គណៈប្រតិភូជាន់ខ្ពស់សភានៃសហភាពមីយ៉ាន់ម៉ានឹងមកទស្សនកិច្ចនៅកម្ពុជា

អគ្គលេខាធិការដ្ឋានរដ្ឋសភាបានចេញសេចក្ដីប្រកាសព័ត៌មាន នៅថ្ងៃទី១៨ ធ្នូ ថា គណៈប្រតិភូជាន់ខ្ពស់សភានៃសហភាពមីយ៉ាន់ម៉ា (Myanmar) ដឹកនាំដោយ លោក ធួរ៉ា យូស្វីម៉ាន (Thura U Shwe Mann) ប្រធានសភាជាន់ទាប និងជាប្រធានសភាសហភាពមីយ៉ាន់ម៉ា នឹងមកទស្សនកិច្ចផ្លូវការ និងមិត្តភាពនៅកម្ពុជា ចាប់ពីថ្ងៃទី១៩ ដល់ថ្ងៃទី២២ ធ្នូ ឆ្នាំ២០១៣។
ការអញ្ជើញមកទស្សនកិច្ចនៅកម្ពុជា របស់ប្រធានសភាជាន់ទាបភូមា នេះ តាមការអញ្ជើញរបស់ លោក ហេង សំរិន ជាប្រធានសភានៃព្រះរាជាណាចក្រកម្ពុជា។

នៅក្នុងដំណើរទស្សនកិច្ចនៅកម្ពុជា គណៈប្រតិភូមានគម្រោងក្រាបគាល់ព្រះមហាក្សត្រ ព្រះករុណា ព្រះបាទសម្ដេចព្រះ បរមនាថ នរោត្តម សីហមុនី ជួបពិភាក្សាទ្វេភាគីជាមួយ លោក ហេង សំរិន ប្រធានរដ្ឋសភាខ្មែរ និងជួបសវនាការជាមួយលោកនាយករដ្ឋមន្ត្រី ហ៊ុន សែន។

ក្រៅពីនេះ គណៈប្រតិភូនឹងអញ្ជើញទស្សនាសារមន្ទីរជាតិ ព្រះបរមរាជវាំង និងទស្សនាប្រាសាទអង្គរវត្ត ខេត្តសៀមរាប៕