នៅថ្ងៃពុធ២០វិច្ឆិកានេះ យុវនារីប៉ាគីស្ថាន ម៉ាឡាឡា យូសាហ្វហ្សៃ Malala Yousafzaï បានទទួលពានរង្វាន់សិទ្ធិមនុស្សសាខារ៉ូវ នៅសភាអឺរ៉ុប ក្រុងស្ត្រាសស្បួរ Strasbourg ប្រទេសបារាំង។
លោក ម៉ារតាំង ឈុល Martin Schulzប្រធានសភាអឺរ៉ុប បានលើកឡើងថា ម៉ាឡាឡាបានផ្តល់ក្តីសង្ឃឹមដល់មនុស្សជាច្រើនលាននាក់។នៅថ្ងៃពុធនេះ នៅសភាអឺរ៉ុប ក្រុងស្ត្រាសស្បួរ Strasbourg ប្រទេសបារាំង លោកម៉ារតាំង ឈុល Martin Schulz ប្រធានសភាអឺរ៉ុប បានប្រគល់ពានរង្វាន់ផ្នែកសិទ្ធិមនុស្ស ឈ្មោះថា ពានរង្វាន់សាខារ៉ូវ Sakharov ដោយផ្ទាល់ដៃអោយដល់យុវតី ប៉ាគីស្ថាន ម៉ាឡាឡា យូសាហ្វហ្សៃ។ ម៉ាឡាឡា បានក្លាយជាជានិមិត្តរូបអន្តរជាតិក្នុងការទាមទារអោយកុមារគ្រប់រូបបានចូលសាលា និងទទួលបានការថែទាំការពារ។ ប្រធានសភាអឺរ៉ុបបានលើកឡើងថា ម៉ាឡាឡាបានផ្តល់ក្តីសង្ឃឹមដល់មនុស្សជាច្រើនលាននាក់។
កាលពីខែតុលាកន្លងទៅ សភាអឺរ៉ុបបានសំរេចប្រគល់ពានរង្វាន់សាខារ៉ូវនេះអោយយុវតី ម៉ាឡាឡា។ សភាអឺរ៉ុបមិនបានជ្រើសយក Edward Snowden អតីតបុគ្គលិកបំរើការទីភ្នាក់ងារសន្តិសុខជាតិអាមេរិក រឺក៏សកម្មជនប្រឆាំងបេឡារុសនានាដែលជាប់ពន្ធនាគារ អោយធ្វើជាម្ចាស់ពានរង្វាន់សាខារ៉ូវនេះទេ។
សំរាប់យុវតីម៉ាឡាឡា ផ្ទាល់ ពានរង្វាន់សាខារ៉ូវនេះ ជាការលើកទឹកចិត្តដល់នាង ក្នុងការតស៊ូតទៅទៀត ដើម្បីទាមទារសិទ្ធិអោយដល់កុមារគ្រប់រូប។ គួររំលឹកថា ដោយសារសកម្មភាពតស៊ូក្នុងការលើកតំកើងសិទ្ធិកុមារនេះ ម៉ាឡាឡា យូសាហ្វហ្សៃ បានក្លាយជាផ្ទាំងស៊ីបនៃការវាយប្រហាររបស់ក្រុមឧទ្ទាមតាលីបង់។ កាលពីខែតុលា ឆ្នាំ២០១២ ម៉ាឡាឡាបានរងរបួសធ្ងន់ធ្ងរដោយគ្រាប់កាំភ្លើងរបស់ពួកតាលីបង់ ក្នុងសកម្មភាពវាយប្រហាររថយន្ត ដឹកសិស្សសាលាមួយគ្រឿង។
ម៉ាឡាឡាក៏ជាម្ចាស់ពានរង្វាន់សន្តិភាពជាតិនៅប៉ាគីស្ថាន និងម្ចាស់ពានរង្វាន់ Simone de Beauvoir ជាពានរង្វាន់ផ្នែកសេរីភាពស្ត្រីប្រគល់អោយដោយប្រទេសបារាំងផងដែរ។
នៅថ្ងៃពុធម្សិលមិញនេះ យុវតីប៉ាគីស្ថាន ម៉ាឡាឡា យូសាហ្វហ្សៃ បានអំពាវនាវដល់បណ្តាប្រទេសអឺរ៉ុបនានា អោយប្រឹងប្រែងទ្វេដង ដើម្បីជួយអោយកុមារនានាដែលមានប្រមាណជា៥៧លាននាក់ អោយទទួលបានការអប់រំ។ ម៉ាឡាឡា ក៏អំពាវនាវអោយអឺរ៉ុប ជួយបណ្តាប្រទេសអាស៊ី និងប៉ាគីស្ថាន ក្នុងវិស័យអប់រំនិងការអភិវឌ្ឍន៍ផងដែរ៕
Labels:
ព័ត៌មានអន្តរជាតិ
Previous Article
