អំពើអាក្រក់របស់បុគ្គល ប្រាក់ សុខុន កំពុងតែប្រឈមនឹងការថ្កោលទោសយ៉ាងខ្លាំងក្លា

បុគ្គល ប្រាក់ សុខុន ដែលជារដ្ឋមន្ត្រីក្រសួងប្រៃសណីយ៍ និងទូរគមនាគមន៍កំពុងប្រឈមនឹងការថ្កោលទោសយ៉ាងខ្លាំងក្លា ព្រោះបុគ្គលនេះឡើងកាន់តំណែងជារដ្ឋមន្ត្រីមិនបានប៉ុន្មានខែផងបែរជាមានគំនិតបំផ្លាញផលប្រយោជន៍ប្រជាពលរដ្ឋខ្មែរយ៉ាងទទឹងទិស។ ការដែលបុគ្គលប្រាក់ សុខុន ដាក់បទបញ្ជាឱ្យក្រុមហ៊ុនទូរស័ព្ទចល័តកំណត់ថ្លៃសេវាទូរស័ព្ទក្នុងកម្រិតខ្ពស់នោះត្រូវបាន
ប្រជាពលរដ្ឋខ្មែរនៅទូទាំងប្រទេសរិះគន់យ៉ាងខ្លាំង ហើយថ្កោលទោសថាមន្ត្រីជាន់ខ្ពស់គណបក្សប្រជាជនសុទ្ធតែមានជំនាញខាងបម្រើផលប្រយោជន៍ក្រុមហ៊ុនខិលខូច។ ជាក់ស្តែងបុគ្គល ប្រាក់ សុខុន បានបំផ្លាញផលប្រយោជន៍ពលរដ្ឋ ដោយខ្វះការពិចារណា តាមរយៈគំរាមឱ្យក្រុមហ៊ុនទូរស័ព្ទចល័តដែលមានតម្លៃសេវាហៅចេញទាបដំឡើងថ្លៃឱ្យដូចក្រុមហ៊ុនមួយដែលបានហុតឈាមអង្កៀមឆ្អឹងពលរដ្ឋជាយូរមកហើយ។

យុវជនមួយក្រុមបានធ្វើការតវ៉ានៅបរិវេណវត្តភ្នំ កាលពីព្រឹកថ្ងៃទី១៤ ខែធ្នូ ឆ្នាំ ២០១៣ ដើម្បីថ្លែងសារទៅកាន់អ្នកសារព័ត៌មាននិងប្រជាពលរដ្ឋអំពីការមិនពេញចិត្តរបស់ពួកគេចំពោះទង្វើមិនប្រក្រតីរបស់ក្រសួងប្រៃសណីយ៍ និង ទូរគមនាគមន៍។ ក្រុមយុវជនទាំងនោះបានចាត់ទុកថាសេចក្តីប្រកាសរបស់អន្តរក្រសួងកាលពីខែមេសា ឆ្នាំ២០១៣និងការកំណត់សុពលភាពនៃសេចក្តីប្រកាសនេះឡើងវិញកាលពីខែវិច្ឆិកា ដោយបើកផ្លូវឱ្យក្រុមហ៊ុនទូរស័ព្ទចល័តយកសេវាទាបបំផុតចំនួន ៤,៥សេន ក្នុងមួយនាទី គឺជាទង្វើប្រាសចាកពីរដ្ឋធម្មនុញ្ញ។ ក្រុមយុវជនដែលប្រមូលផ្តុំគ្នារាប់សិបនាក់ បានប្រើប្រាស់បណ្តាញទំនាក់ទំនងសង្គម (ហ្វេសប៊ុក) ដើម្បីណាត់ជួបគ្នាសម្តែងមតិលើកបដានិងប្រមូលស្នាមមេដៃពីប្រជាពលរដ្ឋសម្រាប់បង្ហាញការមិនពេញចិត្តរបស់ពួកគេចំពោះទង្វើមិនត្រឹមត្រូវរបស់ក្រសួងប្រៃសណីយ៍។

ប្រជាពលរដ្ឋខ្មែរទូទៅបានគាំទ្រថាសកម្មភាពរបស់ក្រុមយុវជនដ៏ក្លាហានទាំងនោះគឺជារឿងត្រឹមត្រូវ ព្រោះការកំណត់តម្លៃសេវាទូរស័ព្ទហៅចេញក្នុងមួយនាទី៤,៥សេន គឺជាការបំផ្លាញផលប្រយោជន៍ប្រជាពលរដ្ឋយ៉ាងកំរោល។ ប្រជាពលរដ្ឋបានលើកឡើងថាក្រសួងប្រៃសណីយ៍ គួរតែលើកទឹកចិត្តដល់ក្រុមហ៊ុនដែលផ្តល់ផលប្រយោជន៍ច្រើនសម្រាប់ប្រជាពលរដ្ឋ ប៉ុន្តែជាក់ស្តែងក្រសួងបែរជាដាក់កំហិតឱ្យក្រុមហ៊ុនដំឡើងថ្លៃសេវាប្រើប្រាស់ទៅវិញ។ ទង្វើរបស់បុគ្គលប្រាក់ សុខុន គឺជាការបំផ្លាញផលប្រយោជន៍ប្រជាពលរដ្ឋខ្មែរយ៉ាងកំរោលបំផុត ហើយបុគ្គល ប្រាក់សុខុន កំពុងតែធ្វើឱ្យរដ្ឋាភិបាលមិនស្របច្បាប់របស់លោក ហ៊ុន សែន ទទួលរងនូវភាពអាម៉ាស់។ ដូច្នេះបុគ្គល ប្រាក់ សុខុន ត្រូវតែគិតគូរឡើងវិញអំពីការបម្រើផលប្រយោជន៍របស់ក្រុមហ៊ុនមួយនោះដោយខ្វះការពិចារណា ព្រោះប្រជាពលរដ្ឋកំពុងនាំគ្នាថ្កោលទោសជុំទិស។

សូមបញ្ជាក់ថាថ្មីៗនេះក្រសួងប្រៃសណីយ៍ និងទូរគមនាគមន៍ បានចេញសេចក្តីប្រកាសឱ្យក្រុមហ៊ុនទូរស័ព្ទចល័តក្នុងស្រុកទាំងអស់កំណត់តម្លៃហៅចេញក្នុងប្រព័ន្ធ ៤,៥សេន ក្នុងខណៈដែលក្រុមហ៊ុនខ្លះបញ្ចុះតម្លៃទាបជាងនេះ ដើម្បីទាក់ទាញអតិថិជន។ ការកំណត់របស់ក្រសួងប្រៃសណីយ៍ បានធ្វើឱ្យប្រជាពលរដ្ឋជាពិសេសក្រុមយុវជនរិះគន់តាមបណ្តាញហ្វេសប៊ុកយ៉ាងខ្លាំងក្លា ធ្វើឱ្យបុគ្គលប្រាក់ សុខុន ទទួលរងនូវសេចក្តីអាម៉ាស់គ្មានទីបញ្ចប់។ ទោះបីបុគ្គលប្រាក់ សុខុន ខំប្រឹងរកលេសបិទបាំងទង្វើអាក្រក់របស់ខ្លួនយ៉ាងណាក៏មិនអាចទៅរួចដែរ ព្រោះមជ្ឈដ្ឋាននានារិះគន់ថាក្រសួងប្រៃសណីយ៍ កំពុងបម្រើផលប្រយោជន៍ក្រុមហ៊ុនទូរស័ព្ទចល័តដែលមានតម្លៃសេវាខ្ពស់។ ទង្វើរបស់បុគ្គលប្រាក់ សុខុន គឺជាការបំផ្លាញផលប្រយោជន៍ប្រជាពលរដ្ឋខ្មែរគួរឱ្យស្អប់ខ្ពើមបំផុត ហើយបុគ្គលនេះកំពុងធ្វើឱ្យរដ្ឋាភិបាលមិនស្របច្បាប់ប្រឈមនឹងសេចក្តីអាម៉ាស់កាន់តែខ្លាំង។

មជ្ឈដ្ឋានទូទៅបានឱ្យដឹងថានៅប្រទេសនានាលើសកលលោករដ្ឋាភិបាលគេតែងតែគាំពារ ឬលើកទឹកចិត្តដល់ក្រុមហ៊ុនណាដែលផ្តល់ផលប្រយោជន៍ច្រើនសម្រាប់ប្រជាពលរដ្ឋ។ ចំណែកនៅស្រុកខ្មែរគឺខុសគេខុសឯង ដោយក្រសួងស្ថាប័នរដ្ឋបែរជាដាក់ការគាបសង្កត់ទៅលើក្រុមហ៊ុនដែលផ្តល់ផលប្រយោជន៍ច្រើនដល់ប្រជាពលរដ្ឋទៅវិញ។ ប្រការនេះកំពុងតែធ្វើឱ្យប្រជាពលរដ្ឋអស់ជំនឿលើការដឹកនាំរបស់លោក ហ៊ុន សែន ហើយសកម្មភាពរបស់ក្រុមយុវជនដែលប្រឆាំងការកំណត់ថ្លែសេវាទូរស័ព្ទ គឺជាភស្តុតាងបង្ហាញថាយុវជនមិនពេញចិត្តចំពោះការដឹកនាំដ៏ខុសឆ្គងនេះឡើយ។ គេដាក់សំណួរថាហេតុអ្វីបានជាបុគ្គល ប្រាក់ សុខុន បំផ្លាញប្រយោជន៍ពលរដ្ឋដោយខ្វះការពិចារណារបៀបនេះ ព្រោះបុគ្គល ប្រាក់ សុខុន ក៏ជាអ្នកមានចំណេះដឹងខ្ពង់ខ្ពស់១រូបផងដែរ។

ពលរដ្ឋទូទៅបានថ្កោលទោសថាបុគ្គល ប្រាក់ សុខុន កំពុងប្រព្រឹត្តអំពើយ៉ាងគួរឱ្យស្អប់ខ្ពើមបំផុត ហើយកំពុងតែបំពានទៅលើរដ្ឋធម្មនុញ្ញដែលជាច្បាប់កំពូលនៃព្រះរាជាណាចក្រកម្ពុជាយ៉ាងកំរោល។ ក្រុមយុវជនបានត្រៀមប្រមូលផ្តុំគ្នាធ្វើបាតុកម្មនៅមុខក្រសួងប្រៃសណីយ៍ នាពេលឆាប់ៗនេះ ដើម្បីឱ្យបុគ្គលប្រាក់ សុខុន ភ្ញាក់ខ្លួន ហើយឈប់ប្រព្រឹត្តអំពើអាក្រក់បំផ្លាញផលប្រយោជន៍ប្រជាពលរដ្ឋតទៅទៀត។ បុគ្គល ប្រាក់ សុខុន បានដឹងយ៉ាងច្បាស់ថាប្រជាពលរដ្ឋខ្មែរភាគច្រើនកំពុងរស់ក្នុងជីវភាពក្រីក្រ ប៉ុន្តែបុគ្គលនេះបែរជាកំណត់ថ្លៃសេវាទូរស័ព្ទខ្ពស់ដែលអំពើបែបនេះ គឺជាការបំផ្លាញផលប្រយោជន៍ពលរដ្ឋ៕
ប្រភព៖មនសិការខ្មែរ