អ្នកការពារសន្តិសុខបាតុកម្មថៃចាប់ពលរដ្ឋខ្មែរ២នាក់

អ្នករាយការណ៍វិទ្យុអាស៊ីសេរី ប្រចាំទីក្រុងបាងកក ឲ្យដឹងថា ជនជាតិខ្មែរពីរនាក់ត្រូវបានអ្នកការពារសន្តិសុខបាតុកម្មចាប់ខ្លួននៅថ្ងៃទី២ ធ្នូ។

ប្រភពបញ្ជាក់ថា ទូរទស្សន៍ថៃ ប៉ុស្តិ៍លេខ៣ បានចាក់ផ្សាយការចាប់ខ្លួនជនជាតិខ្មែរពីរនាក់នោះ ដោយចាប់ដាក់រថយន្ត ចោទថា ជនជាតិខ្មែរពីរនាក់នោះបានព្យាយាមលួចជ្រៀតចូលកន្លែងធ្វើបាតុកម្ម និងស្វែងយល់ពីស្ថានភាពបាតុកម្មជាក់ស្ដែង ហើយមានបំណងបំផ្លាញពួកបាតុករថៃ។

ក៏ប៉ុន្តែរដ្ឋលេខាធិការ និងអ្នកនាំពាក្យក្រសួងការបរទេសកម្ពុជា លោក កុយ គួង បញ្ជាក់នៅរសៀលថ្ងៃទី២ ធ្នូ នេះថា មន្ត្រីទូតខ្មែរប្រចាំក្រុងបាងកក ប្រទេសថៃ កំពុងស្រាវជ្រាវព័ត៌មាននៃការចាប់ខ្លួននេះហើយ៕