អង្គការសេដាកគ្រោងផលិតអង្ករសរីរាង្គដើម្បីនាំចេញទៅទីផ្សារអន្តរជាតិ

អង្ករសំរូបកំពុងមានប្រជាប្រិយភាពខ្លាំងនៅលើទីផ្សារកម្ពុជា

អង្គការសេដាក និងក្រុមហ៊ុនមេគង្គអូរីហ្សាត្រេឌីងនឹងធ្វើការចុះហត្ថលេខាលើកិច្ចសហការគ្នាមួយនៅរសៀលថ្ងៃព្រហស្បតិ៍នេះស្តីអំពីការផលិតនិងនាំចេញអង្ករសរីរាង្គដែលមានគុណភាពខ្ពស់ទៅកាន់ទីផ្សារអន្តរជាតិ។ គម្រោងនេះត្រូវបានអង្គការសេដាកអះអាងថាដើម្បីចូលរួមលើកស្ទួយ

កំរិតជីវភាពប្រជាកសិករខ្មែរ។ គេរំពឹងថា មានគ្រួសារកសិករជាងមួយម៉ឺនគ្រួសារនឹងទទួលផលប្រយោជន៍ពីគម្រោងនេះ។អង្ករសរីរាងកម្ពុជានឹងត្រូវនាំចេញទៅលើក់នៅលើទីផ្សារអន្តរជាតិក្នុងពេលឆាប់ៗនេះ។ អង្គការសេដាក៏បានចុះហត្ថលេខាជាមួយក្រុមហ៊ុនមេគង្គអូរីហ្សាត្រេឌីងនៅថ្ងៃព្រហស្បតិ៍នេះស្តីអំពីការផលិតនិងនាំចេញអង្ករសរីរាង្គដែលមានគុណភាពខ្ពស់ទៅកាន់ទីផ្សារអន្តរជាតិ។ ពិធីចុះហត្ថលេខា នេះធ្វើឡើងនៅទីស្នាក់ការធនាគារអភិវឌ្ឍន៍ជនបទនៅទីក្រុងភ្នំពេញ។

ប្រធានអង្គការសេដាក លោកបណ្ឌិត យ៉ង សាំងកុមារមានប្រសាសន៍ថា គម្រោងនេះនឹងជួយបង្កើនផលិតភាព និងស្ថេរភាពក្នុងការផលិតស្រូវសរីរាង្គដែលមានគុណភាពខ្ពស់របស់កសិករខ្មែរ។ លោកបន្តថា តាមរយៈកិច្ចសហការជាមួយក្រុមហ៊ុនមេគង្គអូរីហ្សា សហគមន៍កសិករដែលគាំទ្រដោយអង្គការសេដាកនឹងមានលទ្ធភាពកាន់តែធំថែមទៀតក្នុងការផលិត ប្រមូលស្តុកទុក និងកែច្នៃអង្ករផ្គត់ផ្គង់ទីផ្សារ។ លោករំពឹងថា គ្រួសារកសិករជាង ១ម៉ឺនគ្រួសារនឹងទទួលផលប្រយោជន៍ពីការសហការនេះ នៅក្នុងអំឡុងឆ្នាំ ២០១៤ និង ២០១។

យោងតាមសេចក្តីថ្លែងការណ៍របស់អង្គការសេដាក តាមរយៈកិច្ចសហការនេះ សហគមន៍កសិករអាចទទួលបានទុនមួយចំនួនយកទៅសាងសង់ឃ្លាំងខ្នាតតូចផ្ទុកដាក់ស្រូវ ដំឡើងម៉ាស៊ិនកិនស្រូវខ្នាតតូចនិងមធ្យមនៅតាមសហគមន៍របស់ពួកគេផងដែរ។ ឧបករណ៍ទាំងនោះអាចអនុញ្ញាតឲ្យកសិករកិនអង្ករសំរូបលក់ឲ្យក្រុមហ៊ុនវិញដើម្បីកែច្នៃនិងវេចខ្ចប់សំរាប់នាំចេញទៅកាន់ទីផ្សារអន្តរជាតិ។ ក្រៅពីនោះ កសិករនឹងសល់អង្កាមនិងកន្ទក់ទុកប្រើប្រាស់តាមតម្រូវការ ជាពិសេសអាចធ្វើជីដាក់ស្រែ និងចំណីសត្វទៀតផង។

គួរបញ្ជាក់ថា អង្ករក្រអូបកម្ពុជាបានជាប់ចំណាត់ថ្នាក់លេខ១ពីរឆ្នាំជាប់គ្នាខាងរស់ជាតិឆ្ងាញ់ក្នុងការប្រកួតជាអន្តរជាតិកាលពីឆ្នាំ ២០១២ និង ២០១៣ នេះ។ យោងតាមអង្គការសេដាក ស្រូវក្រអូបកម្ពុជាក៏ជាប់លំដាប់លេខ២ក្នុងពិភពលោកខាងការផលិត និងជាប់ចំណាត់ថ្នាក់លេខ៥ ខាងការនាំចេញ នេះបើតាមទិន្នន័យឆ្នាំ ២០១៣ របស់សហរដ្ឋអាមេរិក USDA៕