អតីតអ្នកទទួលខុសត្រូវក្រុមហ៊ុនកុងតឺណឺវៀតណាម Vinalines ពីររូប ទទួលទោសប្រហារជីវិត

ដោយ ព្រំ សឿន សូលីណា

នៅថ្ងៃចន្ទនេះ តុលាការវៀតណាមបានសំរេចកាត់ទោសប្រហារជីវិតលើអតីតអ្នកទទួលខុសត្រូវក្រុមហ៊ុនដឹកជញ្ជូនកុងតឺណឺ Vinalines ពីររូប ពីបទកេងបន្លំថវិកាជាតិ។ ការសំរេចដាក់ទោសប្រហារជីវិតនេះ បង្ហាញពីកិច្ចប្រឹងប្រែងរបស់រដ្ឋាភិបាលវៀតណាម ក្នុងការកំចាត់អំពើពុករលួយ។
នៅថ្ងៃចន្ទនេះ តុលាការវៀតណាមបានសំរេចកាត់ទោសប្រហារជីវិតលើអតីតអ្នកទទួលខុសត្រូវក្រុមហ៊ុនដឹកជញ្ជូនកុងតឺណឺ Vinalines ពីររូប ជាប់ទោសពីបទកេងបន្លំថវិកាជាតិ និងបានធ្វើការគ្រប់គ្រងមិនល្អ បណ្តាលអោយក្រុមហ៊ុនជួបបញ្ហាថវិកាធ្ងន់ធ្ងរ។

ជនជាប់ចោទទាំងពីររូបនោះ គឺ ៖ លោក Duong Chi Dung អាយុ ៥៦ឆ្នាំ ជាអតីតប្រធានក្រុមហ៊ុន Vinalines ចន្លោះចុងឆ្នាំ២០០៥ ដល់ខែកុម្ភៈ ឆ្នាំ២០១២។ ម្នាក់ទៀត គឺលោក Mai Van Phuc ជាអតីតប្រធានទូទៅរបស់ Duong Chi Dung។ Duong Chi Dung ធ្លាប់បានរត់គេចទៅបរទេស ប៉ុន្តែត្រូវបានចាប់ខ្លួននៅខែកញ្ញា ឆ្នាំ២០១២ នៅអាស៊ី រួចបញ្ជូនត្រលប់មកវៀតណាមវិញ។ លោក Duong បានប្រកែកថា មិនបានលួចលុយជាតិនោះទេ ប៉ុន្តែ គាត់បានទទួលស្គាល់ថា មានការទទួលខុសត្រូវមួយចំណែក ចំពោះវិបត្តិថវិការបស់ក្រុមហ៊ុនដឹកជញ្ជូនកុងតឺណឺ Vinalines។

កាលពីថ្ងៃព្រហស្បតិ៍សប្តាហ៍មុន ជនជាប់ចោទទាំងពីររូបនេះ បានបង្ហាញមុខនៅសវនាការនៅទីក្រុងហាណូយ ជាមួយវត្តមានរបស់អតីតអ្នកទទួលខុសត្រូវ៨រូបផ្សេងទៀត។ ពួកគេទាំងនេះ ជាប់ចោទពីបទធ្វើអោយរដ្ឋវៀតណាមបាត់បង់ថវិកា៣៦៦ពាន់លានដុង គឺត្រូវនឹង១២លាន៥សែនអឺរ៉ូ។ ជនជាប់ចោទទាំង៨នាក់នេះ ទទួលទោសជាប់ពន្ធនាគារពី៦ឆ្នាំ ទៅ៣០ឆ្នាំ។

យោងតាមប្រធានតុលាការវៀតណាម Ngo Thi Anh ជនជាប់ចោទទាំងអស់នេះ ធ្លាប់បានទិញស្ពានចម្លងបណ្តែតទឹករបស់ជប៉ុន ដែលស្ទើរតែប្រើលែងបានទៅហើយ តម្រូវអោយមានការចាយវាយច្រើន ក្នុងការជួសជុលឡើងវិញ។

ក្រុមហ៊ុនដឹកជញ្ជូនកុងតឺណឺ Vinalines ជាសហគ្រាសដឹកជញ្ជូនផ្លូវទឹករបស់រដ្ឋវៀតណាម។ ក្រុមហ៊ុនមានបំណុលប្រមាណជិត៣ពាន់លានដុល្លារ។ វៀតណាមជាប្រទេសមួយក្នុងចំណោមប្រទេសដែលមានអំពើពុករលួយខ្ពស់ ក្នុងពិភពលោក។ ការសំរេចដាក់ទោសប្រហារជីវិតលើអតីតអ្នកដឹកនាំរបស់ Vinalines ទាំងពីររូបនៅថ្ងៃចន្ទនេះ បង្ហាញច្បាស់ថា រដ្ឋាភិបាលប្រឹងប្រែងកំចាត់អំពើពុករលួយ៕