ក្រសួង ការបរទេសសហរដ្ឋអាមេរិកបានថ្លែងសោកស្តាយចំពោះហេតុការណ៍កលយុគក្នុងទីក្រុងបាងកកប្រទេសថៃដែលបានបណ្តាលអោយមានមនុស្សស្លាប់។ អ្នកនាំពាក្យក្រសួងការបរទេសអាមេរិកបានអំពាវនាវអោយភាគីនយោបាយទាំងពីរ ពោលគឺគណបក្សប្រឆាំង និងគណបក្សកាន់អំណាចដោះស្រាយបញ្ចប់បញ្ហាដោយការចរចារគ្នា។ប្រទេសមហាអំណាចបានចាប់ផ្តើមថ្លែងការណ៍ចំពោះព្រឹត្តិការណ៍បង្ហូរ
ឈាមនៅក្នុងទីក្រុងបាងកកប្រទេសថៃហើយ។ សហរដ្ឋអាមេរិកបានថ្លែងសោកស្តាយយ៉ាងខ្លាំង នៅពេលដែលមានមនុស្សជាច្រើនត្រូវបានសម្លាប់នៅក្នុងហេតុការណ៍ប៉ះទង្គិចគ្នារវាងក្រុមប៉ូលីស និងក្រុមអ្នកតវ៉ារបស់គណបក្សប្រឆាំង។
អ្នកនាំពាក្យក្រសួងការបរទេសអាមេរិក លោកស្រី Jen Psaki បាននិយាយចំៗថា ទីក្រុងវ៉ាស៊ីតោនកំពុងព្រួយបារម្ភអំពីស្ថានភាពនយោបាយតានតឹងនៅក្នុងប្រទេសថៃ ហើយថា អាមេរិកក៏កំពុងតាមដានបញ្ហានេះយ៉ាងយកចិត្តទុកដាក់។ ថ្លែងប្រាប់អ្នកកាសែត លោកស្រីអ្នកនាំពាក្យបន្តថា ការតវ៉ាដោយសន្តិវិធី និងសេរីភាពបញ្ចេញមតិគឺជាទិដ្ឋភាពដ៏សំខាន់របស់លទ្ធិប្រជាធិបតេយ្យ។ ហើយថា អំពើហិង្សា និងការដណ្តើមកាន់កាប់ទ្រព្យសម្បត្តិរដ្ឋ និងឯកជន គឺជាសកម្មភាពដែលមិនអាចទទួលយកបាន ដើម្បី ដោះស្រាយទំនាស់នយោបាយនោះទេ។
បើតាមការអះអាងរបស់លោកស្រី Jen Psaki ដដែល តំណាងសហរដ្ឋអាមេរិកបានជួបជាមួយលោកស្រីយីងឡាក់ ស៊ីណាវ៉ាត់ និងមេដឹកនាំគណបក្សប្រឆាំងរួចហើយ ដើម្បី លើកទឹកចិត្តអោយពួកគេបង្កើនភាព អត់ធ្មត់ និងចរចារដោយសន្តិវិធី ដើម្បីបញ្ចប់ជម្លោះនយោបាយនេះ។
អ្នកនាំពាក្យក្រសួងការបរទេសអាមេរិកបានថ្លែងថ្កោលទោស ការប្រើប្រាស់ហិង្សាដែលកើតចេញពីមូលហេតុនយោបាយ និងដើម្បីផលប្រយោជន៍នយោបាយនោះ។
គួររម្លឹកថា ប្រឈមនឹងការទាមទារអោយលោកស្រីនាយករដ្ឋមន្ត្រី យីងឡាក់ ស៊ីណាវ៉ាត់ចុះចេញពីដំណែងនោះ តុលាការព្រហ្មទណ្ឌថៃក៏បានចេញដីកាតាមចាប់ខ្លួនមេដឹកនាំចលនាប្រឆាំងដែរកាលពីថ្ងៃចន្ទ។ តុលាការព្រហ្មទណ្ឌបានចេញដីកាតាមចាប់ខ្លួនលោកស៊ូថេប ថងស៊ូបាន និងបក្សពួកមួយចំនួនទៀត ក្រោមការចោទប្រកាន់ពីបទបះបោរទម្លាក់រដ្ឋាភិបាល។ បទចោទនេះ ប្រសិនបើត្រូវបានរកឃើញថាមានទោសមែននោះ ជនជាប់ចោទនឹងត្រូវផ្តន្ទាទោសអោយជាប់ពន្ធនាគារអស់មួយជីវិត៕
Labels:
ព័ត៌មានអន្តរជាតិ
Previous Article
