ការសិក្សារបស់កុមារនៅតាមទីជនបទ

កម្មវិធីសន្ទនាមតិវិទ្យុអូស្ត្រាលីថ្ងៃនេះ ពិភាក្សាអំពីការអប់រំ ជាពិសេស គឺការអប់រំរបស់កុមារនៅតាមទីជបបទ ដោយផ្តោតការពិភាក្សាផងដែរ ទៅលើសារៈសំខាន់នៃការអប់រំ និងឧបសគ្គសំខាន់ៗមួយចំនួន។លោក កាន់ កាល់ គឺជានាយកនៃអង្គការ Room to Read ប្រចាំនៅកម្ពុជា។ លោកបានមានប្រសាសន៍ទាក់ទងនឹងចំនួនភាគរយនៃកុមារដែលបានចុះ ឈ្មោះចូលរៀន ដំបូង
ហើយបានបង្ហាញពីការធ្លាក់ចុះយ៉ាងខ្លាំងនៃ ភាគរយនៃសិស្សានុសិស្ស ដែលបានបញ្ចប់ការសិក្សាតាមកម្រិតនីមួយៗ បើប្រៀបធៀបនឹងការចុះឈ្មោះចូលរៀនដំបូង។

ទាក់ទងនឹងបញ្ហា ប្រឈមមួយរបស់កម្ពុជា ដែលឳពុកម្តាយមួយចំនួន គិតថាពួកលោក មិនមានការសិក្សាជ្រៅជ្រះនោះទេ ធ្វើដូចម្តេចធ្វើជាគម្រូ បង្រៀនកូនៗបាន ហើយពេលខ្លះថាខ្លួនក្រ មិនមានលទ្ធភាពនឹងផ្គត់ផ្គង់ការរៀនសូត្ររបស់កូន លោក កាន់ កាល់ មានប្រសាសន៍ឲ្យដឹងថា ពិភពលោកនេះមានការផ្លាស់ប្តូរ ការផ្តល់តម្លៃដល់ការអប់រំ និងការទទួលស្គាល់ភាពចាំបាច់នៃការអប់រំគឺជាការសំខាន់។ ដូចគ្នាដែរ មតិមួយរបស់ លោក រ៉ាប៊ីនដ្រាណាត តាហ្គរ ជ័យលាភីរង្វាន់ណូបែលមួយរូប បានគាំទ្រចំពោះការអប់រំ ដោយលើកឡើងថា "កុំកំណត់កុមារត្រឹមកម្រិតការរៀនសូត្ររបស់អ្នក ត្បិតអីកុមារចាប់កំណើតក្នុងពេលផ្សេងពីអ្នក។"
លោក កាន់ កាល់ បានបកស្រាយសំណួរសំខាន់ៗរបស់ប្រិយមិត្តផងដែរ ទាក់ទងនឹងការអប់រំ ជាពិសេសការអប់រំរបស់កុមារនៅទីជនបទ។ សូមអញ្ជើញលោកអ្នកនាង បើកស្តាប់កម្មវិធីទាំងមូល!