សកម្មជនកូរ៉េខាងត្បូងបង្ហោះ Key USB និងខិត្តប័ណ្ណសន្ធឹកសន្ធាប់ ចូលក្នុងព្រំដែនកូរ៉េខាងជើង

ដោយ ព្រំ សឿន សូលីណា

នៅថ្ងៃពុធនេះ នៅព្រំដែនរវាងកូរ៉េខាងត្បូងនិងកូរ៉េខាងជើង សកម្មជនកូរ៉េខាងត្បូង ជាច្រើននាក់ បានបង្ហោះប៉េងប៉ោងផ្ទុកទៅដោយ Key USB និងខិត្តប័ណ្ណសន្ធឹកសន្ធាប់ ចូលទៅក្នុងទឹកដីកូរ៉េខាងជើង។ Key USB និងខិត្តប័ណ្ណទាំងនេះ ផ្ទុកទៅដោយព័ត៌មាន ទាក់ទងនឹងការរំលោភបំពានសិទ្ធិមនុស្ស នៅកូរ៉េខាងជើង។ ទិសដៅនៃសកម្មភាពនេះ គឺដើម្បីអោយប្រជាជនកូរ៉េខាងជើង បានស្គាល់ពីភាពព្រៃផ្សៃរបស់មេដឹកនាំគឹម ជុងអ៊ុន។

ថ្ងៃពុធនេះ នៅព្រំដែនរវាងកូរ៉េខាងត្បូងនិងកូរ៉េខាងជើងដែលមានការការពារសន្តិសុខតឹងរ៉ឹងបំផុតនោះ តាំងតែពីក្រុងប៉ាជូទៅ គេបានឃើញសកម្មជនកូរ៉េខាងត្បូង ជាច្រើននាក់ បង្ហោះប៉េងប៉ោងជាច្រើន ផ្ទុកនូវ Key USB និងខិត្តប័ណ្ណសរុបប្រមាណ៥សែន បង្ហោះចូលទៅក្នុងទឹកដីកូរ៉េខាងជើង។ ក្នុងនោះ ប៉េងប៉ោងក៏បានផ្ទុកកាសែតវីដេអូDVD និងក្រដាសប្រាក់តំលៃ១ដុល្លារ ជាច្រើនសន្លឹកផងដែរ។

Key USB និងខិត្តប័ណ្ណទាំងអស់នេះ មានផ្ទុកព័ត៌មានស្តីពីការរំលោភបំពានសិទ្ធិមនុស្ស នៅកូរ៉េខាងជើង។ Key USB មានប្រមាណ១៥០០ ពោរពេញទៅដោយព័ត៌មានជាភាសាកូរ៉េ របស់Wikipedia។

ប្រតិបត្តិការបង្ហោះប៉េងប៉ោងនេះ ដឹកនាំដោយជនភៀសខ្លួនកូរ៉េខាងជើង។ ពួកគេចង់ ចង់អោយប្រជាជនកូរ៉េខាងជើងទាំងឡាយ បានទទួលព័ត៌មានទាក់ទងនឹងសកម្មភាពព្រៃផ្សៃរបស់មេដឹកនាំគឹម ជុងអ៊ុន។

ថ្វីបើកូរ៉េខាងជើងជាប្រទេសមួយស្ថិតនៅឯកា ប្រជាជន៩៥ភាគរយគ្មានទូរសព្ទដៃទំនាក់ទំនងគ្នា គ្មានអ៊ីនថឺនេតប្រើប្រាស់ក្តី ស្ថាប័នរដ្ឋមិនបានរងការខ្វះខាតបច្ចេកទេសព័ត៌មាននោះទេ។ ស្ថាប័នរដ្ឋាភិបាលមួយចំនួន ថែមទាំងមានគេហទំព័រផ្ទាល់ខ្លួនទៀតផង។ ទូរសព្ទដៃ ត្រូវបានដាក់អោយប្រើនៅក្នុងប្រទេស នៅឆ្នាំ២០០៨ តាមរយៈក្រុមហ៊ុនមួយ ជាក្រុមហ៊ុនរួមជាមួយក្រុមហ៊ុនអេហ្ស៊ីប Orascom។

បច្ចុប្បន្ន ព្រំដែនកូរ៉េខាងជើងលែងបិទជិតស្លុងដូចមុនទៀតហើយ។ ផលិតផលទូរសព្ទដៃចិន ត្រូវបានគេនាំចូលក្នុងទឹកដីកូរ៉េខាងជើង ដោយខុសច្បាប់។ ជនល្មើសក៏បានបន្លំនាំចូលកាសែតDVD រឺក៏Key USBផ្សេងៗ ក្នុងប្រទេសនេះដៃរ បើទោះជាត្រូវប្រឈមនឹងការចាប់ខ្លួន ពីអាជ្ញាធរក្តី៕