អ្នករាយការណ៍ពិសេសសហប្រជាជាតិបញ្ចប់ទស្សនកិច្ចនៅកម្ពុជា

លោក សូរិយា ប្រាសាទ ស៊ូប៊ែឌី អ្នករាយការណ៍ពិសេសអ.ស.ប ទទួលបន្ទុកសិទ្ធិមនុស្សប្រចាំកម្ពុជា

លោក សុរិយា ប្រាសាទ ស៊ូប៊ែឌី អ្នករាយការណ៍ពិសេសខាងសិទ្ធិមនុស្សអង្គការសហប្រជាជាតិប្រចាំកម្ពុជានឹងបញ្ចប់ទស្សនកិច្ចនៅកម្ពុជានៅថ្ងៃនេះ។ លទ្ធផលនៃដំណើរទស្សនកិច្ចរយៈពេល៥ថ្ងៃនេះនឹងត្រូវបង្ហាញនៅក្នុងសន្និសីទកាសែតមួយនៅរសៀលថ្ងៃព្រហស្បតិ៍នេះ។ ក្នុងអំឡុងពេលស្នាក់នៅ

ក្នុងប្រទេសកម្ពុជា លោក ស៊ូប៊ែឌី បានជួបពិភាក្សាការងារយ៉ាងទូលំទូលាយជាមួយគ្រប់ភាគីរាប់ទាំងភាគីរដ្ឋាភិបាលផងដែរ។អ្នករាយការណ៍ពិសេសខាងសិទ្ធិមនុស្សរបស់អង្គការសហប្រជាជាតិ លោក សុរិយា ប្រាសាទ ស៊ូប៊ែឌី នឹងបញ្ចប់ទស្សនកិច្ចរបស់ខ្លួននៅលើទឹកដីកម្ពុជានៅថ្ងៃនេះហើយ។ លោកបានមកដល់កម្ពុជាកាលពីល្ងាចថ្ងៃទី១២មករាក្នុងដំណើរទស្សនកិច្ចរយៈពេល៥ថ្ងៃដើម្បីស្វែងយល់ពីបញ្ហាសិទ្ធិមនុស្សនៅកម្ពុជា។ ទស្សនកិច្ចលើកនេះក៏ដើម្បីតាមដានមើលការអនុវត្តអនុសាសន៍របស់លោកដែលបានដាក់ជូនរដ្ឋាភិបាលក្រុងភ្នំពេញកាលពីលើកមុនៗផងដែរ។

ក្នុងអំឡុងពេលស្នាក់នៅប្រទេសកម្ពុជា លោក សុរិយា ប្រាសាទស៊ូប៊ែឌី បានជួបពិភាក្សាការងារយ៉ាងទូលំទូលាយជាមួយគ្រប់ភាគី។ លោកបានទទួលញត្តិពីក្រុមពលរដ្ឋនិងនិស្សិតដែលបង្ហាញពីបញ្ហារបស់ពួកគេ។ តំណាងពិសេសសហប្រជាជាតិក៏បានជួបជាមួយតំណាងសង្គមស៊ីវិល សហជីព ជាមួយបក្សប្រឆាំង និងជាពិសេសជាមួយលោកនាយករដ្ឋមន្ត្រី ហ៊ុន សែន ផងដែរ។

ក្នុងជំនួបទាំងនោះ លោក ស៊ូប៊ែឌី បានស្តាប់របាយការណ៍នានាដែលគ្រប់ភាគីរាយការណ៍ជូន។ អង្គការសង្គមស៊ីវិលបានសុំឲ្យតំណាងពិសេសជួយអន្តរាគមន៍ដោះស្រាយបញ្ហានយោបាយ និងបានរាយការណ៍ជូនអំពីករណីរំលោភសិទ្ធិមនុស្សជាច្រើន។ ចំណែកគណបក្សប្រឆាំងវិញក៏បានរាយការណ៍ពីស្ថានការណ៍នយោបាយ និងជំរុញឲ្យសហប្រជាជាតិជួយការពារសិទ្ធិមនុស្សនៅកម្ពុជា។ នេះបើយោងតាមលោកសម រង្ស៊ី ដែលបានប្រាប់វិទ្យុបារាំងអន្តរជាតិកាលពីថ្ងៃអង្គារ។

ចំណែក ក្រុមសហជីពវិញ ក៏បានលើកបញ្ហា៦ចំណុចឲ្យលោក ស៊ូប៊ែឌី ជួយអន្តរាគមន៍។ បញ្ហាទាំងនោះមានដូចជា ការទាមទារដំឡើងប្រាក់ខែ សុវត្ថិភាពរបស់មេដឹកនាំសហជីព និងការទាមទារឲ្យចាប់ខ្លួនជនដៃដល់ដែលបសនបាញ់សម្លាប់កម្មករជាដើម។ នេះបើយោងតាមលោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យដែលជាតំណាងអ្នកចូលរួម។

លោក ស៊ូប៊ែឌី បានលើកបញ្ហាទាំងនេះជាមួយមេដឹកនាំរដ្ឋាភិបាលក្នុងជំនួបរយៈពេល៣ម៉ោងកន្លះកាលពីថ្ងៃម្សិលមិញ។ រដ្ឋាភិបាលក៏បានរាយការណ៍ជូនលោក ស៊ូប៊ែឌី អំពីបញ្ហាទាំងអស់នេះនិងបកស្រាយការពារខ្លួនវិញផងដែរ។ នេះបើតាមលោកឱម យ៉ិនទៀង ប្រធានគណៈកម្មការសិទ្ធិមនុស្សរបស់រដ្ឋាភិបាលដែលបានប្រាប់អ្នកកាសែត។ លទ្ធផលនៃជំនួបទាំងនោះនឹងត្រូវលោកស៊ូប៊ែឌីបញ្ចេញឲ្យដឹងនៅក្នុងសន្និសីទកាសែតនៅរសៀលថ្ងៃព្រហស្បតិ៍នេះនៅពេលដែលលោកបិទបញ្ចប់ទស្សនកិច្ចនៅកម្ពុជា៕