នៅទីបំផុត រដ្ឋាភិបាលចិនបានសម្រេចបង្កើនជំនួយបន្ថែមឲ្យប្រជាជនហ្វីលីពីនដែលរងគ្រោះដោយព្យុះសង្ឃរាហៃយ៉ាន។ ការសម្រេចដំឡើងជំនួយពេលនេះបានធ្វើឡើង បន្ទាប់ពីចិនបានទទួលរងការរិះគន់ ទិតៀនយ៉ាងខ្លំាងចំពោះជំនួយដ៏តិចតួចរបស់ខ្លួនដែលបានប្រកាសផ្តល់ឲ្យប្រជាជនហ្វីលីពីនកាលពីដើមសប្តាហ៍នេះ។
១០០ ០០០ដុល្លារ នេះជាទឹកប្រាក់ដែលរដ្ឋាភិបាលចិនបានប្រកាសផ្តល់ឲ្យរដ្ឋាភិបាលហ្វីលីពីនកាលពីថ្ងៃចន្ទដើមសប្តាហ៍នេះ។ គឺជាទឹកប្រាក់ដ៏តិចតួចខ្លំាងណាស់ បើធៀបនឹងបណ្តាប្រទេសផ្សេងទៀតក្នុងលោក។ នៅក្នុងន័យនេះហើយបានជាទីក្រុងប៉េកំាងបានទទួលរងការរិះគន់ ទិតៀនយ៉ាងខ្លំាងក្នុងនាមជាមហាអំណាចសេដ្ឋកិច្ចទី២ ក្នុងលោក។ គឺជាចំនួនទឹកប្រាក់មួយដែលត្រូវបានទស្សនាវដ្តីអាមេរិកំាងឈ្មោះ Time ឲ្យចំណងជើងដោយចំអកថា « ទឹកលុយមានលក្ខណៈប្រមាថ »។
តែនៅទីបំផុត និងដើម្បីឆ្លើយតបនឹងការរិះគន់ ស្ថានទូតចិនប្រចំាទីក្រុងម៉ានីលបានប្រកាសឲ្យដឹងថា រដ្ឋាភិបាលចិននឹងបង្កើនជំនួយបន្ថែមចំនួន ១០លានយ័ន ស្មើនឹង ១ ២០០ ០០០អឺរ៉ូ ក្រោមទ្រង់ទ្រាយជាសម្ភារៈប្រើប្រាស់ មានដូចជា ភួយ មុងជាដើម។ នៅក្នុងសេចក្តីជូនដំណឹងរបស់ស្ថានទូតចិនប្រចំាហ្វីលីពីនឲ្យដឹងថា សម្ភារៈទំាងនោះកំពុងរៀបចំ និងផ្តើមបញ្ជូនទៅឲ្យរដ្ឋាភិបាលហ្វីលីពីននាពេលឆាប់ៗ។
គួរជម្រាបជូនថា កាយវិការមនុស្សធម៌របស់ចិនចំពោះជនរងគ្រោះហ្វីលីពីនពេលនេះបាននិងកំពុងក្លាយជាប្រធានរឿងជជែកគ្នាយ៉ាងផុសផុលរវាងប្រជាជនចិននៅលើបណ្តាញសង្គមចិន។ ក្រុមអ្នកជាតិនិយមចិនហាក់ដូចជាមិនបានគំាទ្រចំពោះកាយវិការមនុស្សធម៌របស់រដ្ឋាភិបាលចិនទេ។ ក្រុមអ្នកជាតិនិយមចិនមិនញញើតនឹងចោទប្រកាន់លើរដ្ឋាភិបាលហ្វីលីពីនពីភាពមិនស្មោះត្រង់ និងថា រដ្ឋាភិបាលហ្វីលីពីនបានប្រើប្រាស់លុយជំនួយរបស់ចិនដើម្បីទិញគ្រឿងសព្វាវុធទុកវាយប្រហារលើចិនវិញ។ យ៉ាងណាក៏ដោយ បណ្តាញឃោសនាមហាជនរបស់រដ្ឋចិនបានព្យាយាមរំងាប់ភាពក្តៅក្រហាយរបស់ពលរដ្ឋចិន និងរម្លឹកថា វាជាផលប្រយោជន៍របស់ចិនក្នុងការជួយប្រជាជនហ្វីលីពីន។ នៅក្នុងបទវិចារណកថាមួយឲ្យដឹងថា ចិន ក្នុងនាមជាប្រទេសមហាអំណាចមួយត្រូវតែចូលរួមជួយសង្គ្រោះប្រទេសជិតខាងដែលរងគ្រោះដោយគ្រោះធម្មជាតិ ទោះបីជាប្រទេសនោះ ជាមិត្ត ឬជាសត្រូវក៏ដោយ។
គួររម្លឹកជូនថា ចិន និងហ្វីលីពីនកំពុងមើលមុខគ្នាមិនចំដោយសារតែជម្លោះដណ្តើមកោះគ្នាកាន់កាប់នៅក្នុងសមុទ្រចិនខាងត្បូង។ ហ្វីលីពីនកំពុងទាមទារអធិបតេយ្យកោះ Scarborough ដែលមានចម្ងាយ ២០០គីឡូម៉ែត្រពីឆ្នេរហ្វីលីពីន និងដែលចិនបានចូលកាន់កាប់កាលពីឆ្នំា ២០១២៕
Labels:
ព័ត៌មានអន្តរជាតិ
Previous Article
