នៅព្រឹកថ្ងៃទី៦ ខែធ្នូនេះ មជ្ឈមណ្ឌលសិទ្ធិមនុស្សកម្ពុជា និងក្រុមអង្គការ សមាគមសង្គមស៊ីវិល បានរៀបចំកិច្ចពិភាក្សាមួយ ដោយពិនិត្យទៅលើស្ថានភាពសេរីភាពបញ្ចេញមតិនៅកម្ពុជាឆ្នាំ២០១៣ ហើយត្រៀមយកទៅជូនអង្គការសហប្រជាជាតិនៅដើមឆ្នាំ២០១៤។ក្រុមមន្ត្រី ដែលធ្វើការងារទាក់ទងបញ្ហាសិទ្ធិមនុសុ្ស និងការបញ្ចេញមតិ បាននាំគ្នាសិក្សាដើម្បីឈានទៅវាយតម្លៃអំពីស្ថានភាពអនុវត្តន៍សេរីភាពបញ្ចេញមតិ នៅកម្ពុជា។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានបញ្ជាក់ថា ឆ្នាំ២០១៣ នេះ សិទ្ធិបញ្ចេញមតិមានករណីបើកចំហរ និងករណីខ្លះរឹតបន្តឹង។ លោកបានលើកអំពីការដែលប្រជាពលរដ្ឋហ៊ានបញ្ចេញមតិនៅពេលទៅទទួលលោក សម រង្ស៊ី នៅព្រលានយន្តហោះ នៅពេលលោកចូលស្រុក និងការដែលប្រជាពលរដ្ឋទៅចូលរួមនៅលើទីលានប្រជាធិបតេយ្យ។
(សំឡេង លោក អ៊ូ វីរៈ)
ប៉ុន្តែលោក អ៊ូ វីរៈ នៅមិនទាន់បញ្ចេញមតិថា សេរីភាពបញ្ចេញមតិឆ្នាំ២០១៣ ស្ថិតក្នុងស្ថានភាពល្អប្រសើរ ឬយ៉ាងណានៅឡើយទេ។
កញ្ញា សន រ៉ាមណា មន្ត្រីសម្របសម្រួលគម្រោងសេរីភាពបញ្ចេញមតិនៅកម្ពុជា បានឲ្យដឹងថា មុនឈានមកពិភាក្សានៅថ្ងៃនេះ គម្រោងនេះបានបើកកិច្ចពិភាក្សានៅតាមក្រុមចំនួន៦ នៅលើវិស័យផ្សេងៗគ្នា។ ដូចជា ក្រុមប្រើអ៊ីនធើរណិត ប្លុក ហេស្វប៊ុក ក្រុមអ្នកសារព័ត៌មាន ក្រុមអ្នកតស៊ូមតិ និងក្រុមនិស្សិត។
កញ្ញា បានស្រង់នូវអនុសាសន៍ពីក្រុមពិភាក្សាដែលបានធ្វើពីមុននេះ ទៅដល់រដ្ឋាភិបាល។
(សំឡេង កញ្ញា សន រ៉ាមណា)
ជាមួយគ្នានេះ កញ្ញាបានបញ្ជាក់ថា ក្រុមនិស្សិតបានស្នើឲ្យរដ្ឋាភិបាលធានាថា ការរឹតបណ្តឹងលើការប្រើប្រាស់បណ្តាញអ៊ិនធើរណិត ត្រូវអនុលោមតាមច្បាប់អន្តរជាតិ និងជំរុញការធ្វើច្បាប់ស្តីពីសិទ្ធិទទួលបានព័ត៌មាន។
លោក ឈាង វុន ប្រធានគណៈកម្មការផ្នែកព័ត៌មាននៃរដ្ឋសភា បានបដិសេធមិនអត្ថាធិប្បាយទៅលើប្រធានបទសេរីភាពបញ្ចេញមតិនោះទេ។
តែទោះជាយ៉ាងណាក្តី លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានបញ្ជាក់ថា រដ្ឋាភិបាលបានបើកចំហការអនុវត្តសិទ្ធិបញ្ចេញមតិ។
(សំឡេងលោក ផៃ ស៊ីផាន)
ជាមួយគ្នានេះ ទៀត លោកបានបញ្ជាក់ថា រាល់ការបញ្ចេញមតិ ត្រូវប្រើប្រាស់ទីកន្លែងដោយសហការជាមួយអាជ្ញាធរមូលដ្ឋាន។
មន្ត្រីសិទ្ធិមនុស្សបានបញ្ជាក់ថា ការអនុវត្តសេរីភាពបញ្ចេញមតិបានបើកទូលាយជាងមុននៅទីតាំងសាធារណៈ ប៉ុន្តែរឹតបណ្តឹងការទៅបញ្ចេញមតិនៅក្បែរគេហដ្ឋានលោកនាយករដ្ឋមន្ត្រី៕
Labels:
ព័ត៌មានជាតិ
Previous Article
