មនុស្សកាន់តែច្រើនសម្រុកទៅកាន់ឆ្នេរសមុទ្រខេត្តកែប នៅថ្ងៃទី២នៃពិធីបុណ្យសមុទ្រ

បុណ្យសមុទ្រនៅខេត្តកែបបានឈានចូលទៅដល់ថ្ងៃទី២ហើយ ក្រោមប្រធានបទ«ផ្ទៃសមុទ្រពណ៌ខៀវស្រងាត់ ទីក្រុងបៃតង»។ ដំណើរការរយៈពេលជិត២ថ្ងៃកន្លងទៅនេះ មានប្រជាពលរដ្ឋ ភ្ញៀវទេសចរណ៍ជាតិនិងអន្តរជាតិចូលរួមយ៉ាងច្រើនកុះករ។ សិល្បៈកំសាន្ត ទស្សនីយភាពប្លែកៗ ពិព័ណ៌ផលិតផល និងការបង្ហាញអំពីការប្រកួតកីឡាផ្សេងៗត្រូវគេដំណើរការ ប្រកបដោយការទាក់ទាញ។

នៅថ្ងៃសៅរ៍នេះគឺជាថ្ងៃទី២ហើយ ដែលពិធីបុណ្យសមុទ្រលើកទី២ ក្រោមប្រធានបទ«ផ្ទៃសមុទ្រពណ៌ខៀវស្រងាត់ ទីក្រុងបៃតង» ត្រូវបានគេប្រារព្ធផ្តើមធ្វើ ហើយនៅតំបន់ឆ្នេរសមុទ្រ ខេត្តកែបសម្រាប់រយៈពេល៣ថ្ងៃ គឺពីថ្ងៃទី ៦ដល់ថ្ងៃទី៨ខែធ្នូឆ្នាំ២០១៣។ មនុស្សម្នាជាច្រើនពាន់នាក់ បានពពាក់ពពូនគ្នាទាំងថ្ងៃទាំងយប់។ សន្តិសុខនិងសណ្តាប់ធ្នាប់មានលក្ខណៈល្អប្រសើរ ខណៈដែលសមត្ថកិច្ចចំរុះបានរៀបចំសម្រួលចរាចរណ៍ កន្លែងស្នាក់នៅ និងកន្លែងកំសាន្តយ៉ាងច្បាស់លាស់។

ចាប់តាំងពីថ្ងៃម្សិលមិញមក សកម្មភាពវប្បធម៌ និងកីឡា ការតាំងពិព័រណ៍ផលិតផល ម្ហូបអាហារ និងទស្សនីយភាពសិល្បៈកម្សាន្តសំខាន់ៗ ជាច្រើន ត្រូវបង្កើតឡើង ប្រយោជន៍ធ្វើការទាក់ទាញភ្ញៀវទេសចរជាតិ និងអន្តរជាតិ ដែលបានចូលរួម ក្នុងកម្មវិធីបុណ្យដ៏អធឹកអធមនេះ។

សិល្បៈកំសាន្តនិងទស្សនីយភាពប្លែកៗ ត្រូវគេបង្ហាញបន្តបន្ទាប់គ្នាឬដំណាលគ្នា ចាប់តាំងពីព្រឹករហូតទល់យប់ ដែលមានការអុជកាំជ្រួចនៅលើឆ្នេរសមុទ្រ និងលើផ្ទៃទឹកផងដែរ។ នៅថ្ងៃបុណ្យទី២នេះ នឹងមានការហែក្បួនព្យុហយាត្រាកីឡា និងក្បួនដង្ហែបុណ្យសមុទ្រដ៏អស្ចារ្យ នៅក្នុងទីតាំងមាត់ឆ្នេរសមុទ្រខេត្តកែបតែម្ដង។

ដោយឡែក ប្រជាពលរដ្ឋខ្មែរដែលបានចល័តមកពីខេត្តក្រុងនានា ដើម្បីចូលរួមកម្សាន្តសប្បាយនៃបុណ្យដ៏ធំចុងឆ្នាំនេះ ខ្លះក៏បានសម្រាកនៅសណ្ឋាគារផ្ទះសំណាក់ ហើយខ្លះទៀតបានបោះតង់សម្រាកបែបធម្មជាតិ នៅតាមឆ្នេរខ្សាច់ ដោយសារតែសណ្ឋាគារនិងផ្ទះសំណាក់មិនមានបន្ទប់គ្រប់គ្រាន់។ ស្ថានភាពនេះបានធ្វើឲ្យភ្ញៀវជាតិនិងអន្តរជាតិ បានហៀរទៅសម្រាកដល់ខេត្តកំពត ដែលមានចំងាយប្រមាណ ២៥គីឡូម៉ែត្រ ពីខេត្តកែប ឬក៏ទៅសម្រាកលើកំពូលភ្នំបូកគោតែម្តង។

កីឡាប្រមាណជា១០ប្រភេទ រួមមានកីឡាហែលទឹក ចម្ងាយឆ្ងាយ ប្រណាំងម៉ូតូទឹក ល្បុក្កតោ បាល់ទះលើឆ្នេរខ្សាច់ កីឡាហោះហើរ ប្រដាល់ ទ្រីយ៉ាថ្លុង ប្រណាំងទូកក្តោង រត់ប្រណាំង និងអត្តពលកម្ម ក៏បានចាប់ផ្តើមប្រកួតសម្តែងបែបទស្សនីយភាពជាបន្តបន្ទាប់ផងដែរ។

សូមបញ្ជាក់ថា បន្ទាប់ពីខកខានរៀបចំរយៈពេលមួយឆ្នាំ ដោយសារប្រទេសកម្ពុជាទាំងមូល មានទុក្ខក្រៀមក្រំ ចំពោះការយាងចូលទិវង្គតរបស់អតីតព្រះមហាវីរក្សត្រ សម្តេចព្រះបាទ នរោត្តម សីហនុ កាលពីឆ្នាំ២០១២ កន្លងទៅនោះ កម្ពុជានឹងរៀបចំពិធីបុណ្យសមុទ្រ ជាថ្មី នៅលើទឹកដីនៃខេត្តកែប។

ពិធីបុណ្យសមុទ្រឆ្នាំនេះ បានប្រព្រឹត្តិទៅស្របគ្នាជាមួយមហាសន្និបាតពិភពលោក លើកទី៩ របស់ក្លឹបឆ្នេរសមុទ្រ ដែលស្អាតបំផុតលើសកលលោក កិច្ចប្រជុំថ្នាក់រដ្ឋមន្ត្រីទេសចរណ៍កម្ពុជា ឡាវ មីយ៉ាន់ម៉ា វៀតណាម លើកទី២ និងកិច្ចប្រជុំក្រុមការងារទេសចរណ៍មហាអនុតំបន់មេគង្គ លើកទី៣២ផងដែរ៕