សម្ពាធបាតុកម្មនៅប៉ោងខ្លាំងទោះបីប្រធានាធិបតីអ៊ុយក្រែនស្នើចរចា

ដោយ អៀង សុខម៉ិញ

ប្រធានាធិបតីអ៊ុយក្រែន បានប្រកាសឱ្យដឹងនៅថ្ងៃទី ៩ ធ្នូនេះ ថានឹងបើកជំនួបចរចាជាមួយបក្សប្រឆាំង ដូចអ្វីដែលប្រមុខរដ្ឋបីមុនៗ បានស្នើឡើង។ រដ្ឋបុរសទាំងបួននឹងជួបពិភាក្សាគ្នា នៅថ្ងៃអង្គារនេះ នាទីក្រុងគៀវ។ តើការចរចានេះធ្វើឡើងក្នុងបំណងបញ្ចុះកម្តៅបាតុកម្មតាមផ្លូវឬ ? ឬក៏មានរបត់នយោបាយអ្វីផ្សេង សម្រាប់ដោះស្រាយវិបត្តិនេះ? ប៉ុន្មានម៉ោងចុងក្រោយនេះ ប៉ូលិសបង្ក្រាបបាន
ឈរជើងនៅជុំវិញសាលាក្រុង កន្លែងបាតុកម្ម។បើមើលទៅលើចលនាតាមថ្នល់ក្រុងគៀវ សេចក្តីប្រកាសរបស់ប្រធានាធិបតី ហាក់ដូចជាមិនបានធ្វើឱ្យសម្ពាធដែលកំពុងឆេះយ៉ាងសន្ធោសន្ធៅ ចុះថយឥទ្ធិពលឡើយ។ បាតុករ គ្មានទំនុកចិត្តលើប្រមុខដឹកនាំរដ្ឋ និងសង្ស័យថាប៉ូលិសកំពុងត្រៀមបើកប្រតិបត្តិការបំបែកបាតុករ បើមើលកម្លាំងដាក់ពង្រាយព័ទ្ធជុំវិញ យ៉ាងសន្ធឹកសន្ធាប់។

សន្តិសុខត្រូវបានពង្រឹងនៅជុំវិញរនាំង។ បាតុករពាក់មួក ស្ថិតក្នុងស្ថានភាពត្រៀមអាសន្ន។ ហើយនៅពីមុខ គឺកម្លាំងប៉ូលិសឈរជាជួរ កាន់ខែល ដាក់ពង្រាយកាត់គ្រប់ផ្លូវសំខាន់ៗរបស់ទីក្រុងដែលនាំទៅកាន់ទីលានឯករាជ្យ និងពិសេសនៅក្បែរផ្ទះមេសហជីព ដែលបាតុករបោះជំរំស្នាក់នៅ ក៏ស្ថិតក្នុងស្ថានភាពត្រៀមអាសន្នខ្ពស់បំផុតដែរ។ ជាងនេះទៅទៀត កាលពីប៉ុន្មានថ្ងៃមុននេះ តុលាការបានសរុបសាលដីការថាការកាន់កាប់ការិយល័យសាធារណៈរបស់បាតុករជាទង្វើខុសច្បាប់។

ដូច្នេះពិតណាស់ថានឹងមានការវាយបំបែកហ្វូងបាតុករ ! តែស្ត្រី បុរស ជាបាតុករទាំងរយនាក់ បានបញ្ជាក់ជំហរថានឹងត្រៀមខ្លួនប្រឈម តទល់ជាមួយកម្លាំងមានសមត្ថកិច្ច។ ទឹកកកសំឡីបន្តធ្លាក់ អាកាសធាតុត្រជាក់ខ្លាំងមែន ប៉ុន្តែការប្រឈមមុខទល់ជាមួយប៉ូលិសនៅតែបន្ត។ បាតុករបន្តស្រែកអំពាវនាវឱ្យប៉ូលិសងាកមកចូលដៃមួយក្រុមប្រជាជន។

ភាពតានតឹងបានឡើងមួយកំរិតបន្ថែមទៀត នៅពេលដែលឡានកាមីញ៉ុងទាហាន ត្រូវបានទម្លាយចេញពីមូលដ្ឋាន សំដៅមកកាន់ទីលានឯករាជ្យ ដែលប្រជាជនរាប់រយនាក់ប្រមូលផ្តុំគ្នា ហើយបុព្វជិតសូត្រធម៌ផ្តល់ក្តីអនុគ្រោះ៕