ថ្នាក់ដឹកនាំគណបក្សសង្គ្រោះជាតិ លោកប្រធាន សម រង្ស៊ី និងលោកអនុប្រធាន កឹម សុខា បានអញ្ជើញទៅកាន់សាលាដំបូងរាជធានីភ្នំពេញ កាលពីព្រឹកថ្ងៃទី១៤ ខែមករា ម្សិលមិញនេះ ទៅតាមការកោះហៅរបស់តំណាងអយ្យការទាក់ទិនពាក្យបណ្តឹងពីបទញុះញង់ឲ្យមានអំពើហិង្សា បើទោះបីជាថ្នាក់ដឹកនាំគណបក្សសង្គ្រោះជាតិ មិនបានប្រព្រឹត្តអ្វីខុសនិងចាត់ទុកថា ការប្តឹងផ្តល់នេះ ជាហេតុផលនយោបាយក្នុងន័យ
គំរាមកំហែងបំភិតបំភ័យក៏ដោយ ក៏មិនក្រែងញញើតក្នុងការចូលទៅបំភ្លឺនោះដែរ។ ហើយទិដ្ឋភាពជារួម គេសង្កេតឃើញប្រជាពលរដ្ឋជាច្រើនម៉ឺននាក់ បានប្រមូលផ្តុំគ្នានៅកកកុញពេញមុខបរិវេណតុលាការ ពោលគឺចន្លោះពីរង្វង់មូលនាងគង្ហីង មកដល់ស្តុបអាងទឹកមានប្រជាពលរដ្ឋសកម្មជនសិទ្ធិមនុស្សមកចូលរួមតាមដានសង្កេតការណ៍ពីការចូលខ្លួនទៅឆ្លើយបំភ្លឺតាមពាក្យបណ្តឹងរបស់ថ្នាក់ដឹកនាំគណបក្សសង្គ្រោះជាតិ ជាការលើកទឹកចិត្តនិងជួយហែហមការពារវីរជនស្នេហាជាតិ ដ៏ឧត្តុង្គឧត្តម ដែលជានិច្ចកាលបានលះបង់គ្រប់បែបយ៉ាងដើម្បីជាតិមាតុភូមិ និងប្រជារាស្ត្រខ្មែរទូទៅ។
លោកប្រធាន សម រង្ស៊ី និងលោកអនុប្រធាន កឹម សុខា បានចាកចេញពីបរិវេណសាលាដំបូងរាជធានីភ្នំពេញ នៅវេលាម៉ោង១និង៤០នាទីរសៀល ថ្ងៃទី១៤ ខែមករា ឆ្នាំ២០១៤ លោកប្រធាន សម រង្ស៊ី បានមានប្រសាសន៍ទៅកាន់បងប្អូនប្រជាពលរដ្ឋនៅមុខសាលាដំបូងរាជធានីភ្នំពេញថា ”ខ្ញុំបានមកឆ្លើយសំណួររបស់តុលាការ ហើយជំរុញឲ្យមានយុត្តិធម៌សម្រាប់ប្រជាពលរដ្ឋខ្មែរទូទៅ និងសូមអរគុណដល់បងប្អូនពលរដ្ឋដែលបានមកជួយឃ្លាំមើលនៅទីនេះ។ ប្រជារាស្ត្រខ្មែរត្រូវតែទទួលបានជ័យជំនះយើងបន្តដើរលើផ្លូវប្រជាធិបតេយ្យជាមួយគ្នា ដើម្បីសម្រេចនូវគោលដៅដែលយើងចង់បាន”។ លោកប្រធាន សម រង្ស៊ី បានអញ្ជើញធ្វើដំណើរពីសាលាដំបូងរាជធានីភ្នំពេញ ទៅកាន់ទីស្នាក់ការកណ្តាលគណបក្សសង្គ្រោះជាតិ នាសង្កាត់ចាក់អង្រែលើខណ្ឌមានជ័យ ដោយមានប្រជាពលរដ្ឋរាប់ម៉ឺននាក់ហែហមទៅជាមួយផងដែរ ដែលនៅទីនោះ លោកប្រធាន សម រង្ស៊ី បានពន្យល់យ៉ាងលម្អិតពីហេតុការណ៍ដែលកើតឡើងអំឡុងពេលឆ្លើយសំណួរនៅតុលាការ។
លោក កឹម សុខា ពេលដើរចាកចេញពីបរិវេណតុលាការ ត្រូវបានអ្នកសារព័ត៌មានជាតិ អន្តរជាតិសាកសួរអំពីដំណើរការចូលទៅឆ្លើយបំភ្លឺនៅចំពោះមុខតំណាងអយ្យការ ដោយលោកបានមានប្រសាសន៍ថា យើងគ្មានជំនឿលើប្រព័ន្ធតុលាការ នៅក្នុងប្រទេសកម្ពុជានោះទេ ដូច្នេះខ្មែរត្រូវតែក្រោកឈរឡើងទាំងអស់គ្នាដើម្បីទាមទារយុត្តិធម៌ យើងមិនត្រូវចុះញ៉មនោះទេ យើងត្រូវក្រោកឈរឡើងដើម្បីការពារយុត្តិធម៌សង្គមទាំងអស់គ្នា។ ពាក់ព័ន្ធនឹងសំណួរដែលលើកឡើងថា តើការចោទប្រកាន់នេះធ្វើឡើងក្នុងរបៀបយ៉ាងម៉េច?ត្រូវបានលោក កឹម សុខា លើកឡើងថា ការចោទប្រកាន់នេះគឺជាការគំរាមកំហែងផ្នែកនយោបាយសុទ្ធសាធ ហើយយើងគ្មានជំនឿអ្វីទាល់តែសោះ បើយើងសួរព្រះរាជអាជ្ញា ឬសួរទៅមន្ត្រីតុលាការ ក៏គេមិនហ៊ានប្រាប់យើងដែរ ច្បាស់ណាស់ដែលថាមានអ្នកនយោបាយ ឬអ្នកមានអំណាចបញ្ជាពួកគេ។ ក្រៅពីថ្លែងអំណរគុណដល់ បងប្អូនប្រជាពលរដ្ឋទាំងអស់ដែលបានចូលរួមសង្កេតការណ៍ នៅសាលាដំបូងរាជធានីភ្នំពេញ ថ្នាក់ដឹកនាំបក្សសង្គ្រោះជាតិក៏បានអំពាវនាវឲ្យប្រជាពលរដ្ឋខ្មែរទូទៅក្រោកឈរឡើងរួមកម្លាំងគ្នា ដើម្បីស្វែងរកយុត្តិធម៌ទាំងអស់គ្នាយើងមិនត្រូវចុះចាញ់ជាដាច់ខាត។
ចាប់ផ្តើមបើកឆាកដំបូង លោក រ៉ុង ឈុន ត្រូវបានចូលខ្លួនទៅឆ្លើយបំភ្លឺនៅចំពោះមុខតំណាងអយ្យការ គឺលោក ហៀង សុភ័ក្ត្រ ចាប់ពីម៉ោង៨ព្រឹក រហូតដល់ម៉ោង៩និង៣០នាទី។ បន្ទាប់មកលោក កឹម សុខា ក៏បានចូលទៅឆ្លើយបំភ្លឺនៅចំពោះមុខតំណាងអយ្យការចាប់ពីម៉ោង៩និង៣៥នាទី បន្តពីលោក រ៉ុង ឈុន ដែលនៅមុខបន្ទប់តំណាងអយ្យការអ្នកតំណាងរាស្ត្រ ជាប់ឆ្នោត របស់គណបក្សសង្គ្រោះជាតិច្រើនកុះករជួបជុំគ្នានៅទីនោះ។ យោងតាមដីកាកោះ លោកប្រធាន សម រង្ស៊ី ត្រូវចូលទៅឆ្លើយបំភ្លឺនៅចំពោះមុខតំណាងអយ្យការនៅវេលាម៉ោង១០ព្រឹក ថ្ងៃទី១៤ ខែមករា ហើយលោកបានអញ្ជើញទៅដល់បរិវេណសាលាដំបូងរាជធានីភ្នំពេញ តាមពេលវេលាដែលបានកំណត់ មិនយឺតសូម្បីតែ១នាទី ដោយលោកប្រធាន សម រង្ស៊ី បានអង្គុយរង់ចាំនៅមុខបន្ទប់តំណាងអយ្យការ ប្រកបដោយភាពស្វាហាប់អង់អាចក្លាហាន ដើម្បីការពារភាពស្អាតស្អំរបស់លោកដែលត្រូវបានគេប្តឹងចោទប្រកាន់តាមហេតុផលនយោបាយទាំងបំពាន។
នៅមុខបរិវេណសាលាដំបូងរាជធានីភ្នំពេញ ប្រជាពលរដ្ឋមន្ត្រី រាជការ និស្សិតបាននាំគ្នាចូលរួម សង្កេតការណ៍ជាច្រើនម៉ឺននាក់ ហើយនៅវេលាម៉ោង១០ព្រឹក លោកប្រធាន សម រង្ស៊ី បានអញ្ជើញទៅកាន់តុលាការ គ្រាន់តែដល់អាងទឹកស្តាតអូឡាំពិក រកកន្លែងដើរគ្មានទេ ព្រោះប្រជាពលរដ្ឋច្រើនកកកុញបានទៅចូលរួមលើកទឹកចិត្ត និងស្រែកលាន់ឮកងរំពងថា យុត្តិធម៌ត្រូវតែឈ្នះភាពអយុត្តិធម៌ ហើយសច្ចធម៌ នឹងការពារភាពស្អាតស្អំរបស់ លោកប្រធាន សម រង្ស៊ី ដែលមិនបានប្រព្រឹត្តអ្វីខុស។ ប្រជាពលរដ្ឋរាប់ម៉ឺននាក់បានឈរតម្រៀបជួរគ្នាបើកផ្លូវឲ្យលោកប្រធាន សម រង្ស៊ី ធ្វើដំណើរឆ្លងកាត់ទៅកាន់តុលាការ ជាមួយសំឡេងទះដៃលើកទឹកចិត្តគួរឲ្យរំភើបខ្លាំងណាស់ ហើយប្រជាពលរដ្ឋដែលបានចូលរួមសង្កេតការណ៍បាននាំគ្នាថ្កោលទោសខ្លាំងក្លាចំពោះអាជ្ញាធរគណបក្សប្រជាជនដែលព្យាយាមតាមគ្រប់មធ្យោបាយក្នុងការធ្វើទុក្ខបុកម្នេញ អ្នកស្នេហាជាតិ អ្នកស្រឡាញ់យុត្តិធម៌ និងអ្នកការពារកម្មករពិតៗ។
នៅមុនពេលថ្នាក់ដឹកនាំគណបក្សសង្គ្រោះជាតិ អញ្ជើញទៅដល់សាលាដំបូងរាជធានីភ្នំពេញ គេសង្កេតឃើញអាជ្ញាធរបានបញ្ជូនក្រុមបាតដៃទី៣ ដែលមានពាក់មួកការពារស្លៀកពាក់ស៊ីវិល ប៉ុន្តែប្រដាប់ដោយដំបង និងរបស់ផ្សេងៗទៀតនៅក្នុងអាវ មិនដឹងជាគេបញ្ជូនមកក្នុងគោលបំណងអ្វីទេ ប៉ុន្តែបើតាមរឿងហេតុកន្លងមកការបញ្ជូនក្រុមបាតដៃទី៣ទាំងនេះ ចូលមកទីតាំងដែលប្រជាពលរដ្ឋប្រមូលផ្តុំគ្នា គឺគ្មានអ្វីក្រៅពីមកអុកឡុុកបង្កអំពើហិង្សាលើប្រជារាស្ត្រស្លូតត្រង់នោះទេ។ យ៉ាងណាក៏ដោយ សមាសភាពរបស់បាតដៃទី៣ទាំងនេះ ត្រូវបានប្រជាពលរដ្ឋស្គាល់ដំណើរស្គាល់មុខអស់ហើយ គ្រាន់តែក្រុមនេះទៅដល់មុខសាលាដំបូងរាជធានីភ្នំពេញ គេសង្កេតឃើញមន្ត្រីគណបក្សសង្គ្រោះជាតិនិងពលរដ្ឋបានអង្វរសុំឲ្យពួកគេចាកចេញទៅកាន់កន្លែងសមគួរមួយ ដើម្បីបញ្ចៀសកុំឲ្យមានការប្រើអំពើហិង្សាមកលើប្រជារាស្ត្រស្លូតត្រង់។
ស្ថានភាពនៅមុខសាលាដំបូងរាជធានីភ្នំពេញ កាលពីព្រឹកថ្ងៃទី១៤ ខែមករា ឆ្នាំ២០១៤នេះ បានក្លាយជាព្រឹត្តិការណ៍ប្រវត្តិសាស្ត្រថ្មីមួយទៀតរបស់កម្ពុជាដែលអ្នកស្នេហាជាតិ អ្នកស្រឡាញ់យុត្តិធម៌ និងវីរជនដែលហ៊ានយកដើមទ្រូងទៅពាំងការពារផលប្រយោជន៍ស្របច្បាប់របស់កម្មករ កម្មការិនី ដែលពួកគាត់នាំគ្នាទាមទារដោយសន្តិវិធី ឲ្យមានការដំឡើងប្រាក់ខែគោលចំនួន១៦០ដុល្លារ ដើម្បីមានជីវភាពរស់នៅសមរម្យថ្លៃថ្នូរ ត្រូវបានតុលាការកោះហៅទៅសួរនាំតាមហេតុផលនយោបាយ។ ប៉ុន្តែជនដៃដល់ និងអ្នកបញ្ជាឲ្យសមត្ថកិច្ចប្រដាប់អាវុធកេះកៃកាំភ្លើងបាញ់ប្រហារបណ្តាលឲ្យស្លាប់រាស្ត្រស្លូតត្រង់ បែរជាតុលាការមើលមិនឃើញ និងមិនបានកោះហៅទៅសួរនាំឲ្យឆ្លើយបំភ្លឺពីហេតុ ការណ៍បាញ់សម្លាបា់ស្ត្រស្លូតត្រង់យ៉ាងអយុត្តិធម៌នោះទេ នាំឲ្យគេមើលឃើញកាន់តែច្បាស់ថាតុលាការស្រុកខ្មែរគឺជាឧបករណ៍នយោបាយដាច់ថ្លៃរបស់បក្សប្រជាជន។
មានចរន្តចំនួួន២ដែលដើរបញ្ច្រាសគ្នា គឺទី១ នៅទូទាំងពិភពលោកគេនាំគ្នាថ្កោលទោសចំពោះសមត្ថកិច្ចប្រដាប់អាវុធក្រោមបញ្ជាគណបក្សប្រជាជនដែលបានបាញ់ប្រហារបណ្តាលឲ្យស្លាប់និងរងរបួសកម្មករ និងប្រជារាស្ត្រស្លូតត្រង់ដែលគ្រាន់តែនាំគ្នាតវ៉ាទាមទារដំឡើងប្រាក់ខែចំនួន១៦០ដុល្លារ និងទាមទារឲ្យមានការនាំជនដៃដល់និងអ្នកបញ្ជាពីក្រោយខ្នងទៅកាត់ទោសតាមច្បាប់ ប៉ុន្តែជនដែលបង្កអំពើហិង្សាបណ្តាលឲ្យប្រជារាស្ត្រស្លូតត្រង់ស្លាប់និងរងរបួស មិនត្រូវបានតុលាការកោះហៅទៅសួរនាំទេ បើទោះបីជាហេតុការណ៍ហិង្សាបណ្តាលឲ្យប្រជារាស្ត្រស្លូត ត្រង់ស្លាប់និងរងរបួសផ្អើលពេញពិភពលោកក៏ដោយ។ ទី២ ពិភពលោកបានកោតសរសើរចំពោះវីរភាពរបស់ថ្នាក់ដឹកនាំគណបក្សសង្គ្រោះជាតិ ដែលបានជួយកម្មករទាំងផ្នែកស្មារតី គំនិតប្រាជ្ញា និងណែនាំឲ្យកម្មករ កម្មការិនី ធ្វើបាតុកម្ម និងកូដកម្មដោយសន្តិវិធី និងប្រកាន់នូវគោលការណ៍អហិង្សា ជាអ្នកការពារយុត្តិធម៌ ការពារកុំឲ្យមានអំពើហិង្សាបែរជាត្រូវតុលាការស្រុកខ្មែរ កោះហៅទៅសួរនាំក្នុងន័យបំភិតបំភ័យគំរាមកំហែង។ ហើយគ្រប់ៗគ្នាតែងតែគិតថា ការកោះហៅថ្នាក់ដឹកនាំគណបក្សសង្គ្រោះជាតិ ឲ្យចូលខ្លួនឆ្លើយបំភ្លឺនៅថ្ងៃទី១៤ ខែមករា នេះគឺជាកាដូដ៏ពិសេសសម្រាប់អបអរដំណើរទស្សនកិច្ចរបស់នាយករដ្ឋមន្ត្រីយួន ធ្វើឲ្យរាស្ត្រខ្មែរកាន់តែក្តៅក្រហាយ និងមើលឃើញកាន់តែច្បាស់ថា អ្នកស្នេហាជាតិ និងអ្នកការពារយុត្តិធម៌សង្គម អ្នកការពារប្រជារាស្ត្រ ខ្មែរក្រីក្រទន់ខ្សោយ ត្រូវរងនូវការធ្វើទុក្ខបុកម្នេញគ្មានទីបញ្ចប់។ ទឹកចិត្តស្នេហាជាតិនិងការលះបង់ដ៏ធំធេងរបស់លោកប្រធាន សម រង្ស៊ី ត្រូវបានប្រជាពលរដ្ឋដឹងយ៉ាងច្បាស់ ហេតុនេះហើយទើបមានការគាំទ្រពីប្រជាពលរដ្ឋកាន់តែច្រើន៕
Labels:
ព័ត៌មានជាតិ
Previous Article
