សកម្មជនបក្សប្រជាធិបតេយ្យ ជាបក្សប្រឆាំង បានទាមទារកាន់តែខ្លាំងឡើងៗ ឱ្យនាយករដ្ឋមន្ត្រី លោកស្រី យីងឡាក់ ស៊ីនណាវ៉ាត់ ចុះចេញពីតំណែង។ កម្លាំង និងសម្ពាធបាតុកម្ម បានរីកធំធាត់គួរឱ្យភ្ញាក់ផ្អើលនៅថ្ងៃចន្ទនេះ នៅកណ្តាលក្រុងបាងកក។
បាតុករ បានចូលទៅលុកលុយក្នុងក្រសួងមួយ និងគំរាមចូលកាន់កាប់ស្ថាប័នរដ្ឋផ្សេងៗ។ សន្ទុះប្រឆាំងនារយៈពេលប៉ុន្មានម៉ោងចុងក្រោយ ដែលបានគេនឹកឃើញដល់វិបត្តិនយោបាយបង្កឡើងព្រឹត្តិការណ៍បាតុកម្មទ្រង់ទ្រាយធំ កាលពីឆ្នាំ២០១០។តាំងពីរសៀលថ្ងៃចន្ទនេះមក សកម្មជនបក្សប្រឆាំង និងបាតុករ បាននាំគ្នាចូលទៅលុកលុយក្រសួងហិរញ្ញវត្ថុ ដោយស្រែកជ័យឃោស “ដំណាក់កាលចុងក្រោយនៃការប៉ះបោរស៊ីវិល” ! លោក ស៊ូថេប ថងស៊ូបាន មេដឹកនាំម្នាក់របស់បក្សប្រជាធិបតេយ្យ បានប្រកូកប្រកាសឱ្យបុគ្គលិករដ្ឋទាំងអស់បញ្ឈប់ការងារ និងគ្រោងចូលលុកលុយគ្រប់ស្ថាប័នរដ្ឋផ្សេងៗទៀតនៅថ្ងៃស្អែក ដើម្បីបរិហារប្រព័ន្ធដឹកនាំប្រទេសរបស់ត្រកូលស៊ីណាវ៉ាត់ (ថាក់ស៊ីន)។
ផ្លូវថ្នល់ក្រុងបាងកក ដែលធ្លាប់តែមានចរាចរណ៍កកស្ទះ ពេលនេះស្រឡះថ្លេវ មានតែកម្លាំងបាតុកម្ម និង ដុំថ្មរប៉ាត់រប៉ាយដាក់បាំងច្រកផ្លូវចូលស្ថាប័នរដ្ឋាភិបាល។ បាតុករប្រមាណពី១៥ ទៅ១៨ម៉ឺននាក់ (បើតាមអាជ្ញាធរ) ដែលបានប្រមូលផ្តុំគ្នាតាំងពីថ្ងៃអាទិត្យម្សិលមិញមក កំពុងធ្វើដំណើរឆ្ពោះទៅទីស្នាក់ការប៉ូលិស យោធា និងស្ថានីយ៍ទូរទស្សន៍ ដោយមានផ្តល់ផ្កាកូលាបជូនកងកម្លាំងសន្តិសុខ ជានិមិត្តសញ្ញាថាមានការគាំទ្រពីយោធា។ កម្លាំងបាតុកម្មផ្សេងទៀតបានញែកជាក្រុម បែកខ្ញែកគ្នាចុះដើរតាមផ្លូវក្នុងក្រុង គ្រវីទង់ជាតិ ជាមួយនឹងសម្រែកយ៉ាងត្រកងអឺងអាប់។
បាតុកម្មដែលបានរុញច្រានប្រទេសថៃឱ្យធ្លាក់ក្នុងវិបត្តិដ៏ធ្ងន់ធ្ងរមិនធ្លាប់ក្នុងប្រវត្តិសាស្ត្រ រាជាណាចក្រថៃអាស្រ័យរដ្ឋធម្មនុញ្ញ គឺបាតុកម្មឆ្នាំ២០១០ ដែលកាលណោះក្រុមអាវក្រហម អ្នកស្មោះស្ម័គ្រនឹងថាក់ស៊ីន ជាបងប្រុសនាយករដ្ឋមន្ត្រីបច្ចុប្បន្ន ដើម្បីទាមទារឱ្យប្រមុខរដ្ឋាភិបាល អាប់ភីស៊ីតចុះចេញពីតំណែង។ ឥឡូវថ្ងៃនេះ ដល់វេនក្រុមបក្សប្រឆាំងម្តងដែលចង់ឃើញការគាស់ឬសកាត់គល់ត្រកូលស៊ីណាវ៉ាត់ចេញពីអំណាច។ ប្រឈមមុខនឹងសម្ពាធសង្គម និងច្រកចេញដ៏ចង្អៀត លោកស្រី យីងឡាក់ នៅចំពោះមុខអ្នកកាសែត បានច្រានចោល នៅថ្ងៃចន្ទនេះ ការលាលែងចេញពីតំណែង ការរំលាយសភា។
កំហឹងនិងភាពប្រេះឆាជាតិបានផ្ទុះឆេះឡើងវិញ បន្ទាប់ពីរដ្ឋាភិបាលបានស្នើបង្កើតច្បាប់លើកលែងទោស ដែលមានន័យស្មើនឹងការអាចវិលត្រលប់ចូលស្រុកវិញរបស់ថាក់ស៊ីន ប៉ុន្តែទោះបីព្រឹទ្ធសភាបានច្រានចោលទៅក្តី ក៏គ្រប់គ្រាន់សម្រាប់ពន្លត់ភ្លើងបាតុកម្មដែរ៕
Labels:
ព័ត៌មានអន្តរជាតិ
Previous Article
