ទីក្រុងប៉េកាំងកំពុងពិចារណាប្រកាសតំបន់ការពារនៅលើសមុទ្រចិនខាងត្បូង។ នេះបើតាមការចុះផ្សាយ របស់កាសែតជប៉ុន Asahi នៅថ្ងៃសុក្រទី ៣១មករានេះ។ ផែនការរបស់ប្រទេសចិនអាចនឹងបង្កឲ្យមានប្រឆាំងពីប្រទេសដែលកំពុងជាប់ជម្លោះដែនកោះជាមួយចិន នៅសមុទ្រចិនខាងត្បូង ដូចជាហ្វីលីពីន វៀតណាមជាដើម។
សារព័ត៌មានជប៉ុនបានចុះផ្សាយបង្ហាញ មហិច្ឆតារបស់ចិន ក្នុងការបង្កើតតំបន់ការពារដែនអាកាស មួយទៀត គ្របពីលើសមុទ្រចិនខាងត្បូង បន្ទាប់ពីទីក្រុងប៉េកាំងទើបបានបង្កើតតំបន់ការពារដែនអាកាស នៅសមុទ្រចិនខាងកើត។ កាលពីខែវិច្ឆិកាកន្លងទៅ ការប្រកាសបង្កើតតំបន់ការពារដែនអាកាសថ្មីរបស់ចិន បន្ថែមទៅលើដែនអាកាសជាតិរបស់ខ្លួន និងដែលបានគ្របសង្កត់ពីលើដែនអាកាសរបស់ជប៉ុន បានបង្កឲ្យមានការខឹងសម្បារពី សំណាក់ទីក្រុងតូក្បួ និងការប្រឆាំងដាច់ខាតពីអាមេរិក និងកូរ៉េខាងត្បូង។បន្ទាប់ពី ជប៉ុន ប្រទេសចិនលើកនេះ ទំនងជានឹងអាចបង្កការប្រឆាំងពីសំណាក់ប្រទេសនៅអាស៊ីអាគ្នេយ៍ដែលកំពុងមានជម្លោះដណ្តើមដីកោះជាមួយចិន នៅសមុទ្រចិនភាគខាងត្បូង។ យោងតាមការចុះផ្សាយរបស់កាសែតឯករាជ្យជប៉ុន Asahi មន្រ្តីទ័ពជើងអាកាសរបស់ចិន កំពុងត្រៀមស្នើតំបន់ការពារដែនអាកាសថ្មី នៅសមុទ្រចិនខាងត្បូង ដោយឲ្យពិតប្រាកដទៅនឹងគ្របជាពិសេស ទៅលើប្រជុំកោះ ប៉ារ៉ាស៊ែលដែលរហូតមកដល់ពេលនេះ ចិនកំពុងឈ្លោះទាមទារជាមួយប្រទេសវៀតណាម។ តាមកាសែតជប៉ុនដដែល សំណើបង្កើតតំបន់ការពារដែនអាកាសថ្មី នៅលើសមុទ្រចិនខាងត្បូង ត្រូវបានបញ្ជូនទៅថ្នាក់ដឹកនាំការពារជាតិរបស់ចិនរួចហើយ កាលពីខែមិថុនាកន្លងទៅ ពោលគឺនៅមុនពេលដែលចិនបានប្រកាសបង្កើតតំបន់ការពារដែនអាកាសនៅសមុទ្រចិនខាងកើតទៅទៀត។
សូមបញ្ជាក់ថា រហូតមក ចិនបានជាប់ជម្លោះដណ្តើមដីកោះ ជាមួយប្រទេសអាស៊ីជិតខាង ដោយសារតែចិនបានប្រកាសធ្វើជាម្ចាស់គ្រប់គ្រងសមុទ្រចិនខាងត្បូងតែម្នាក់ឯង។ កាលពីខែវិច្ឆិកាកន្លងទៅ អាជ្ញាធរនៅកោះហៃណាន បានចេញច្បាប់ថ្មី ដោយកម្រិតបញ្ជាឲ្យទូកបរទេសទាំងអស់ត្រូវសុំការអនុញ្ញាតិដើម្បីចូលក្នុងដែនទឹកដែលចិនទាមទារធ្វើជាម្ចាស់។ មួយខែក្រោយមក គឺនៅខែធ្នូ ប្រមុខការបរទេសអាមេរិកលោកចន ឃែរីបានប្រកាសប្រឆាំងរាល់ការបង្កើតតំបន់ការពារដែនអាកាសថ្មីរបស់ទីក្រុងប៉េកាំង នៅលើសមុទ្រចិន ដែលតាមពិតទៅជាផ្លូវចរាចរណ៍ទំនិញនៅក្នុងតំបន់ និងក្នុងពាណិជ្ជកម្មពិភពលោក៕
Labels:
ព័ត៌មានអន្តរជាតិ
Previous Article
