រហូតមកដល់ពេលនេះតំណាងជនរងគ្រោះនៅតែព្យាយាមដាក់ពាក្យបណ្តឹងជាបន្តបន្ទាប់ដើម្បីស្វែងរកយុត្តិធម៌ជូនដល់ជនរងគ្រោះ បើទោះបីសាលាដំបូងរាជធានីភ្នំពេញមិនហ៊ានបើកការស៊ើបអង្កេតក៏ដោយ។ ការដែលសាលាដំបូងរាជធានីភ្នំពេញរុញសំណុំរឿងប្តឹងចោទប្រកាន់បុគ្គល ជួន សុវណ្ណ និងរ័ត្ន ស្រ៊ាង នៅពីក្រោយអំពើហិង្សាកាលពីថ្ងៃទី១២ ខែវិច្ឆិកា ទៅឱ្យស្ថាប័ននគរបាលជាតិជាអ្នកស៊ើបអង្កេតមានន័យថាប្រព័ន្ធតុលាការក្នុងប្រទេសកម្ពុជាគ្មានឆន្ទៈរកយុត្តិធម៌ជូនជនរងគ្រោះទេ។
ការិយាល័យឧត្តមស្នងការអង្គការសហប្រជាជាតិប្រចាំប្រទេសកម្ពុជា កាលពីវេលាម៉ោង១០ព្រឹក ថ្ងៃចន្ទ ទី០៩ ខែធ្នូ បានទទួលពាក្យបណ្តឹងស្នើអន្តរាគមន៍របស់យុវជនរងគ្រោះម្នាក់ក្នុងហេតុការណ៍ប៉ះទង្គិចនៅគល់ស្ពានស្ទឹងមានជ័យដែលបានប្តឹងស្នងការនគរបាលនិងមេបញ្ជាការកងរាជអាវុធហត្ថរាជធានីភ្នំពេញពីបទឃាតកម្មប្រព្រឹត្តដោយរាជការសាធារណៈ។ យុវជនឈ្មោះ នាង សុឃុន អាយុ២៥ឆ្នាំ ដែលបានដាក់ពាក្យបណ្តឹងនៅការិយាល័យឧត្តមស្នងការអង្គការសហប្រជាជាតិប្រចាំកម្ពុជា បានអះអាងក្រោយពេលដាក់ពាក្យបណ្តឹងថាអង្គការសហប្រជាជាតិនឹងអន្តរាគមន៍ចាត់វិធានការជំរុញឱ្យតុលាការពន្លឿនដោះស្រាយករណីនេះឱ្យបានឆាប់។ តំណាងជនរងគ្រោះរូបនេះបានរិះគន់ថាប្រព័ន្ធតុលាការនៅកម្ពុជាមិនឯករាជ្យនិងមិនអាចផ្តល់យុត្តិធម៌ដល់ជនរងគ្រោះបានទេ។
យុវជន នាង សុឃុន បានរំលឹកថាកាលពីថ្ងៃទី១៤ ខែវិច្ឆិកា ឆ្នាំ២០១៣ លោកបានដាក់ពាក្យបណ្តឹងដូចគ្នានេះទៅអយ្យការអមសាលាដំបូងរាជធានីភ្នំពេញដោយចោទប្រកាន់លោក ជួន សុវណ្ណ និងលោក រ័ត្ន ស្រ៊ាង ថាបានបញ្ជាឱ្យក្រុមសមត្ថកិច្ចបាញ់សម្លាប់កម្មករ និងប្រជាពលរដ្ឋស្លូតត្រង់ធ្វើឱ្យស្ត្រីអ្នកលក់បាយម្នាក់ស្លាប់ ហើយព្រះសង្ឃនិងប្រជាពលរដ្ឋជាច្រើននាក់ទៀតរងរបួស។ យុវជន នាង សុឃុន បានបញ្ជាក់ថា កាលពីថ្ងៃទី២៦ ខែតុលា លោកបានចូលជួបមន្ត្រីសាលាដំបូងរាជធានីភ្នំពេញដើម្បីសួរនាំ តែមន្ត្រីតុលាការហាក់ដូចជាព្យាយាមបិទបាំងព័ត៌មានមិនចាត់ការសំណុំរឿងនេះ។ ប្រការនេះហើយដែលធ្វើឱ្យមជ្ឈដ្ឋានជាតិនិងអន្តរជាតិមើលឃើញយ៉ាងច្បាស់ថាប្រព័ន្ធតុលាការក្នុងប្រទេសកម្ពុជាបម្រើតែផលប្រយោជន៍មន្ត្រីជាន់ខ្ពស់ និងអ្នកមានអំណាចតែប៉ុណ្ណោះ។
ទាក់ទងបញ្ហាខាងលើនេះមន្ត្រីអង្គការសិទ្ធិមនុស្សលីកាដូ បានបញ្ជាក់ថាពាក្យបណ្តឹងទៅកាន់ការិយាល័យឧត្តមស្នងការអង្គការសហប្រជាជាតិប្រចាំប្រទេសកម្ពុជា គឺជាសញ្ញាមួយប្រាប់ទៅអង្គការសហប្រជាជាតិពីភាពមិនឯករាជ្យនៃប្រព័ន្ធតុលាការនៅកម្ពុជា។ ដោយហេតុថាករណីប៉ះទង្គិចបណ្តាលឱ្យមានប្រជាពលរដ្ឋស្លាប់និងរងរបួសនៅក្បែរស្ពានស្ទឹងមានជ័យ កាលពីថ្ងៃទី១២ ខែវិច្ឆិកា ឆ្នាំ២០១៣ រហូតមកដល់ពេលនេះ អ្នកជាប់ពាក់ព័ន្ធបទល្មើសមិនទាន់ត្រូវបានចាត់ការតាមច្បាប់នោះទេ។ មិនតែប៉ុណ្ណោះលោក ជួន សុវណ្ណ ស្នងការនគរបាលរាជធានី និងលោក រ័ត្ន ស្រ៊ាង មេបញ្ជាការកងរាជអាវុធហត្ថរាជធានីបានដោះសាយករួចខ្លួន ហើយទម្លាក់ការទទួលខុសត្រូវទៅលើជនទី៣ ដោយឥតអៀនខ្មាស។ ប្រការនេះបានបង្ហាញអំពីវប្បធម៌គ្មានទោសពៃរ៍នៅកម្ពុជាដែលកំពុងរាលដាលកាន់តែខ្លាំងឡើងៗព្រោះអ្នកដែលបានប្រព្រឹត្តបទឧក្រិដ្ឋសម្លាប់មនុស្សបែរជាអាចគេចផុតពីការដាក់ទោស។
សូមរំលឹកថាក្នុងករណីផ្ទុះអំពើហិង្សានៅចំណុចស្ពានស្ទឹងមានជ័យកាលពីថ្ងៃទី១២ ខែវិច្ឆិកា គឺសមត្ថកិច្ចបានប្រើហិង្សាលើកម្មករ ព្រះសង្ឃ ប្រជាពលរដ្ឋយ៉ាងកំរោល ហើយស្ត្រីអ្នកលក់បាយម្នាក់ត្រូវស្លាប់ភ្លាមៗ ដោយសារគ្រាប់កាំភ្លើងរបស់សមត្ថកិច្ច។ ក្រោយពេលកើតហេតុប្រជាពលរដ្ឋនិងព្រះសង្ឃរាប់សិបនាក់ត្រូវបានសមត្ថកិច្ចចាប់ខ្លួន ហើយក្រោយមកបានដោះលែងឱ្យមានសេរីភាពវិញគឺមានជនសង្ស័យពីរនាក់កំពុងជាប់ឃុំក្នុងពន្ធនាគារ។ នៅក្នុងករណីនេះគេមិនទាន់ឃើញរដ្ឋាភិបាលរបស់លោក ហ៊ុន សែន ចាត់វិធានការលើអ្នកដែលបញ្ជាពីក្រោយខ្នងសមត្ថកិច្ចឱ្យប្រើអំពើហិង្សានិងបាញ់សម្លាប់ប្រជាពលរដ្ឋនោះទេ ផ្ទុយទៅវិញជនសង្ស័យ២នាក់ត្រូវបានសាលាដំបូងរាជធានីភ្នំពេញចោទប្រកាន់និងឃុំខ្លួនយ៉ាងអយុត្តិធម៌។
ក្រុមមន្ត្រីអង្គការក្រៅរដ្ឋាភិបាលបានលើកឡើងថាប្រសិនបើប្រព័ន្ធតុលាការក្នុងប្រទេសកម្ពុជាមានភាពឯករាជ្យដូចតុលាការនៃបណ្តាប្រទេសនានានោះគឺបុគ្គល ជួន សុវណ្ណ និងបុគ្គលរ័ត្ន ស្រ៊ាង ត្រូវប្រឈមនឹងការដាក់ទោសតាមផ្លូវច្បាប់ចៀសមិនផុតឡើយ។ ក៏ប៉ុន្តែដោយសារប្រព័ន្ធតុលាការក្នុងប្រទេសកម្ពុជាមិនឯករាជ្យ ទើបបុគ្គលជួន សុវណ្ណ និង រ័ត្ន ស្រ៊ាងអាចគេចផុតពីការផ្តន្ទាទោសហើយទម្លាក់ការទទួលខុសត្រូវទៅលើជនទី៣។ ទោះជាយ៉ាងណាភស្តុតាងជាវីដេអូឃ្លីប ត្រូវបានផ្សព្វផ្សាយជាសាធារណៈអំពីសកម្មភាពបុគ្គល រ័ត្ន ស្រ៊ាង និងបុគ្គលជួន សុវណ្ណ បញ្ជាឱ្យសមត្ថកិច្ចប្រើអំពើហិង្សានិងបាញ់ប្រហារពលរដ្ឋយ៉ាងច្បាស់ក្រឡែត៕
ប្រភព៖មនសិការខ្មែរ
Labels:
ព័ត៌មានជាតិ
Previous Article
