កម្ពុជាបដិសេធថាមិនពាក់ព័ន្ធការបាញ់សម្លាប់មេបាតុករថៃ

ក្រសួងការបរទេស និងសហប្រតិបត្តិការអន្តរជាតិ បដិសេធចំពោះការចោទប្រកាន់ដោយសង្ស័យរបស់មេបាតុករថៃ គឺលោក ស៊ុថេប ធឿកស៊ុបាន់ (Suthep Thaugsuban) ដែលថា ខ្មាន់កាំភ្លើងកម្ពុជា អាចពាក់ព័ន្ធការបាញ់សម្លាប់បាតុករថៃ នៅតំបន់ បាងណា នៅថ្ងៃទី ២៦ មករា។ ប៉ុន្តែ ក្រសួងការបរទេសកម្ពុជាបដិសេធ ការពាក់ព័ន្ធនោះ។មន្ត្រីនាំពាក្យក្រសួងការបរទេស និងសហប្រតិបត្តិការអន្តរជាតិ
របស់កម្ពុជា លោក កុយ គួង បានហៅការចោទប្រកាន់របស់លោក ស៊ុថេប ធឿកស៊ុបាន់ ថាជាការមិនពិត ហើយជាការចោទប្រកាន់ដោយងងើល។
សំឡេង៖ «ខ្ញុំសុំធ្វើការបដិសេធយ៉ាងដាច់អហង្ការនូវព័ត៌មាន ដែលលើកឡើងពីសម្ដីដ៏ឆ្កួតលីលារបស់លោក ស៊ុថេប ធឿកស៊ុបាន់ ដែលជាមេបាតុករប្រឆាំងរដ្ឋាភិបាលថៃបច្ចុប្បន្ន ដែលលើកឡើងថា ការបាញ់សម្លាប់បាតុករប្រឆាំងរដ្ឋាភិបាលថៃកាលពីម្សិលមិញហ្នឹង ខ្មាន់កាំភ្លើងអាចពលរដ្ឋខ្មែរនោះ។ ខ្ញុំសុំធ្វើការបដិសេធយ៉ាងដាច់អហង្ការ»។

ប្រតិកម្មរបស់មន្ត្រីនាំពាក្យក្រសួងការបរទេសកម្ពុជា គឺបន្ទាប់ពីកាសែតអនឡាញថៃ ឈ្មោះ អឹមខូត (MCOT) ស្រង់សម្ដីរបស់មេដឹកនាំបាតុកម្មប្រឆាំងរដ្ឋាភិបាលថៃ គឺលោក ស៊ុថេប ធឿកស៊ុបាន់ (Suthep Thangsuban) នៅថ្ងៃទី២៧ មករា ដែលប្រាប់ក្រុមបាតុកររបស់លោក នៅតំបន់ប៉ាធុមវ៉ាន់ (Pathumwan) ថា ខ្មាន់កាំភ្លើងបាញ់សម្លាប់មេដឹកនាំបាតុកម្មថៃមួយរូប អាចគេជួលពីអង្គភាពយោធាពិសេសកម្ពុជា។

ក្នុងហេតុការណ៍បាញ់ប្រហារនោះ បណ្ដាលឱ្យស្លាប់មេដឹកនាំបាតុកម្មប្រឆាំងរដ្ឋាភិបាលថៃមួយរូប គឺលោក ស៊ុធិន ថារ៉ាធិន (Suthin Tarathin) និងប្រាំនាក់ផ្សេងទៀតរងរបួស។

លោក កុយ គួង ថ្លែងថា ការចោទប្រកាន់កម្ពុជាពេលនេះ គឺជាលើកទីពីរហើយ ដែលលើកទីមួយ នៅថ្ងៃទី ២២ មករា មេទាហានជើងទឹកថៃមួយរូប បានចោទប្រកាន់ថា មានការដឹកពលរដ្ឋខ្មែរទៅចូលរួមធ្វើបាតុកម្មមួយ ប្រឆាំងនឹងបាតុករ ដែលកំពុងធ្វើបាតុកម្មប្រឆាំងរដ្ឋាភិបាល អ្នកស្រី យីងឡាក់ ស៊ីណាវ៉ាត់ (Yingluck Shinawatra) នៅក្រុងបាងកក ប្រទេសថៃបច្ចុប្បន្ន។ ការចោទប្រកាន់នោះត្រូវបានបដិសេធវិញ។

លោក កុយ គួង ថ្លែងថា «នៅថ្ងៃទី ២២ (មករា) នោះ ក្រសួងការបរទេសខ្លួនឯង ក៏បានចេញមកបកស្រាយបដិសេធជាផ្លូវការថា ព័ត៌មានដែលថា គេដឹកពលរដ្ឋខ្មែរចូលទៅធ្វើបាតុកម្មនៅទីក្រុងបាងកកនោះ ជាព័ត៌មានមិនពិត»។

លោកថ្លែងបញ្ជាក់ថា ពលរដ្ឋកម្ពុជា មិនបានពាក់ព័ន្ធនឹងការបាញ់សម្លាប់បាតុករដែលកំពុងប្រឆាំងរដ្ឋាភិបាលអ្នកស្រី យីងឡាក់ ស៊ីណាវ៉ាត់ ទេ ហើយក៏មិនបានចូលរួមធ្វើបាតុកម្ម នៅប្រទេសថៃដែរ។

លោកឱ្យដឹងថា ស្ថានទូត កម្ពុជាប្រចាំក្រុងបាងកក និងស្ថានកុងស៊ុល ប្រចាំខេត្តស្រះកែវ ប្រទេសថៃ បានណែនាំដល់ពលករកម្ពុជាជាប្រចាំ ឱ្យចេញឆ្ងាយពីបាតុកម្មប្រឆាំងរដ្ឋាភិបាលថៃនោះ។ ក្រៅពីនេះ ក៏មានក្រុមហ៊ុននាំពលករទៅធ្វើការនៅប្រទេសថៃមួយចំនួន បានណែនាំដល់ពលករកម្ពុជាដូចគ្នា។ លោកអំពាវនាវដល់ពលករឱ្យប្រកាន់ខ្ជាប់ការណែនាំទាំងនេះ៕