នុងវិបត្តិនយោបាយធ្ងន់ធ្ងរមិនទាន់មានច្រកដោះស្រាយដូចសព្វថ្ងៃ។ ទោះជាយ៉ាងណាគ្រប់អំពើដែល ហ៊ុន សែន បានប្រព្រឹត្តគឺ ហ៊ុន សែន នឹងត្រូវទទួលលទ្ធផលវិញនាពេលឆាប់ៗខាងមុខជាមិនខាន គឺអ្នកស្រាបព្រោះខ្យល់ត្រូវទទួលផលជាព្យុះសង្ឃរា។
ប្រទេសកម្ពុជាបានផ្តល់សច្ចាប័នរួចហើយ នៅទីក្រុងរ៉ូម ប្រទេសអុីតាលី កាលពីខែមករា ឆ្នាំ២០០២ ក្នុងនាមជារដ្ឋដែលប្រឆាំងអំពើឧក្រិដ្ឋកម្មប្រឆាំងមនុស្សជាតិនិងឧក្រិដ្ឋកម្មសង្គ្រាមគឺចាប់ពីពេលនោះមកប្រទេសកម្ពុជាបានក្លាយជាសមាជិកតែមួយគត់របស់តុលាការព្រហ្មទណ្ឌអន្តរជាតិ(ICC) ប្រចាំតំបន់អាស៊ី។ ផែនការចម្បងរបស់តុលាការឧក្រិដ្ឋកម្មអន្តរជាតិ គឺផ្តោតលើកិច្ចការ ឬមានយុត្តាធិការគ្របដណ្តប់មួយចំនួនដូចជាប្រឆាំងការរំលោភបំពានដ៏ហិង្សាទៅលើប្រជាពលរដ្ឋនិងប្រឆាំងចំពោះការរំលោភបំពានពីភាគីម្ខាងលើបញ្ហាបូរណភាពដែនដីមកលើរដ្ឋជាសមាជិករបស់ខ្លួន។ ក្រៅពីនេះតុលាការព្រហ្មទណ្ឌអន្តរជាតិក៏ទទួលការពារសិទ្ធិធ្វើសេចក្តីវិនិច្ឆ័យលើសំណុំរឿងពីក្រុមប្រឹក្សាសន្តិសុខអង្គការសហប្រជាជាតិផងដែរ ថ្វីបើតុលាការនេះពុំមែនជាផ្នែកមួយនៃសមាជិករបស់ក្រុមប្រឹក្សាសន្តិសុខអង្គការសហប្រជាជាតិយ៉ាងណាក៏ដោយ។
ក្រុមមន្ត្រីអង្គការសិទ្ធិមនុស្សក្នុងប្រទេសកម្ពុជាបានរិះគន់ថាអំពើរបស់រដ្ឋាភិបាលមិនស្របច្បាប់ដឹកនាំដោយ ហ៊ុន សែន នាយករដ្ឋមន្ត្រីនៃគណបក្សចាញ់ឆ្នោតកាលពីពេលថ្មីៗនេះ គឺជាឧក្រិដ្ឋកម្មប្រឆាំងមនុស្សជាតិយ៉ាងពិតប្រាកដ។ ដោយហេតុថាគ្រាន់តែកម្មករ កម្មការិនី ប្រមូលផ្តុំគ្នាធ្វើការតវ៉ាដោយអហិង្សាទាមទារប្រាក់ខែគោល១៦០ដុល្លារសោះបែរជារដ្ឋាភិបាល ហ៊ុន សែន បញ្ជាឱ្យសមត្ថកិច្ចប្រដាប់អាវុធបាញ់សម្លាប់កម្មករ កម្មការិនីនិងប្រជាពលរដ្ឋស្លូតត្រង់យ៉ាងព្រៃផ្សៃបំផុត។ មិនតែប៉ុណ្ណោះសមត្ថកិច្ចនៃរដ្ឋាភិបាលហ៊ុន សែន បានចាប់ឃុំខ្លួនសកម្មជនអង្គការក្រៅរដ្ឋាភិបាលនិងកម្មករចំនួន២៣នាក់យកទៅឃុំឃាំងនៅក្នុងពន្ធនាគារត្រពាំងផ្លុងដែលជាពន្ធនាគារសម្រាប់ឃុំឃាំងឧក្រិដ្ឋជនទៅវិញ។ ទង្វើរបស់រដ្ឋាភិបាល ហ៊ុន សែន គឺជាអំពើរំលោភសិទ្ធិមនុស្សយ៉ាងធ្ងន់ធ្ងរ និងជាបទឧក្រិដ្ឋប្រឆាំងមនុស្សជាតិយ៉ាងច្បាស់ក្រឡែតតែម្តង។
ក្រុមមន្ត្រីអង្គការក្រៅរដ្ឋាភិបាលបានលើកឡើងថា ការដែលមេធាវីអន្តរជាតិចាប់ផ្តើមស៊ើបអង្កេតលើករណីបាញ់រះសម្លាប់កម្មករ កម្មការិនី និងប្រជាពលរដ្ឋស្លូតត្រង់នៅមុខសួនឧស្សាហកម្មកាណាឌីយ៉ា កាលពីថ្ងៃទី០៣ ខែមករា ឆ្នាំ២០១៤ គឺជាជំហានមួយដើម្បីដាក់ទោសក្រុមឧក្រិដ្ឋជន។ អ្វីដែលគួរឱ្យកត់សម្គាល់នោះនៅមុនកើតហេតុគេឃើញវត្តមានរបស់មេបញ្ជាការកងរាជអាវុធហត្ថរាជធានីភ្នំពេញ ឈ្មោះ រ័ត្ន ស្រ៊ាង និងមន្ត្រីន គរបាលមួយចំនួននៅក្បែរកន្លែងកើតហេតុដែរ។ បើទោះបីបុគ្គល រ័ត្ន ស្រ៊ាង ធ្លាប់បដិសេធថាសមត្ថកិច្ចកងរាជអាវុធហត្ថមិនបានប្រើកាំភ្លើងបាញ់សម្លាប់កម្មករនិងប្រជាពលរដ្ឋស្លូតត្រង់យ៉ាងណាក៏ដោយ ក៏រូបភាពផ្សព្វផ្សាយតាមបណ្តាញហ្វេសប៊ុកបានលាតត្រដាងរួចទៅហើយ។ ជាងនេះទៅទៀតនៅតាមសារព័ត៌មាន គេហទំព័រ និងទស្សនាវដ្តីមួយចំនួនសុទ្ធតែបានផ្សព្វផ្សាយរូបភាពកម្លាំងប្រដាប់អាវុធតម្រង់ចុងកាណុងកាំភ្លើងបាញ់រះទៅលើកម្មករ និងពលរដ្ឋស្លូតត្រង់ដូច្នេះបុគ្គល រ័ត្ន ស្រ៊ាង មិនអាចបិទបាំងការពិតបានទេ។
ក្រុមអ្នកសង្កេតការណ៍ឯករាជ្យមួយចំនួនបានរិះគន់ថាមួយរយៈពេលចុងក្រោយនេះសាលារាជធានីភ្នំពេញ និងសាលាខណ្ឌនានាបានបង្កើតក្រុមសន្តិសុខបិទមុខស្អីគេនោះ ដើម្បីប្រើអំពើហិង្សាទៅលើប្រជាពលរដ្ឋស្លូតត្រង់យ៉ាងកំរោល។ ក្រុមសន្តិសុខដែលពាក់ម៉ាស់មុខនិងពាក់មួកសុវត្ថិភាពបិទបាំងអត្តសញ្ញាណរបស់ខ្លួនកំពុងតែក្លាយទៅជាក្រុមឧក្រិដ្ឋជនធ្វើបាបនិងសម្លាប់ប្រជាពលរដ្ឋខ្មែរស្លូតត្រង់យ៉ាងព្រៃផ្សៃបំផុត។ ដូច្នេះការដែលមេធាវីអន្តរជាតិស្រាវជ្រាវសំណុំរឿងឧក្រិដ្ឋកម្មសម្លាប់មនុស្សជាបន្តបន្ទាប់ដើម្បីនាំយកក្រុមជនដៃដល់និងអ្នកបញ្ជាពីក្រោយខ្នងទៅកាត់ទោសនៅក្នុងតុលាការព្រហ្មទណ្ឌអន្តរជាតិ គឺជារឿងសំខាន់បំផុត៕
ប្រភព៖មនសិការខ្មែរ
Labels:
ព័ត៌មានជាតិ
Previous Article
