រឿងអាស្រូវពុករលួយរបស់ប្រធានផ្សារដើមគ កំពុងត្រូវបានកូនចៅក្រោមឱវាទហែកកកាយ

ករណីបុគ្គល កែត ស៊ីវិនី ប្រធានផ្សារដើមគ ប្រព្រឹត្តអំពើពុករលួយជាយូរមកហើយនោះត្រូវបានបុគ្គលិក និងសន្តិសុខក្រោមឱវាទនាំគ្នាលាតត្រដាងជាសាធារណៈ ហើយអំពាវនាវឱ្យលោក ឯក ឃុនដឿន អភិបាលខណ្ឌទួលគោក ចាត់វិធានការទប់ស្កាត់ជាបន្ទាន់។ ជាមួយគ្នានេះលោក ប៉ា សុជាតិវង្ស អភិបាលរាជធានីភ្នំពេញ ក៏ត្រូវក្រឡេកមើលអំពើពុករលួយរបស់បុគ្គល កែត ស៊ីវិនី ផងដែរ ព្រោះ

ជននេះបានកេងប្រវ័ញ្ចលើកម្លាំងញើសឈាមរបស់បុគ្គលិក និងក្រុមសន្តិសុខផ្សារដើមគតាមអំពើចិត្តជាយូរមកហើយ។ បុគ្គលិកនិងសន្តិសុខផ្សារដើមគបានចោទមេកើយរបស់ខ្លួនថា បានកិបកេងប្រាក់រាប់លានរៀលដែលបានមកពីការប្រមូលពីក្រុមអាជីវករលក់ដូរតាមផ្លូវលេខ៣៣៦ ខាងជើងផ្សារនិងក្រោមដើមក្ងោកយកទៅធ្វើមានធ្វើបានផ្ទាល់ខ្លួន។

ក្រុមបុគ្គលិកនិងសន្តិសុខផ្សារដើមគ បានបញ្ជាក់ថាពួកគេទទួលបានប្រាក់ខែពី៧ម៉ឺនរៀល ទៅ២៥ម៉ឺនរៀល ប៉ុន្តែប្រធានផ្សារធ្វើរបាយការណ៍ទៅថ្នាក់លើថាពួកគេទទួលបានប្រាក់ខែពី៣០ម៉ឺនរៀលដល់៤៥ម៉ឺនរៀល។ បុគ្គលិកនិងសន្តិសុខផ្សារដើមគបានត្អូញត្អែរថាប្រធានផ្សារឈ្មោះកែត ស៊ីវិនី ប្រព្រឹត្តអំពើពុករលួយតាមគ្រប់រូបភាព ហើយបានយកឈ្មោះមន្ត្រីជាន់ខ្ពស់នៅសាលារាជធានីភ្នំពេញមកគំរាមកំហែងដើម្បីកុំឱ្យពួកគេធ្វើការតវ៉ា។ ទោះជាយ៉ាងណាឥឡូវរឿងអាស្រូវនេះកំពុងបែកធ្លាយ ព្រោះប្រធានផ្សារកេងប្រវ័ញ្ចលើបុគ្គលិកនិងក្រុមសន្តិសុខកាន់តែខ្លាំងឡើងៗ ដើម្បីប្រមូលលុយយកទៅធ្វើមានធ្វើបានផ្ទាល់ខ្លួនយ៉ាងក្រអឺតក្រទម។ មិនតែប៉ុណ្ណោះបុគ្គល កែត ស៊ីវិនី បានប្រើពាក្យសំដីអសីលធម៌មកលើបុគ្គលិកនិងសន្តិសុខស្រេចតែអំពើចិត្ត ហើយខ្លួនឯងផ្ទាល់អង្គុយតែក្នុងស្នាក់ការដើម្បីប្រមូលលុយតាមរបៀបពុករលួយសព្វបែបយ៉ាង។

សន្តិសុខនិងបុគ្គលិកផ្សារដើមគជាច្រើននាក់បានឱ្យដឹងថាការណែនាំរបស់អភិបាលខណ្ឌទួលគោក គឺបានតម្រូវឱ្យប្រធានផ្សារបើកប្រាក់ខែដល់ពួកគេក្នុងចំនួនពី៣០ម៉ឺនទៅ៤០ម៉ឺនរៀល ប៉ុន្តែជាក់ស្តែងគឺពួកគេទទួលបានត្រឹមតែ៧ម៉ឺន ទៅ១០ម៉ឺនរៀលប៉ុណ្ណោះ។ ឈ្មោះបុគ្គលិកដែលទទួលបានប្រាក់ខែត្រឹមតែ៧ម៉ឺនរៀលត្រូវប្រធានផ្សារសរសេរក្នុងរបាយការណ៍ថា ៣០ម៉ឺនរៀលចំណែកអនុប្រធានក្រុមសន្តិសុខដែលទទួលបានប្រាក់ខែត្រឹម១០ម៉ឺនរៀលគេសរសេរក្នុងរបាយការណ៍ថា៣៥ម៉ឺនរៀល។ចំណែកប្រធានសន្តិសុខនិងអនុប្រធានមួយចំនួនដែលទទួលបានប្រាក់ខែត្រឹម១៥ម៉ឺនរៀលគេសរសេរក្នុងរបាយការណ៍ដាក់ថា៤០ម៉ឺនរៀលដែលបញ្ហានេះគឺជារបៀបកេងប្រវ័ញ្ចយ៉ាងច្បាស់ក្រឡែតមិនអាចបិទបាំងបានទេ។

ក្រុមសន្តិសុខនិងបុគ្គលិកផ្សារដើមគបានលាតត្រដាងទៀតថាក្នុងមួយខែចំណូលរបស់ផ្សារដើមគ ដែលបានមកពីដើរទាត់កញ្ច្រែងអាជីវករ គឺមានប្រមាណជិត៤០លានរៀល ដែលប្រធានផ្សារកេងប្រវ័ញ្ចយកទៅធ្វើមានធ្វើបានផ្ទាល់ខ្លួន។ ជាងនេះទៅទៀតនៅមានការកាត់ចិញ្ចើមផ្លូវឱ្យអាជីវករធ្វើជាកន្លែងលក់ដូរនិងយកធ្វើតូបជាង២០ជាប់នឹងរបងមហោស្រពចេនឡា ហើយអាជីវករទាំងនោះត្រូវបង់ក្នុងមួយឆ្នាំ៥០០ដុល្លារ ដោយមិនគិតពីភាស៊ីនិងអនាម័យនៅឡើយទេ។ អាចនិយាយបានថាក្នុងតួនាទីជាប្រធានផ្សារដើមគ គឺលោក កែត ស៊ីវិនី កេងប្រវ័ញ្ចលើកម្លាំងញើសឈាមបុគ្គលិកនិងសន្តិសុខផ្សារស្រេចតែអំពើចិត្ត ហើយជននេះយកឈ្មោះមន្ត្រីជាន់ខ្ពស់សាលារាជធានីភ្នំពេញមកធ្វើជាខែលដើម្បីបិទបាំងអំពើអាក្រក់របស់ខ្លួន។ ទង្វើអាក្រក់របស់ប្រធានផ្សារដើមគ កំពុងធ្វើឱ្យបុគ្គលិកនិងសន្តិសុខក្រោមឱវាទក្តៅក្រហាយ ហើយបើកកកាយជាសាធារណៈនូវរឿងអាស្រូវពុករលួយដែលកើតឡើងពេញបន្ទុក។

បុគ្គលិកនិងសន្តិសុខផ្សារដើមគ បានអំពាវនាវទៅសាលារាជធានីភ្នំពេញឱ្យជួយអន្តរាគមន៍ទៅប្រធានផ្សារដើមគ ធ្វើយ៉ាងណាឱ្យពួកគេបានទទួលប្រាក់ខែដូចមាននៅក្នុងសេចក្តីណែនាំរបស់សាលាខណ្ឌទួលគោក។ ជាមួយគ្នានេះលោកអភិបាលខណ្ឌទួលគោក ក៏ដូចជាលោកអភិបាលរាជធានីភ្នំពេញ មិនគួរបណ្តោយឱ្យបុគ្គល កែត ស៊ីវិនី ធ្វើអ្វីៗស្រេចតែអំពើចិត្តតទៅទៀតទេ ព្រោះអំពើពុករលួយរបស់ប្រធានផ្សារបានធ្វើឱ្យបុគ្គលិក និងសន្តិសុខក្រោមឱវាទទទួលរងនូវទុក្ខលំបាកគ្មានទីបញ្ចប់។ ម្យ៉ាងទៀតចំណូលដែលបានមកពីការជួលតូប ឬលក់តូបមួយចំនួនត្រូវបានបុគ្គល កែត ស៊ីវិនី កេងប្រវ័ញ្ចយកទៅធ្វើជាផលប្រយោជន៍ផ្ទាល់ខ្លួនដោយគ្មានខ្លាចក្រែងអ្វីទាំងអស់។ បើប្រៀបធៀបជាមួយប្រធានផ្សារដើមគ កាលពីមុនគឺខុសគ្នាដូចមេឃនិងដីព្រោះប្រធានផ្សារមុនចេះស្គាល់ពីទុក្ខលំបាករបស់បុគ្គលិកនិងសន្តិសុខក្រោមឱវាទខ្លះៗមិនកេងប្រវ័ញ្ចស្រេចតែអំពើចិត្តឡើយ។

អំពើពុករលួយរបស់បុគ្គល កែត ស៊ីវិនី ប្រធានផ្សារដើមគ ធ្លាប់ត្រូវបានបុគ្គលិក និងសន្តិសុខតូចតាចលាតត្រដាងជាយូរមកហើយ ប៉ុន្តែសាលាខណ្ឌទួលគោក ក៏ដូចជាសាលារាជធានីភ្នំពេញមិនបានយកចិត្តទុកដាក់ដោះស្រាយទេ។ ឥឡូវនេះបុគ្គលិកនិងសន្តិសុខផ្សារដើមគនាំគ្នាលាតត្រដាងអំពើអាក្រក់របស់ប្រធានផ្សារជាសាធារណៈដូច្នេះលោក ឯក ឃុនដឿន អភិបាលខណ្ឌទួលគោក ដែលបើកកិច្ចប្រជុំកាលពីចុងសប្តាហ៍មុនជុំវិញការកែទម្រង់អភិបាលកិច្ចសម្រាប់មន្ត្រីអាជ្ញាធរនិងសមត្ថកិច្ចគួរតែពិនិត្យមើលរឿងអាស្រូវរបស់ប្រធានផ្សារដើមគផង ដើម្បីចៀសវាងនូវអំពើកេងប្រវ័ញ្ចលើកូនចៅក្រោមឱវាទដោយឥតមានអៀនខ្មាសតទៅទៀត៕

ប្រភព៖មនសិការខ្មែរ