សម្បទានជាង៥ម៉ឺនហិកតា។ នៅក្នុងតំបន់នោះគេសង្កេតឃើញឧកញ៉ាមហាសេដ្ឋីរបស់គណបក្សប្រជាជនកម្ពុជា បានធ្វើជាខ្នងបង្អែកនិងឃុបឃិតឲ្យមានការបំផ្លាញព្រៃឈើយ៉ាងអនាធិបតេយ្យដែលមានឈ្មោះ សាំង ចន្ថា ជាមេការរបស់ក្រុមហ៊ុន ស៊ី អ ឌី ជាអ្នកក្រអឺតក្រទមនិងអុងអាត់ខ្លាំងជាងគេ ដូច្នេះរាជរដ្ឋាភិបាលកម្ពុជាគួរតែពិនិត្យមើលភាពអនាធិបតេយ្យនៃការកាប់បំផ្លាញព្រៃឈើនិងការដឹកជញ្ជូនឈើខុសច្បាប់របស់លោក សាំង ចន្ថា ឡើងវិញផង។
សេចក្តីរាយការណ៍ព័ត៌មានពីខេត្តរតនគិរីបានឲ្យដឹងថា ក្រុមហ៊ុនចំនួន៣ ដែលជាសាខារបស់ក្រុមហ៊ុន ហុងអាញ់យ៉ាឡាយ ជាប់ពាក់ព័ន្ធនឹងសកម្មភាពកាប់បំផ្លាញព្រៃឈើធ្វើអាជីវកម្មដោយមិនបានបង់ពន្ធជូនរដ្ឋ និងនាំឈើប្រណីតចេញទៅលក់នៅស្រុកយួនផ្ទុយពីកិច្ចព្រមព្រៀងជាមួយក្រសួងពាក់ព័ន្ធរួមមានក្រុមហ៊ុន ហុងអាញ់អូរយ៉ាដាវ ក្រុមហ៊ុន ស៊ី អ ឌី ដែលមានលោក សាំង ចន្ថា ជាមេការនិងក្រុមហ៊ុន ហេង ប្រាឌ័រ របស់ឧកញ៉ា រ័ត្ន សុខន ជាទីប្រឹក្សារបស់លោក ហេង សំរិន។ នៅក្នុងតំបន់ជម្រកសត្វព្រៃលំផាត់ មានសកម្មភាពកាប់បំផ្លាញព្រៃឈើយ៉ាងវិនាសហិនហោច ហើយលោក សាំង ចន្ថា និងឧកញ៉ា រ័ត្ន សុខន មានការពាក់ព័ន្ធជាមួយការប្រមូលទិញឈើពីពលរដ្ឋដែលចូលទៅកាប់បំផ្លាញតាមដែនជម្រកសត្វព្រៃ យ៉ាងអនាធិបតេយ្យមិនខ្វល់ពីច្បាប់អ្វីឡើយ។លោក សាំង ចន្ថា គឺជាមនុស្សដែលអុងអាត់ខ្លាំងបំផុត ធ្លាប់ធ្វើការគំរាមកំហែងទៅលើពលរដ្ឋក្រីក្រទន់ខ្សោយនិងធ្លាប់រងនូវការប្តឹងផ្តល់តាមផ្លូវតុលាការ ដែលទីបំផុតមានតែប្រជារាស្ត្រក្រីក្រទន់ខ្សោយប៉ុណ្ណោះជាអ្នករងគ្រោះ។
សកម្មភាពបំផ្លាញព្រៃឈើរបស់លោក សាំង ចន្ថា និងមេឈ្មួញជាឧកញ៉ា នៅក្នុងដែនជម្រកសត្វព្រៃលំផាត់ មានទ្រង់ទ្រាយធំខ្លាំងណាស់ គឺក្នុងមួយថ្ងៃៗមានការដឹកជញ្ជូនឈើប្រណីតចេញពីព្រៃការពារមិនតិចជាង២រថយន្តច្នៃនោះទេ ហើយបូករួមជាមួយឈើដែលប្រមូលទិញដោយខុសច្បាប់ពីប្រជាពលរដ្ឋ ឃើញថាសកម្មភាពនៃការបំផ្លាញឈើប្រណីតនៅតំបន់នោះ គួរឲ្យព្រួយបារម្ភបំផុត។ លោក សាំង ចន្ថា បានចាត់ចែងប្រមូលទិញឈើប្រណីតដឹកយកទៅលក់នៅស្រុកយួនយ៉ាងអនាធិបតេយ្យមិនខ្វល់ពីបទបញ្ជារបស់រាជរដ្ឋាភិបាលនោះទេ ហើយសកម្មភាពនាំចេញឈើប្រណីតទៅលក់នៅស្រុកយួនដោយជ្រកក្រោមអាជ្ញាប័ណ្ណដឹកជញ្ជូនឈើអារប្រភេទលេខ២ជារឿងខុសច្បាប់ ព្រោះក្រុមហ៊ុន ស៊ី អ ឌី មិនមានសិទ្ធិនាំឈើប្រណីតនៅលក់នៅក្រៅប្រទេសទេ អាចធ្វើការកែច្នៃឈើប្រភេទលេខ២ ដែលកាប់បំផ្លាញក្នុងដែនព្រៃសម្បទានយកទៅលក់ក្នុងស្រុកតែប៉ុណ្ណោះ។
មានការបញ្ជាក់ផងដែរថា លោក សាំង ចន្ថា បានកាប់បំផ្លាញព្រៃឈើក្នុងតំបន់ដីសម្បទានរបស់ខ្លួន ហើយធ្វើសកម្មភាពដឹកជញ្ជូនលើសពីចំនួនកំណត់ ដែលមានចែងក្នុងអាជ្ញាប័ណ្ណដូចជាសម្រាប់រថយន្តមួយគ្រឿងជំនាញរដ្ឋបាលព្រៃឈើចេញលិខិតអនុញ្ញាតឲ្យដឹកជញ្ជូនឈើប្រណីត១៧ម៉ែត្រត្រីគុណប៉ុណ្ណោះ ប៉ុន្តែលោក សាំង ចន្ថា បានលួចដឹកជញ្ជូននិងបង្កប់ឈើប្រណីតដល់ទៅ ៣០ដល់៤០ម៉ែត្រត្រីគុណ។ ជាគោលការណ៍ឈើដែលត្រូវបានកាប់បំផ្លាញនៅក្នុងដីព្រៃសម្បទានយកមកកែច្នៃសម្រាប់លក់ចែកចាយក្នុងស្រុកត្រូវបង់ពន្ធជូនរដ្ឋ ប៉ុន្តែលោក សាំង ចន្ថា បានឃុបឃិតជាមួយជំនាញរដ្ឋបាលព្រៃឈើនិងសមត្ថកិច្ចពាក់ព័ន្ធធ្វើអាជីវកម្មដឹកជញ្ជូនឈើដោយមិនបានបង់ពន្ធត្រឹមត្រូវនោះទេ នាំឲ្យខាតបង់ចំណូលថវិកាជាតិច្រើនសន្ធឹកសន្ធាប់។
សកម្មភាពដឹកជញ្ជូនឈើខុសច្បាប់ផ្ទុកលើសពីអាជ្ញាប័ណ្ណដែលបានកំណត់បាននាំឲ្យមានការបំផ្លាញផ្លូវស្ពានជាច្រើននៅក្នុងខេត្តរតនគិរី ជាពិសេសនៅ ក្នុងស្រុកអូរយ៉ាដាវនេះតែម្តង ផ្តើមចេញពីអំពើពុករលួយរបស់មន្ត្រីជំនាញរដ្ឋបាលព្រៃឈើដែលឃុបឃិតជាមួយលោកសាំង ចន្ថា និងឧកញ៉ាគណបក្សប្រជាជនកម្ពុជា ដែលមានលុយច្រើនហូរហៀរ និងជ្រកក្រោមស្លាកសម្បទានធ្វើសកម្មភាពបំផ្លាញ ព្រៃឈើយ៉ាងវិនាសហិនហោចក្នុងតំបន់ជម្រកសត្វព្រៃលំផាត់។ គេចង់ឃើញផ្នែកពាក់ព័ន្ធពិនិត្យមើលភាពអនាធិបតេយ្យដែលកំពុងបង្កឡើងដោយក្រុមហ៊ុន ស៊ី អ ឌី ដែលមានលោក សាំង ចន្ថា ជាមេការនិងក្រុមហ៊ុន ហេង ប្រាឌ័រ របស់លោកឧកញ៉ារ័ត្ន សុខន ឡើងវិញជាបន្ទាន់ ដែលយ៉ាងហោចណាស់ត្រូវរៀបចំឲ្យមានការគោរពច្បាប់ទម្លាប់ដូចមានចែងក្នុងកិច្ចព្រមព្រៀង។
សូមបញ្ជាក់ថា ក្រុមហ៊ុនស៊ី អ ឌី និងក្រុមហ៊ុន ហេង ប្រាឌ័រ របស់លោកឧកញ៉ា រ័ត្ន សុខន មិនទាន់បានបំពេញកាតព្វកិច្ចដូចមានចែងក្នុងកិច្ចព្រមព្រៀងនោះទេ ឃើញតែកាប់បំផ្លាញព្រៃឈើធ្វើអាជីវកម្មនិងប្រមូលទិញឈើខុសច្បាប់យកទៅលក់នៅស្រុកយួន សុទ្ធសឹងជាប្រភេទឈើប្រណីតមានតម្លៃខ្ពស់ ហើយការកាប់បំផ្លាញព្រៃឈើលក់ចែកចាយក្នុងស្រុក ក៏មិនបានបង់ពន្ធជូនរដ្ឋឲ្យបានត្រឹមត្រូវតាមគោលការណ៍នោះទេ។ លោក ហ៊ុន សែន ធ្លាប់បានព្រមានជារឿយៗថាត្រូវដកហូតអាជ្ញាប័ណ្ណពីក្រុមហ៊ុនសម្បទានដែលបំពានច្បាប់ឬកាប់បំផ្លាញព្រៃឈើ យ៉ាងអនាធិបតេយ្យ ដូច្នេះករណីក្រុមហ៊ុន ស៊ី អ ឌី របស់លោក សាំង ចន្ថា និងក្រុមហ៊ុន ហេង ប្រាឌ័ររបស់លោកឧកញ៉ា រ័ត្ន សុខន គួរតែជាកម្មវត្ថុដ៏សំខាន់មួយដែលរាជរដ្ឋាភិបាលត្រូវពិចារណាឡើងវិញ ឬត្រូវដកហូតដីសម្បទាននៅតំបន់នោះព្រោះអីបានបង្កផលប៉ះពាល់ធ្ងន់ធ្ងរដល់ធនធានព្រៃឈើ និងជនជាតិដើមភាគតិច ដែលកំពុងរងគ្រោះដោយសារតែការធ្វើអាជីវកម្មប្រមូលលុយយកទៅច្រកហោប៉ៅធ្វើមានធ្វើបានផ្ទាល់ខ្លួនរបស់លោក សាំង ចន្ថា និងឧកញ៉ា រ័ត្ន សុខន។ បុគ្គលមានអំណាចទាំងពីរនាក់នេះ គឺជាឈ្មួញបំផ្លាញព្រៃឈើក្នុងខេត្តរតនគិរី ឱ្យរលត់រលាយស្ទើរតែទាំងស្រុងទៅហើយ៕ ប្រភព៖មនសិការខ្មែរ
Labels:
ព័ត៌មានជាតិ
Previous Article
