ដោយ ព្រំ សឿន សូលីណា
យោងតាមរដ្ឋាភិបាលកាំមេរូន ក្រុមមនុស្សដែលចាប់ជំរិតសង្ឃបារាំងនោះ គឺជាក្រុមបូកូ អារ៉ាំ ធ្លាប់បានចាប់ជំរិតគ្រួសារបារាំងមួយ កាលពីខែកុម្ភៈដើមឆ្នាំ ក្នុងតំបន់នេះ។ ភ្នាក់ងារចារកិច្ចកាំមេរូនសង្ស័យថា ក្រុមបូកូ អារ៉ាំ នីហ្សេរីយ៉ា មានផែនការចាប់ជំរិតពលរដ្ឋអឺរ៉ុប។ អាមេរិកចាត់ទុកក្រុមបូកូ អារ៉ាំ ថាជាក្រុមភេរវជន។ តុលាការបារាំងកំពុងបើកការស៊ើបអង្កេតរឿងនេះ។ប្រធានាធិបតីបារាំង ហ្វ្រង់ស៊័រ ហូឡង់ បានសុំអោយជនរួមជាតិបារាំងដែលរស់នៅ រឺក៏ធ្វើដំណើរក្នុងតំបន់ដែលប្រឈមគ្រោះថា្នក់ខ្ពស់នេះ កុំអោយធ្វើសកម្មភាពអ្វីដែលអាចនាំអោយមានការគំរាមកំហែងអាយុជីវិតពួកគេ រឺក៏អាចនាំអោយពួកគេប្រឈមនឹងការចាប់ធ្វើជាចំណាប់ខ្មាំង។
លោកហូឡង់ប្រាប់ថា រដ្ឋាភិបាលបារាំងនឹងធ្វើគ្រប់បែបយ៉ាង ដូចជា ធ្លាប់ធ្វើក្នុងរឿងចំណាប់ខ្មាំងកន្លងមក ដើម្បីទទួលបានការដោះលែងសង្ឃកាតូលិក វ៉ាន់ដិនបឺស្ហ៕
នៅប្រទេសកាំមេរូន កាលពីយប់ថ្ងៃពុធឈានចូលព្រឹកថ្ងៃព្រហស្បតិ៍ មនុស្សមួយក្រុមបាននាំគ្នាចាប់សង្ឈកាតូលិកបារាំងធ្វើជាចំណាប់ខ្មាំង នៅចុងភាគខាងជើងជាប់ព្រំប្រទល់ជាមួយប្រទេសនីហ្សេរីយ៉ា។ រហូតមកដល់ព្រឹកថ្ងៃសុក្រនេះ នៅមិនទាន់មានជនណា រឺក្រុមណាមួយប្រកាសថាខ្លួនជាអ្នកចាប់ជំរិតសង្ឃបារាំងនៅឡើយទេ។ ប៉ុន្តែ រដ្ឋាភិបាលកាំមេរូនប្រាប់ថា ក្រុមចាប់ជំរិតនោះគឺជាក្រុមប្រដាប់អាវុធ បូកូ អារ៉ាំ។ អាមេរិកបានចាត់ទុកក្រុមនេះថាជាក្រុមភេរវជន។សង្ឃកាតូលិកបារាំង ដែលត្រូវបានគេចាប់ជំរិតនៅភាគខាងជើងប្រទេសកាំមេរូន មានឈ្មោះថា George Vandenbeusch ហ្ស៊ក វ៉ាន់ដិនបឺស្ហ ជន្មាយុ៤២ព្រះវស្សា។ លោកជាអ្នកទទួលខុសត្រូវជួយប្រជាជននីហ្សេរីយ៉ា ប្រមាណមួយម៉ឺននាក់ ដែលបានរត់ភៀសខ្លួនមកកាំមេរូន។
លោកត្រូវបានគេចាប់ជំរិតនៅភាគខាងជើងកាំមេរូន ជិតព្រំដែននីហ្សេរីយ៉ា។ តំបន់នេះជាតំបន់គ្រោះថ្នាក់ខ្ពស់ ដោយសារសំបូរក្រុមភេរវជន និងការចាប់ជំរិត។ បន្ទាប់ពីបានចាប់សង្ឃបារាំងរួចមក ក្រុមឧទ្ទាមបានរត់គេចខ្លួនដោយបន្សល់ទុកនូវគ្រាប់កាំភ្លើងកាឡានីឆ្កុហ្វ ជាង៣០០គ្រាប់ តាមផ្លូវឆ្ពោះទៅកាន់នីហ្សេរីយ៉ាក្បែរនោះ។ ម្សិលមិញ នេះរដ្ឋាភិបាលកាំមេរូនបារម្ភថា ក្រុមឧទ្ទាមបាននាំសង្ឃកាតូលិកបារាំងទៅដល់ប្រទេសនីហ្សេរីយ៉ារួចហើយ។ នៅព្រឹកថ្ងៃសុក្រនេះ អាជ្ញាធរកាំមេរូន និងនីហ្សេរីយ៉ា បានដាក់ពង្រាយកងកម្លាំងខ្លួនអោយតាមស្វែងរកក្រុមចាប់ជំរិតនោះ។
Labels:
ព័ត៌មានអន្តរជាតិ
Previous Article
