ក្រុមហ៊ុនមេឈ្មួញ ទ្រី ភាព ឈូសឆាយបំផ្លាញព្រៃសហគមន៍នៅស្រុករវៀង ខេត្តព្រះវិហារ

មេឈ្មួញ ទ្រី ភាព ដែលល្បីល្បាញខាងបំផ្លាញព្រៃឈើឱ្យរលត់រលាយដោយអាងមានខ្នងបង្អែកយ៉ាងរឹងមាំកំពុងបន្តសកម្មភាពឈូសឆាយបំផ្លាញព្រៃឈើនិងកាប់ឈើធ្វើអាជីវកម្មខុសច្បាប់ក្នុងខេត្តព្រះវិហារយ៉ាងពេញបន្ទុក។ ប្រភពពីពលរដ្ឋនៅភូមិអូរពោធិ៍ ឃុំរមណី ស្រុករវៀង បាន
ចោទប្រកាន់ក្រុមហ៊ុនទ្រីភាព ពីបទធ្វើសកម្មភាពឈូសឆាយពង្រីកដីសម្បទានសេដ្ឋកិច្ចប៉ះពាល់ដល់ព្រៃសហគមន៍នៅជាប់ព្រំប្រទល់គ្នាយ៉ាងកំរោល។ ពលរដ្ឋបានអះអាងថាបើទោះបីជាក្រុមហ៊ុនរបស់មេឈ្មួញ ទ្រី ភាព ឈូសឆាយបំពានចូលមកក្នុងដីព្រៃសហគមន៍យ៉ាងគឃ្លើនក៏ដោយ ក៏អាជ្ញាធរឃុំរមណី និងអាជ្ញាធរស្រុករវៀង មិនបានយកចិត្តទុកដោះស្រាយអំពីកង្វល់និងសេចក្តីព្រួយបារម្ភរបស់អ្នកភូមិដែលជាអ្នកការពារព្រៃឈើទេ។

តំណាងសហគមន៍ព្រៃឈើបឹងទន្លេម្រេច នៅភូមិអូរពោធិ៍ ជាច្រើនរូបបានធ្វើដំណើរទៅកាន់ទីរួមខេត្តព្រះវិហារ កាលពីថ្ងៃចន្ទ ទី២០ ខែមករា ឆ្នាំ២០១៤ ដើម្បីដាក់ពាក្យប្តឹងក្រុមហ៊ុនទ្រីភាព ទៅតុលាការពីបទប្រើគ្រឿងចក្រឈូសឆាយបំផ្លាញព្រៃសហគមន៍ជាច្រើនហិកតា។ ក្រុមមន្ត្រីអង្គការក្រៅរដ្ឋាភិបាលក្នុងខេត្តព្រះវិហារកំពុងជួយជ្រោមជ្រែងដល់សហគមន៍ការពារព្រៃឈើដើម្បីតតាំងតាមផ្លូវច្បាប់ជាមួយក្រុមហ៊ុនទ្រីភាព នៅក្នុងតុលាការព្រោះក្រុមហ៊ុននេះកំពុងបំពានលើព្រៃសហគមន៍យ៉ាងធ្ងន់ធ្ងរ។ តំណាងសហគមន៍បានសហការជាមួយក្រុមមន្ត្រីសមាគមការពារសិទ្ធិមនុស្សអាដហុក ដើម្បីរៀបចំពាក្យបណ្តឹងដាក់ចូលតុលាការប្តឹងក្រុមហ៊ុនទ្រីភាព ពីបទព្យាយាមដណ្តើមកាន់កាប់ដីព្រៃសហគមន៍ប្រមាណ១៥ហិកតា។ តំណាងសហគមន៍ព្រៃឈើលោក ហួន គាណូ បានបញ្ជាក់ថាក្រុមហ៊ុនទ្រីភាពបំផ្លាញព្រៃសហគមន៍ធ្វើឱ្យខូចខាតអស់យ៉ាងច្រើន គឺគេឈូសឆាយ ហើយធ្វើបង្គោលរបង ទោះបីប្រជាពលរដ្ឋព្យាយាមហាមឃាត់យ៉ាងណាក៏ដោយ។

ទាក់ទងនឹងបញ្ហាខាងលើនេះប្រធានស្តីទីក្រុមប្រឹក្សាឃុំរមណី លោក សូរ សៀ បានទទួលស្គាល់ថាកន្លងទៅក្រុមហ៊ុនទ្រីភាពពិតជាបានឈូសឆាយប៉ះពាល់ដីព្រៃសហគមន៍ខ្លះមែនហើយអាជ្ញាធរឃុំ ក៏បានធ្វើការសម្របសម្រួល ក៏ប៉ុន្តែមិនបានដឹងថាប្រជាសហគមន៍ប្តឹងរឿងនោះទៅតុលាការទេ។ ចំណែកប្រជាសហគមន៍បានឱ្យដឹងថាដោយសារតែពួកគាត់គ្មានជំនឿលើដំណោះស្រាយរបស់អាជ្ញាធរឃុំ និងអាជ្ញាធរស្រុក ដែលខ្លាចអំណាចរបស់មេឈ្មួញទ្រីភាព ទើបពួកគាត់សម្រេចដាក់ពាក្យបណ្តឹងទៅកាន់តុលាការតាមផ្លូវច្បាប់។ ដោយហេតុថាបើពឹងផ្អែកទៅលើដំណោះស្រាយរបស់អាជ្ញាធរគ្រប់លំដាប់ថ្នាក់មិនអាចទៅរួចទេ ព្រោះអាជ្ញាធរការពារផលប្រយោជន៍ក្រុមហ៊ុនទ្រីភាពយ៉ាងក្រអឺតក្រទម។

ប្រភពពីមន្ត្រីអង្គការក្រៅរដ្ឋាភិបាលក្នុងខេត្តព្រះវិហារបានឱ្យដឹងថា កន្លងមកក្រុមហ៊ុនទ្រីភាព បានប្រើគ្រឿងចក្រឈូសឆាយរំលោភលើដីព្រៃសហគមន៍ជាច្រើនហិកតា ហើយនៅពេលប្រជាសហគមន៍នាំគ្នាតវ៉ាគេបែរជាប្តឹងទៅតុលាការចោទប្រកាន់ពលរដ្ឋពីបទរារាំងកិច្ចការសាធារណៈទៅវិញ។ ជាក់ស្តែងកាលពីថ្ងៃទី១៥ ខែមករា ឆ្នាំ២០១៤ តំណាងអយ្យការអមសាលាដំបូងខេត្តព្រះវិហារ បានចេញដីកាកោះហៅតំណាងអ្នកភូមិអូរពោធិ៍ ១០នាក់ទៅសាកសួរជុំវិញករណីរារាំងកិច្ចការសាធារណៈដោយសារតែអ្នកភូមិបានតវ៉ាជុំវិញរឿងដីធ្លីនេះ។ ប្រការនេះហើយដែលធ្វើឱ្យតំណាងសហគមន៍ការពារព្រៃឈើក្នុងឃុំរមណី ត្រូវស្វះស្វែងរកអន្តរាគមន៍ពីមន្ត្រីអង្គការក្រៅរដ្ឋាភិបាលដើម្បីប្តឹងក្រុមហ៊ុនទ្រីភាពទៅតុលាការពីបទបំផ្លាញព្រៃសហគមន៍។

មន្ត្រីអង្គការក្រៅរដ្ឋាភិបាលក្នុងខេត្តព្រះវិហារដែលឃ្លាំមើលបទល្មើសបំផ្លាញព្រៃឈើបានឱ្យដឹងថាពួកគេបានចុះទៅពិនិត្យតំបន់ដែលក្រុមហ៊ុនទ្រីភាព បំផ្លាញព្រៃសហគមន៍ ហើយរកឃើញថាក្រុមហ៊ុននោះពិតជាបានឈូសឆាយធ្វើឱ្យប៉ះពាល់ដីព្រៃសហគមន៍ជាច្រើនហិកតា។ ក្រុមមន្ត្រីអង្គការក្រៅរដ្ឋាភិបាលបានលើកឡើងទៀតថា ពួកគេកំពុងជួយដល់តំណាងសហគមន៍ក្នុងការដាក់ពាក្យបណ្តឹងប្រឆាំងក្រុមហ៊ុនទ្រីភាពដែលបំផ្លាញព្រៃសហគមន៍ប្រមាណ១៥ហិកតា ព្រោះអាជ្ញាធរឃុំ និងអាជ្ញាធរស្រុកមិនយកចិត្តទុកដាក់ជួយដល់តំណាងសហគមន៍ការពារព្រៃឈើឡើយ។ មិនតែប៉ុណ្ណោះអាជ្ញាធរឃុំនិងអាជ្ញាធរស្រុកចេះតែរកលេសដោះសាយករួចខ្លួនដោយសារខ្លាចអំណាចរបស់មេឈ្មួញ ទ្រី ភាព ដែលមានទំនាក់ទំនងជិតស្និទ្ធជាមួយ ហ៊ុន សែន នាយករដ្ឋមន្ត្រីនៃគណបក្សចាញ់ឆ្នោត។ សូម្បីតែលោក អ៊ុំ ម៉ារ៉ា អភិបាលខេត្តព្រះវិហារ ក៏មិនដែលហ៊ានក្អកជាមួយមេឈ្មួញទ្រី ភាព ដែរ បើទោះបីក្រុមហ៊ុនរបស់មេឈ្មួញរូបនេះបំផ្លាញព្រៃឈើយ៉ាងមហន្តរាយក៏ដោយ។

ប្រជាសហគមន៍ការពារព្រៃឈើក្នុងឃុំរមណី និងនៅតាមបណ្តាស្រុកមួយចំនួនទៀតបានរិះគន់ថាមេឈ្មួញ ទ្រី ភាព មិនត្រឹមតែប្រើអំណាចរំលោភបំពានយកដីព្រៃសហគមន៍តាមតែអំពើចិត្តប៉ុណ្ណោះទេ គឺថែមទាំងធ្វើសកម្មភាពដឹកជញ្ជូនឈើធ្វើអា ជីវកម្មខុសច្បាប់យ៉ាងអនាធិបតេយ្យមិនដែលមានសមត្ថកិច្ចណាប៉ះពាល់ឡើយ។ ប្រជាពលរដ្ឋបានរិះគន់ថា មេឈ្មួញទ្រី ភាព មានសិទ្ធិអំណាចខ្លាំងណាស់ក្នុងការបំផ្លាញព្រៃឈើនិងដឹកជញ្ជូនឈើចេញពីខេត្តព្រះវិហារយ៉ាងពេញបន្ទុក ហើយអាជ្ញាធរនិងសមត្ថកិច្ចពាក់ព័ន្ធមិនដែលហ៊ានក្អកជាមួយមេឈ្មួញរូបនេះទេ ព្រោះគេដឹងថាមេឈ្មួញទ្រី ភាព មានទំនាក់ទំនងជិតស្និទ្ធជាមួយអ្នកកាន់អំណាចបច្ចុប្បន្ន៕
ប្រភព៖មនសិការខ្មែរ