អំពើហិង្សា និងការចាប់ខ្លួន បានកើតឡើង ក្នុងបាតុកម្មរបស់សម្ព័ន្ធសហជីព និងសមាគមកម្មករនិយោជិត នៅភ្នំពេញ

កងកម្លាំងសមត្ថកិច្ចរបស់រដ្ឋាភិបាល កំពុងព្យាយាមទប់ស្កាត់ពលរដ្ឋមិនឱ្យចូលទៅទីលានប្រជាធិបតេយ្យ។

បាតុកម្មរបស់សម្ព័ន្ធសហជីព និងសមាគមកម្មករនិយោជិត នៅភ្នំពេញ នាព្រឹកថ្ងៃអាទិត្យនេះ បានប្រព្រឹត្តទៅ ក្នុងស្ថានភាពតានតឹង ដោយសារកម្លាំងមានសមត្ថកិច្ចរបស់រដ្ឋាភិបាលជិត១ពាន់នាក់មិនអនុញ្ញាតឱ្យបាតុករប្រហែល៣ពាន់នាក់ចូលទៅលើទីលានប្រជាធិបតេយ្យ។ ការប៉ះទង្គិចគ្នាដោយហិង្សាបានកើតឡើង មួយស្របក់ ដោយបណ្តាលឱ្យរបួសមនុស្សជាង១០នាក់ ហើយមនុស្ស២នាក់
ត្រូវបានចាប់ខ្លួន ដោយសារបានបង្កអំពើហិង្សា។ ក្នុងឱកាសនេះដែរ សមាជិកសមាគមអ្នកប្រជាធិបតេយ្យ សមាជិកនិងអ្នកគាំទ្រគណបក្សសង្គ្រោះជាតិ ក៏មានវត្តមាននៅក្នុងបាតុកម្ម ព្រឹកមិញដែរ។ដូចការគ្រោងទុកមែន អាជ្ញាធរពិតជាបានពង្រាយកម្លាំងប្រដាប់អាវុធចាំទប់បាតុកម្មរបស់សម្ព័ន្ធសហជីព និងសមាគមកម្មករនិយោជិត ដែលត្រូវបានធ្វើនៅព្រឹកថ្ងៃអាទិត្យនេះ។ កម្លាំងមានសមត្ថកិច្ចជិត១ពាន់នាក់ ស្ថិតនៅលើនិងនៅជុំវិញទីលានប្រជាធិបតេយ្យរួចជាស្រេច មុនការមកដល់របស់បាតុករ ដែលមានគ្នាប្រហែល៣ពាន់នាក់។ ដូច្នេះ អ្នកធ្វើបាតុកម្មមិនអាចឈានទៅដល់គោលដៅរបស់ខ្លួនឡើយ នៅព្រឹកមិញ។

ការប្រឈមមុខដាក់គ្នាបានចាប់ផ្តើមតាំងពីម៉ោងជាង។ ម្ខាងគឺកម្លាំងចម្រុះ ក្នុងនោះមាននគរបាល អាវុធហត្ថ កងសន្តិសុខ និងតម្រួតចរាចរណ៍ ស្ថិតនៅលើទីលានប្រជាធិបតេយ្យ និងនៅលើវិថីនានា ជុំវិញទីលាននោះ។ ម្ខាងទៀត ស្ថិតនៅឯស្ពាននាគខាងត្បូងវត្តភ្នំ គឺបាតុករ ដែលជាសមាជិក និងអ្នកគាំទ្រ សម្ព័ន្ធសហជីពកម្មករ និងសមាគមនិយោជិត ទាំង។ ក្នុងចំណោមបាតុករ និងអ្នកគាំទ្របាតុកម្ម គេឃើញមានសមាជិក និងអ្នកគាំទ្រគណបក្សប្រឆាំង និងសមាគមអ្នកប្រជាធិបតេយ្យផងដែរ។

ការដណ្តើមកាន់កាប់ទីលានប្រជាធិបតេយ្យបានបង្កអំពើហិង្សាឡើង។ នៅម៉ោង៩និង២០នាទី កម្លាំងសន្តិសុខបានដេញវាយមនុស្សនៅខាងបាតុករ ដោយសារពួកគេបានស្រែកជេរ និងគប់ដបទឹកសុទ្ធ មួកសុវត្ថិភាព និងដុំថ្ម ទៅលើកម្លាំងមានសម្ថកិច្ច។ កងសន្តិសុខបានវាយអ្នកទាំងនោះរហូតដល់បាក់ដំបងជ័រ រីឯបាតុករបានរុះរើរបាំងដែករបស់សមត្ថកិច្ច ដែលស្ថិតនៅក្បាលស្ពាននាគ រប៉ាត់រប៉ាយអស់។ ក្នុងរយៈពេលប្រហែល៥នាទីនៃការប៉ះទង្គិចនោះ មនុស្សជាង១០នាក់បានរបួស ក្នុងនោះមានលោក យឹម សុវណ្ណ តំណាងរាស្ត្រគណបក្សសង្គ្រោះជាតិផង។ ទន្ទឹមនឹងនេះដែរ មនុស្ស២នាក់ ដែលមានជំពាម និងគ្រាប់ឃ្លីដែក និងដែលបានចោលរបស់រឹងទៅលើសមត្ថកិច្ច ត្រូវបានចាប់ខ្លួន ប្រគល់ឱ្យសមត្ថកិច្ច។ អ្នកទាំងពីរ ម្នាក់មានអាយុប្រហែល១៧ឆ្នាំ និងម្នាក់ទៀតប្រហែល២០ទៅ៣០ឆ្នាំ ត្រូវបានបាតុករចោទថា ជាជនទីបី។

រហូតមកដល់ពេលនេះ ទីលានប្រជាធិបតេយ្យនៅតែស្ថិតក្រោមការកាន់កាប់របស់កម្លាំងរដ្ឋាភិបាល ដែលបានហាមបាតុករមិនឱ្យប្រមូលផ្តុំគ្នាមួយរយៈ រហូតទាល់តែសភាពការណ៍មានប្រក្រតីភាពឡើងវិញ។ ប៉ុន្តែ មេដឹកនាំសហជីពកម្មករ និងសមាគមនិយោជិតទាំងអស់ សុទ្ធតែបានប្រកាសអំពីការធ្វើបាតុកម្មបន្តទៀត រហូតទាល់តែពួកគេទទួលបានដំណោះស្រាយតាមការទាមទារ។ ការទាមទាររបស់ពួកគេគឺការដោះលែងមនុស្ស២៣នាក់ ដែលត្រូវអាជ្ញាធរចាប់ដាក់ពន្ធនាគារត្រពាំងផ្លុង ការដំឡើងប្រាក់ខែអប្បបរមាសម្រាប់កម្មករនិយោជិតឱ្យដល់១៦០ដុល្លារ និងវែកមុខអ្នកបញ្ជា និងជនដៃដល់ ដែលបានបាញ់បាតុករឱ្យស្លាប់ និងរបួសនៅលើមហាវិថីវេងស្រេង កាលពីដើមខែ។

គួរបញ្ជាក់ថា នៅព្រឹកមិញ គេឃើញតំណាងរាស្ត្ររបស់គណបក្សប្រឆាំងខ្លះទៀត ដូចជាជំទាវ មួរ សុខហួរ និងលោក ហូរ វ៉ាន់ ជាដើម នៅជាមួយលោក ម៉ម សូណង់ដូរ ប្រធានវិទ្យុសំបុកឃ្មុំ និងសមាគមអ្នកប្រជាធិបតេយ្យដែរ។ លោក ម៉ម សូណង់ដូរ បានប្រកាស នៅពេលបាតុកម្មនោះថា ថ្ងៃស្អែកជាវេនរបស់គាត់ដឹកនាំបាតុកម្មដើម្បីទាមទារដំឡើងកម្លាំងផ្សាយវិទ្យុសំបុកឃ្មុំ និងសុំដំឡើងទូរទស្សន៍ វិញម្តង៕

Labels: ព័ត៌មានជាតិ

Adonis golden Ratio