ក្រុមការងារបង្ការអំពើទារុណកម្មអ.ស.ប ជំរុញកម្ពុជាបង្កើតស្ថាប័នឯករាជ្យតាមដានការធ្វើទារុណកម្មជាប់ឃុំ

ដោយ អ៊ឹម រចនា

អនុ គណៈកម្មការបង្ការអំពើទារុណកម្ម នៃអង្គការសហប្រជាជាតិ នៅក្នុងសេចក្ដីប្រកាសព័ត៌មានចុះថ្ងៃទី១៦ធ្នូ បានជំរុញកម្ពុជា ឲ្យបង្កើតស្ថាប័នជាតិឯករាជ្យមួយ ដើម្បីតាមដាន និងឃ្លាំមើល ប្រព្រឹត្តកម្មទៅលើអ្នកជាប់ឃុំ។ សមាជិក នៃអនុគណៈកម្មការបង្ការអំពើទារុណកម្ម អំពាវនាវដូច្នេះ នៅក្រោយដំណើរទស្សនកិច្ច៥ថ្ងៃ ទៅកាន់កន្លែងឃុំឃាំងនានានៅកម្ពុជា ក្នុងនោះរួមមានពន្ធនាគារ ប៉ុស្តិ៍ប៉ូលិស មជ្ឈមណ្ឌលស្ដារនីតិសម្បទា និងកន្លែងបន្សាបសារធាតុញៀនជាដើម។
សេចក្ដីប្រកាសព័ត៌មាន ចុះថ្ងៃទី១៦ធ្នូ របស់ក្រុមការងារបង្ការអំពើទារុណកម្មនៃអង្គការសហប្រជាជាតិ ជំរុញកម្ពុជា ឲ្យបង្កើតស្ថាប័នជាតិឯករាជ្យ ដើម្បីតាមដាន និងឃ្លាំមើល ប្រព្រឹត្តកម្មទៅលើអ្នកជាប់ឃុំ ស្របតាមខ្លឹមសារនៃអនុសញ្ញាស្ដីពីការប្រឆាំងការធ្វើទារុណកម្ម និងពិធីសារបន្ថែម ក្នុងនាមកម្ពុជាជារដ្ឋភាគី។

ការអំពាវនាវនេះ ធ្វើឡើងនៅក្រោយពេលដែលសមាជិកនៃអនុគណៈកម្មការបង្ការអំពើទារុណកម្ម បានធ្វើដំណើរទស្សនកិច្ចដោយគ្មានការជូនដំណឹងជាមុន រយៈពេល៥ថ្ងៃ ពីថ្ងៃទី៩ ដល់ថ្ងៃទី១៣ធ្នូ ទៅកាន់កន្លែងឃុំឃាំងនានានៅកម្ពុជា ក្នុងនោះរួមមានពន្ធនាគារ ប៉ុស្តិ៍ប៉ូលិស មជ្ឈមណ្ឌលស្ដារនីតិសម្បទា និងកន្លែងបន្សាបសារធាតុញៀនជាដើម។

ជាដំណើរទស្សនកិច្ច ដែលធ្វើឡើងដើម្បីកំណត់ ថា តើស្ថានភាពរបស់អ្នកជាប់ឃុំនៅកម្ពុជា មានភាពប្រសើរឡើងឬទេ ចាប់តាំងពីមានដំណើរទស្សនកិច្ចរបស់អនុគណៈកម្មការបង្ការអំពើទារុណកម្ម នៅកម្ពុជា កាលពីឆ្នាំ២០០៩។ ក្រោយដំណើរទស្សកិច្ចនៅឆ្នាំ២០១៣នេះ គណៈប្រតិភូក្រុមការងារបង្ការអំពើទារុណកម្ម បានបង្ហាញពីការសង្កេតបណ្ដោះអាសន្នទៅកាន់អាជ្ញាធរកម្ពុជា ជាសម្ងាត់។

ប្រធានអនុគណៈកម្មការបង្ការទារុណកម្ម លោក Malcolm Evans បានគូសបញ្ជាក់ថា ការរកឃើញទាំងប៉ុន្មាននៅក្នុងដំណើរទស្សនកិច្ចលើកនេះ នឹងត្រូវរក្សាជាការសម្ងាត់ រហូតដល់ពេលដែលរដ្ឋាភិបាលកម្ពុជា សម្រេចចិត្តបង្ហាញជាសាធារណៈ។ ប្រធានអនុគណៈកម្មការនេះ បន្តថា ដំណើរទស្សនកិច្ចលើកនេះ ជាការបំភ្លឺមួយ ដែលនឹងក្លាយជាគ្រឹះក្នុងការលើកកម្ពស់ការប្រព្រឹត្តទៅលើអ្នកជាប់ឃុំក្នុងប្រទេសកម្ពុជា ឲ្យកាន់តែប្រសើរឡើងថែមទៀត។

វិទ្យុបារាំងអន្ដរជាតិ មិនអាចសុំការបំភ្លឺណាមួយពី លោកគុយ ប៊ុនសុន អគ្គនាយកនៃអគ្គនាយកដ្ឋានពន្ធនាគារ ពាក់ព័ន្ធនឹងស្ថានភាពអ្នកជាប់ឃុំនៅកម្ពុជា បានទេ។ ប៉ុន្តែ កាលពីប៉ុន្មានថ្ងៃកន្លងទៅនេះ ក្រសួងមហាផ្ទៃ បានបង្ហើបឲ្យដឹងពីគម្រោងផ្លាស់ប្ដូរឈ្មោះពន្ធនាគារ ទៅជាមន្ទីរអប់រំកែប្រែវិញ។ ការដូរឈ្មោះនេះ គឺចង់បង្ហាញពីទីកន្លែងកែប្រែ ដែលត្រូវផ្តល់ជំនាញដល់អ្នកទោសឲ្យពួកគេមានចំណេះ នៅពេលដែលចេញទៅវិញ ពួកគេនឹងមានមុខរបរ ចៀសវាងការប្រព្រឹត្តបទល្មើសបន្តទៀត។

ជុំវិញបញ្ហានៃភាពមិនប្រក្រតីនៅក្នុងពន្ធនាគារ ដូចជាករណីអ្នកទោសថ្មីទើបនឹងចូល ត្រូវអ្នកទោសចាស់វាយធ្វើបាប ឬក៏សកម្មភាពផ្សេងៗមួយចំនួនទៀតនោះ ត្រូវបានក្រសួងមហាផ្ទៃបដិសេធ ដោយអះអាងថា មិនមានទេ ចំពោះការគ្រប់គ្រងពន្ធនាគារនាពេលនេះ៕

Labels: ព័ត៌មានជាតិ

Adonis golden Ratio