មន្ត្រីរដ្ឋាភិបាលប្រាប់អ.ស.ប.ថាកម្ពុជាគោរពសិទ្ធិមនុស្សពេញលេញ

មន្ត្រីជាន់ខ្ពស់របស់រដ្ឋាភិបាលបានថ្លែងនៅក្នុងសម័យប្រជុំរបស់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ (អ.ស.ប.) ក្នុងទីក្រុងហ្សឺណែវ កាលពីថ្ងៃអង្គារ ទី២៨ ខែមករា ថា កម្ពុជាមានការគោរព និងអនុវត្តសិទ្ធិមនុស្ស និងលទ្ធិប្រជាធិបតេយ្យពេញលេញ។អនុប្រធានគណៈកម្មាធិការជាតិទទួល
បន្ទុកសិទ្ធិមនុស្សនៅកម្ពុជា លោក ម៉ក់ សម្បត្តិ បានប្រកាសថា ការបោះឆ្នោតសកលសម្រាប់អាណត្តិទី៥ កន្លងមក គឺបានធ្វើឡើងយ៉ាងរលូន ប្រកបដោយតម្លាភាព ហើយថា រាជរដ្ឋាភិបាលកម្ពុជា បានបើកឱ្យមានបរិយាកាសក្នុងការបញ្ចេញមតិយ៉ាងទូលំទូលាយ។
ការអះអាងរបស់មន្ត្រីរដ្ឋាភិបាលកម្ពុជា ជាន់ខ្ពស់រូបនេះ ធ្វើឡើងនៅក្នុងកិច្ចប្រជុំនៃការពិនិត្យជាសាកលតាមពេលវេលាកំណត់របស់ក្រុមប្រឹក្សាសិទ្ធិមនុស្សនៃអង្គការសហប្រជាជាតិ ដែលហៅជាភាសាអង់គ្លេសថា Universal Periodic Review។

កាលពីពេលថ្មីៗនេះ អង្គការឃ្លាំមើលសេរីភាពលើពិភពលោក (Freedom House) ដែលមានមូលដ្ឋានក្នុងសហរដ្ឋអាមេរិក បានចេញរបាយការណ៍ឆ្នាំ២០១៤ របស់ខ្លួនវាយតម្លៃកម្ពុជា ថាជាប្រទេសគ្មានសេរីភាព ហើយលទ្ធិប្រជាធិបតេយ្យកំពុងមានការវិវឌ្ឍន៍ថយក្រោយធ្ងន់ធ្ងរ។

ចាប់តាំងពីខែកក្កដា ឆ្នាំ២០១៣ ដល់ចុងខែមករា ឆ្នាំ២០១៤ យ៉ាងហោចណាស់មានមនុស្សជិត ១០០នាក់រងរបួស ហើយមនុស្សចំនួន ៧នាក់ទៀតបានស្លាប់បាត់បង់ជីវិតពីការបង្ក្រាបរបស់សមត្ថកិច្ចរាជធានីភ្នំពេញ ទៅលើការធ្វើបាតុកម្មរបស់កម្មករដែលទាមទារដំឡើងប្រាក់ខែគោល ១៦០ដុល្លារ និងការតវ៉ាទាមទារយុត្តិធម៌នៃការបោះឆ្នោត៕